Eqqartuussut atortuutiinnarneqarpoq - K 172/20

Eqqartuussissut Nunatta Eqqartuussisuuneqarfianit oqaatigineqarpoq ulloq 27. januar 2021.

Eqqartuussisuuneqarfiup eqqartuussivittuulli toqqammavigaa, eqqartuussaasimasoq nakkutigisaanerminut atatillugu oqaloqatiginnittarnissamut takkutinngitsoortarsimasoq, Pinerluttunik Isumaginnittoqarfiup allakkatigut aggersaasarsimaneri 4. juuni 2019-imeersut aamma 3. juuli 2019-imeersut malillugit. Eqqartuussaasimasoq akerliliivoq oqarluni, aggeqqusissutit pineqartut tigusimanagit.

Apeqqutaatinnagu allakkat pinerluttunik isumaginnittoqarfimmit najukkami, unnerluutigisap eqqartuussisuuneqarfimmut nassuiaataa malillugu Nuummi najugaqarfigisaanut, allakkanut nakkartitsivimmut nakkartinneqarsimasut, eqqartuussisuuneqarfik isumaqarpoq qularnartoq allakkat eqqartuussaasimasup ilisimasaqarfigilersimanerai. Tassunga atatillugu uparuaatigineqassaaq, eqqartuussaasimasoq nassuiaasimammat, taamani piffissap tamatuma nalaani allat pingasut najugaqatigisimallugit.

Ilanngullugu uparuaatigineqassaaq, eqqartuussaasimasoq, piffissami politiit eqqartuussaasimasup najugaqarfianut saaffiginnimmata sassartinneqarnissaa siunertaralugu, eqqartuussaasimasoq Danmarkimut nuussimammat, taamaattumillu tamanna pissutigalugu saaffiginnissutaasumut qisuariaateqarsimanngitsoq.

Siornani allassimasut toqqammavigalugit, eqqartuussaasimasorlu eqqartuussisuuneqarfimmut nassuiaasimammat, nakkutigisaanissani ajorinagu, eqqornerusutut isigineqarpoq, piffissaq nakkutilligisaanermut aalajangiussaq sivitsorneqarpat, taamaalilluni nakkutigisaaneq aatsaat naassaluni ulloq 27. januaari 2022, pinerluttulerinermi inatsisip §-iisa 139-ani, imm. 1-imi, no. 2, toqqammavigalugu. Pissuserlu, eqqartuussaasimasoq nassuiaasimammat, nalusimanagu, nuunnini Pinerluttunik Isumaginnittoqarfimmut nalunaarutigisussaallugu, taamaakkaluartorli tassunga tunngasumik qanoq iliuuseqarsimanani Kalaallit Nunaannut nuunnerminut atatillugu, allaanerusumik inerniliisoqarsinnaanngilaq.

Taamaalilluni eqqartuussisuuneqarfik isumaqarpoq qularnaarlugu oqaatigineqarsinnaanngitsoq nakkutigisaanerup atuinnarneqarnissaa siunertamut akerliunera, pinerluttulerinermi inatsisip §-iisa 139-ani, imm. 3, toqqammavigalugu, taamaattumik Retten i Svendborgip eqqartuussutaa 6. februaari 2019-imeersoq atortuutiinnarneqarpoq.

Eqqartuussiviup eqqartuussutaa allanngortinneqarpoq imaalillugu, Retten i Svendborgip eqqartuussutaa 6. februaari 2019-imeersoq atortuutiinnarneqarluni aalajangersakkallu nakkutigisaanermut piffissamullu misiliiffiusumut tunngaasut sivitsorneqarput 27. januaari 2022 tikillugu.

Suliap normua: K 172/20

Eqqartuussissutit nassuiaatillu