Pinngitsaalineq - K 169/20

Eqqartuussissut Nunatta Eqqartuussisuuneqarfianit oqaatigineqarpoq ulloq 8. februar 2021.

Unnerluussaq Sermersuup eqqartuussiviani eqqartuunneqarpoq ulloq 14. januar 2014 pisuutinneqarluni pinerluttulerinermi inatsit §§ 77, 88, 98, 102, 104, 106, 107, 112 aamma 114 kiisalu angallannermut inatsit § 9, imm. 1, § 13, imm. 3 aamma § 24 pisimasuni 24 immikkoortinneqartut unioqqutissimanerinut.

Nunatta eqqartuussisuuneqarfiata suliami taamaallaat pisimasoq 12 pinngitsaalinermut tunngasoq pinerluttulerinermi inatsit § 77, imm. 1, nr. 1, suliarineqarpoq uppernarsaasiinermut tunngasortaa suliareqqitassanngorneqarnikuummat, sinnerilu suliarineqarput.

Uppernarsaasersuereernermi nunatta eqqartuussisuuneqarfiata uppernarsivaa, unnerluussaq pisuusoq pinerluttulerinermi inatsit § 77, imm. 1, nr.1 naapertorlugu unioqqutitsisimasoq arnaq pineqartoq pinngitsaalisimagamiuk ulloq 21. juli 2009. Taakku tunngavigalugit, nunatta eqqartuussisuuneqarfiata eqqartuussiviup uppernarsaasiinermi inerniliussaa atuuttussanngortippaa pisimasumi tassani.

Maluginiarlugu nalinginnaanngitsumik suliap suliarineqarnerani piffissap atorneqartup sivisunerujussua, unnerluutigineqartup pisuussutigisinnanngisaa, ilanngullugu aalajangiffigineqartussat nassatarisinnaanngilaat pineqaatissiissutip sakkortusineqarnissa tassami eqqartuussaanikuuvoq Venstre Landsrettimi eqqartuussummi ulloq 25. april 2019-meersumi. Pinerluttulerinermi inatsit § 124 naapertorlugu aalajangersarneqarpoq pineqaatissiisoqanngiinnassasoq pisimasuni taakkunani, ullumikkut aalajangiiffigineqartussaasuni.

Maluginiarneqartut qimerlooraanni toqqammavilersuutigineqartoq angallannermi inatsimmiittoq qamutinik motorilinnik ingerlatsisinnaajunnaartitaanissamut inatsit pillugu nunatta eqqartuussisuuneqarfia isumaqarpoq, unnerluussaq qanorluunnit siusinnerusukkut allassimasut ikkaluarpata qamutinik motorilinnik ingerlatsisinnaanermut allagartaajagaasariaqartoq piumasaqaatitaqanngitsumik ukiuni talllimani sivisussuseqartumik. Nunatta eqqartuussisuuneqarfiata matumani pingaartippaa, pineqarmata pisimasut marluk imigassartorsimalluni qamutinik motorilinnik ingerlatsisimanerit aavata imigassartaqassusaa 2,0 promille sinneqqagaa ilanngullugu aalajangiivigineqartussaasoq, aamma unnerluussaq kingullermik Venstre Landsret-mi eqqartuussaasimavoq ulloq 25. april 2019 imigassartorsimalluni qamutinik motorilinnik ingerlatsisimalluni.

Eqqartuussisut aqutsisuata aalajangiineratigut unnerluussisussaatitaasut arnap pineqartup mitagaasimaneranut taarsiissutissatut piumasaqaataat malinneqarpoq 75.000 kr.-nik annertussusilik. Tamatumani maluginiarneqarpoq, eqqartorneqarmat peqqarniitsumik pinngitsaaliisoqarsimammat pinerluuteqartut ataatsikkut marluusimallutik.

Taamaalillugulu eqqartuussiviup eqqartuussutaa atuutsiinnartussaatinneqarpoq. 

Suliap normua: 169/20

Eqqartuussissutit nassuiaatillu