Kinguaassiuutitigut panissaminut allatut atoqatiginninneq - K 120/20

Eqqartuussissut Nunatta Eqqartuussisuuneqarfianit oqaatigineqarpoq ulloq 16. september 2020.

Unnerluutigimeqartoq pisimasuni tamani eqqartuussisoqarfiup eqqartuussutaani pisuutinneqarnikuuvoq. Pisimasoq 1 aamma 3 eqqartuussisuuneqarfimmi uppernarsaasiilluni suliareqqitassanngortitsinertut suliarineqarput, pisimasoq 2-li pinerluttulerinermi inatsisip § 88-ianik unioqqutitsinermut tunngasoq pineqaatissiissutissamik aalajangersaanermut tunngatillugu suliareqqitassanngortitsinertut suliarineqarluni.

Taaseqataasut marluk niviarsiaqqap pineqartup nassuiaataa toqqammavigalugu tunngaviutippaat unnerluutigineqartup taanna 27. november 2018-imi pisuni marlunni utsuisigut attuuasimagaa, ataasiarluni truusiisa iluisigut, tassani ataasiarluni inussani utsuinut mangunniarsarisimallugit. Eqqartuussisuuneqarfiup tunngaviutippaattaaq unnerluutigineqartup taassuma assaa 4. april 2019-imi tigullugu usuni tissarsartissimagaa. Taaseqataasut taakku isumaqarput niviarsiaraq pineqartoq qularnaatsumik ataqatigiissummillu nassuiaateqarsimasoq aamma atornerluinerit pillugit uppernartumik nassuiaateqarsimasoq. Ilisimannittup nassuiaataanik maanna ilumoorsorinninnginnera allatut inerniliinermik kinguneqarsinnaanngilaq. Tamatumani oqaatigineqarpoq ilisimannittup unnerluutigineqartoq inooqatigigaa pinngitsuutitsinissamillu kissaateqarnera arlalinnik pissuteqarsinnaasoq.

Taaseqataasoq ataaseq isumaqarpoq unnerluussisussaatitaasut pisimasoq 1-imi 3-milu eqqartuussaatitsinissamut naammattumik uppernarsaateqarsimanngitsut. Taaseqataasoq taanna isumaqarpoq ilisimannittup nassuiaataa uppernarpasinngitsuusoq aamma animi iliuuserisimasaanut angut alla unnerluutigigaa. Taamaattumik unnerluutigineqartoq pinerluttulerinermi inatsisip § 79-ianik aamma § 84-iani, imm. 1-imik unioqqutitsinermut pinngitsuutinneqartariaqartoq.

Amerlanerussuteqartut malillugit eqqartuussuteqartoqarmat unnerluutigineqartoq pinerluttulerinermi inatsisip § 79-ianik aamma § 84-iani, imm. 1-imik unioqqutitsinermut pisuutinneqarpoq.

Pineqaatissiissummik aalajangersaanermi, tamatumunnga ilanngunneqarlunittaaq inooqatiminut ataasiarluni nakuuserneq, eqqartuussisuuneqarfiup pingaartippaa kinguaassiuutitigut atornerluinerni pissutsit qanoq ittuusimaneri, aamma taamatut pisoqartarsimasoq ilisimannittup Nuummiinnerata sulinerataluunniit nalaani, meeqqat unnerluutigineqartumut isumagitillugit. Eqqartuussisuuneqarfiup sakkortusaataasumik pingaartippaattaaq unnerluutigineqartup ilisimannittoq najugaqatigisimagaa, taamaalillunilu taassumunnga ataatatut illuni aammalu tatiginninneq atornerluinerni innarlerneqarujussuarsimasoq. Eqqartuussisoqarfiup pineqaatissiissutigisimasaa taamaalilluni tulluartumik sivisussusilersimasorineqarpoq.

Eqqartuussisoqarfiup mitaagaanermut taarsiissutinik annertussusiliisimanera eqqartuussisuuneqarfiup atuuttussanngortippaattaaq. Tamatumani oqaatigineqarpoq pisimasuni assigiinngitsuni pingasuni atornerluinerit pineqartut.

Eqqartuussisoqarfiup eqqartuussutaa atuuttussanngortinneqarpoq.

Suliap normua: K 120/20

Eqqartuussissutit nassuiaatillu