17 mai 2022
Nunatta Eqqartuussisuuneqarfia
Eqqartuussisoqarfiup eqqartuussutaa atuuttussanngortinneqarpoq - K 204/21
Angut 48-nik ukiulik Sermersuup eqqartuussivianit eqqartuunneqarpoq qaammatinilu pineqaatissinneqarsimasunut inissiisarfimmiittussanngortinneqarluni arnaq siniffimmiit natermut naloriukkamiuk, tassanilu niaquatigut tigoriarlugu natermut anaaleruppaa aammalu marloriartumik toqqusassillugu.
Eqqartuussissut Nunatta Eqqartuussisuuneqarfianit oqaatigineqarpoq ulloq 18. oktober 2021.
Unnerluutigineqartoq eqqartuunneqarpoq arnamut pineqartumut nakuusernermut ilaatigut marloriarlugu toqqusassiinermut, niaqua natermut anaarlussimallugu aamma timaatigut assigiinngitsutigut arlaleriarlugu kimmarsimallugu, tassunga ilanngullugu mikileraa napillugu.
Unnerluutigineqartoq siusinnerusukkut pineqaatissinneqarnikuuvoq, tassunga ilaalluni arnamut nakuuserneq.
Tamanna pissutigalugu aamma nakuusernerup annertussusia kiisalu uteqqiisumik iliuuseqaqqinnera pissutigalugu, nunatta eqqartuussisuuneqarfia isumaqarpoq pineqaatissiissut naapertuuttumik sivisussusilerneqarsimasoq tunngavissaqaranilu utaqqisitanngortinneqarnissaa.
Arnap pineqartup eqqartuussisoqarfimmi oqaatigisimavaa taarsiiffigeqqussutinik piumasaqaateqarani.
Unnerluussisussaatitaasup oqaatigivaa arnaq unnerluussisussaatitaasunut saaffiginnissimanngitsoq taarsiiffigeqquneq pillugu. Tamanna tunngavigalugu nunatta eqqartuussisuuneqarfia isumaqarpoq tunngavissaqanngitsoq taarsiiffigeqqussutip malinneqarnissaa.
Eqqartuussisoqarfiup eqqartuussutaa atuuttussanngortinneqarpoq.
Suliap normua: K 204/21