Unnerluutigineqartoq pinngitsuutinneqarpoq - K 232/20

Eqqartuussissut Nunatta Eqqartuussisuuneqarfianit oqaatigineqarpoq ulloq 15. januar 2021.

Unnerluutigineqartoq aqqusinertigut angallannermut inatsimmi § 32 a, imm. 7-imik unioqqutitsinermut unnerluutigineqarpoq. Tassani ersersinneqarpoq biilertut, pisuinnaat ikaartarfiisa qullinik aqunneqanngitsut qanilliartorneranni, sukkassusertik naleqqussartassagaat imaalillugu, pisuinnarnut aqqusinikkut pisuinnaat ikaartarfiatigut ikaartunut ikaalersunillu navianaataanngitsumik akornutaanngitsumillu. Biilertup ajornanngikkaangat unilluni pisuinnaat ikaartittassavai.

Unnerluutigineqartoq aalajangersagaq taanna malillugu akisussaatinneqassappat aalajangiisuusumik pingaartinneqartariaqassaaq niviarsiaraq pineqartoq pisuinnaat ikaartarfiata eqqaaniilluni ikaartarfikkut ingerlaniarluni allorialernersoq, tamannalu pissusilersorneratigut takuneqarsinnaanersoq.

Unnerluutigineqartoq pisuunnginnerarpoq nassuiaallunilu, apuineq sioqqullugu qinersimalluni paasisimallugulu pisuinnarnik ikaartoqalinngitsoq aamma niviarsiaraq pineqartoq arpalluni siunerminut periasaarmat uninnissaminut periarfissaqarsimanani.

Nassuiaat taanna ilisimannittut marluk nassuiaataanniit annertuumik taperserneqarpoq, taakkualu marluullutik nassuiaapput pinerlineqartoq aallaqqaammut bussip eqqaani arpariarluni bussip siornanut arpassimasoq, tamannalu sioqqullugu unissimanngitsoq qinersimanngitsorlu. Ilisimannittoq aamma eqqartuussisoqarfimmut nassuiaavoq, niviarsiaqqap aqqusinikkut ikaarluni arlaat alooriartorniarpasikkaa, ikaaleramilu qinernani.

Ilisimannittut nassuiaataat tunngavigalugu, sanilliullugu bussip nakkutilliissutaaniit immiussaq, eqqartuussisuuneqarfiup tunngaviutippaa niviarsiaraq pineqartoq Aqqusinersuarmut appakaakkami arpassimasoq, appakkaannissanilu sioqqullugu unissimanngitsoq qineqqaannginamilu bussi aggertoq takusimanngikkaa. Taamaalilluni naatsorsuutigisinnaanngilaa bussip ingerlanini naleqqussassagaa. Eqqartuussisuuneqarfiup uppernarsarneqarsoraattaaq bussi pissutsit atuuttut malillugit sukkassuseqarsimasoq aamma apuinerup nalaani pisuinnarnik allanik  aqqusinikkut ikaartoqalersimanngitsoq.

Tamatumani oqaatigineqarpoq, pisuinnaap aqqusinikkut pisuinnaat ikaartarfiatigoornialersup ikaartarfiatiguulersulluunniit immikkut mianersornissaa aalajangersakkami § 32 a, imm. 7-imiittumi siunertarineqartoq, naleqq. § 42, imm. 2, taamaalilluni pisuinnaap biilit sukkasuumik ingerlallutik aggersut piffissarlu kingullerpaaq atorlugu aatsaat unittut annilaangatiginnginniassammagit. Pisuinnaalli qineqqaaratik arpallutik aqqusinikkut biilit angallaffiatigut ikaartut aalajangersakkami ilanngunneqarsimarpasinngillat. Taamaalilluni pisuinnaq biilertuniit pinngitsoorani salliutinneqarluni inissisimaffeqanngilaq.

Qulaaniittut tunngavigalugit unnerluutigineqartoq pinngitsuutinneqassaaq.

Suliap normua: K 232/20

Eqqartuussissutit nassuiaatillu