Pineqaatissinneqarsimasunut inissiisarfimmiittussanngorlugu - K 208/20

Eqqartuussissut Nunatta Eqqartuussisuuneqarfianit oqaatigineqarpoq ulloq 28. januar 2021.

Unnerluutigineqartoq pisuunnginnerarpoq nassuiaallunilu, niviarsiaraq pineqartoq nalullugu, namminerlu, atoqatiginikuunagu.  

Niviarsiaraq suliamut tunngatillugu nassuiaavoq, aasakkut 2018-imi 13-inik ukioqarluni angummik utoqqasaamik pingasoriarluni atoqateqarsimalluni, taassumalu mobiltelefoonia arlaleriarluni Tusass-imik immersimagaa.  

Uppernarsaasiissuteqarnerup kingorna nunatta eqqartuussisuuneqarfiata tunngaviutippaa, unnerluutigineqartup, iliuuseqarnermi piffissami niviarsiaraq atoqatigisimagaa. Nunatta eqqartuussisuuneqarfiata matumani annertuumik pingaartippaa, niviarsiaqqap politiinit video-kut apersorneqarnerup nalaani qularnaalluartumik ataqatigiittumillu pisimasut pillugit nassuiaateqarnera, aamma unnerluutigineqartoq iliuuseqarsimasutut tikkuaramiuk atiatigut taallugu. Aamma nunatta eqqartuussisuuneqarfiata niviarsiaqqap nassuiaataa pingaartippaat, atoqatiginninneq siulleq illumi tassani pisimasoq, unnerluutigineqartup ilaquttanilu Qitiusumik Inunnik Nalunaarsuisarfimmi paasissutissat naapertorlugit nalunaarsorsimammata, kingornalu atoqatiginninnerit marluk pisimasut illumi, unnerluutigineqartup illuata pigisaani, aamma unnerluutigineqartutut – aamma nammineerluni nassuiaaneratut – siusinnerusukkut tassaniissimanerarami.  

Tamatuma saniatigut nunatta eqqartuussisuuneqarfiata pingaartippaat, Tele-Postimit ilisimatitsissutinit ersersinneqarmat, unnerluutigineqartoq mastercardiminik niviarsiaqqap mobiltelefoonianut minnerpaamik ataasiarluni Tusass-imut akiliisimasoq.

Nunatta eqqartuussisuuneqarfiata nalilersuinerannut aamma tunngavilersuinermi ilaavoq, ilisimannittup nassuiaataa, tassa niviarsiaqqap oqaluttuussimagaani qanoq, anaanami angaaaqqiiata/akkaaqqiiata erneranit atornerlunneqarsimanerluni, neqeroorfigisimallugu mobiltelefoonia immerniarlugu, aamma telefoonikkut unnuami attavigisarsimagaa.  

Qulaaniittut tunngavigalugit unnerluutigineqartoq unnerluussissut naapertorlugu pisuutinneqarpoq.  

Suliap suunera qanorlu ittuunera eqqarsaatigalugu eqqartuussiviup pineqaatissiissummik aalajangiinera naapertuuttutut isigineqarpoq. Unnerluutigineqartup inuttut atugai pitsaasut aamma piffissaq sivisooq suliamut atorneqarsimasoq, unnerluutigineqartumut tapersiisinnaanngilaq, tamanna nammineerluni, pineqaatissiissut utaqqisitamik aalajangiinermik kinguneqarsinnaanngilaq. Nunatta eqqartuussisuuneqarfiata matumani ingammik atoqatiginninnerit amerlassusaat pingaartippaat, kiisalu unnerluutigineqartup aamma niviarsiaqqap  ukiumikkut annertuumik nikinganerat.  

Unnerluussisussaatitaasut niviarsiaraq sinnerlugu piumasaqaateqarput, mitagaasimaneq pillugu taarsiivigineqassasoq 20.000 koruunit ataannagit.  

Piffissap ilaatigut atoqatiginninnerit pingasut pineqarneri, eqqarsaatigalugit, tassani niviarsiaraq 13-iinnarnik ukioqartoq, nunatta eqqartuussisuuneqarfia isumaqarput eqqortuunerusoq, mitagaasimaneq pillugu taarsiissutissaq 40.000 koruuninut qaffanneqarpata, tamannalu unnerluutigineqartup akilissallugu pisussaaffigissagaa.  

Tamatuma saniatigut eqqartuussisoqarfiup eqqartuussutaa atuuttussanngortinneqarpoq.

Eqqartuussiviup eqqartuussutaa atuuttussanngortinneqarpoq ima allannguuserlugu, mitagaasimaneq pillugu taarsiissutissaq qaffanneqarluni 40.000 koruuninut.

Suliap normua: K 208/20

Eqqartuussissutit nassuiaatillu