Pineqaarsinneqarsimasunut Inissiisarfimmiittussanngortitaaneq - K 216/20

Eqqartuussissut Nunatta Eqqartuussisuuneqarfianit oqaatigineqarpoq ulloq 12. marts 2021.

Unnerluutigineqartoq aamma niviarsiaraq pineqartoq nassuiaapput atoqatigiissimallutik. Naak unnerluutigineqartup aamma niviarsiaqqap pineqartup nassuiaaneranni qanga atoqatigiinneq pisimanersoq pillugu assigiinngikkaluartut, taamaattoq eqqartuussisuuneqarfiup tunngavigivaa amerlasuutigut assigiimmik atoqatigiissimaneq pillugu nassuiaatigineqartut assigiissuteqarmata - unnerluutigineqartup aamma niviarsiaqqap pineqartup atoqatigiinneq taannarpiaq pillugu nassuiaatigigaat.

Suliami paasissutissani, tassunga ilanngullugu nalunaarutiginninnerup pisimanera ulloq 2. maj 2018, aamma eqqartuussisuuneqarfiup tunngavigivaa, atoqatigiinnerup januarimi 2018-mi pisimanera, niviarsiaqqap pineqartup nassuiaaneratigut, imaanngitsorlu unnerluutigineqartup nassuiaaneratut december 2018-mi pisimasoq.

Unnerluutigineqartup aamma niviarsiaqqap pineqartup nassuiaaneri tunngavigalugu eqqartuussisuuneqarfiup tunngavigivaa taamanikkut unnerluutigineqartup 29-inik ukioqartup niviarsiaraq 13-inik ukioqartoq attavigisimagaa pujortaqatiseralugulu. Taava unnerluutigineqartup niviarsiaqqap taassuma angajuata illuaneeqatigilersimallugu, inuit allat arfinillit sinittut. Sivitsunngitsorlu unnerluutigineqartup siunnersuutigisimagaa atoqatigiinnissaq, niviarsiaqqap itigartitaanik.

Niviarsiaraq nassuiaavoq unnerluutigineqartoq itigartiinnaavissimallugu, kisiannili unnerluutigineqartup ajugaaffigisimagaani siullermik truusiisigut attualaariarlugu kingornatigut qarlii truusiilu peeriarlugit pinngitsaalillugu atoqatigalugu, tamatuma kingunerisaanik anniarnini pissutigalugu qasukkarniarsarisimalluni, annilaangagami annersarneqaqinagami ikiortissarsiorluni nilliasimanani.

Tamatuma saniatigut unnerluutigineqartoq nassuiaavoq niviarsiaraq siullermik itigartitseqqaariarluni kingorna nammineq piumassutsiminik atoqatigisimagaani.

Pissutsit pillugit ataatsimut nalilersuereernermi atoqatigiinneq pillugu aamma illuatungeriit nassuiaatigisaat tunngavigalugit nunatta eqqartuussisuuneqarfianit niviarsiaqqap nassuiaatigisaa pingaartinneqarpoq, tassa piumanngitsoq atoqatigineqarsimasoq aamma piumanani akiussimagaluarluni.

Taamaalilluni eqqartuussisuuneqarfimmit uppernarsineqarpoq unnerluutigineqartoq pisimasumi tamatumani nakuusernikkut imaluunniit siorasaarinikkut niviarsiaraq ajugaaffigisimagaa, pinngitsaalillugulu atoqatigisimallugu.

Paasissutissat tunngavigalugit unnerluutigineqartoq aamma niviarsiaraq tamarmik nunap ilaani tamaanngaaneersupput inukitsunnguami, imminnullu nalunngereersimanerat aamma niviarsiaqqap pissusilersorneratigut eqqartuussisuuneqarfimmi, eqqartuussisuuneqarfiup tunngavigivaa, unnerluutigineqartup ilimanarluinnartumik nalusimassanngikkaa taamanikkut 13-inik ukiulik niviarsiaraq 15-it iniorlugit ikioqartoq.

Taamaalilluni unnerluutigineqartoq pisuutinneqarpoq unioqqutitsinermut pinerluttulerinermi inatsimmi § 77, imm. 1, nr. 1, aamma § 79 tunngavigalugit.

Nunatta Eqqartuussisuuneqarfiata oqaatigivaa, nalilersuinermi pinerluttulerinermi inatsimmi § 79 malillugu eqqartuussuteqartoqarsinnaanera pingaartinneqassanersoq, unnerluussissummi innersuutigineqanngimmat kinaassusersiinermi piumasaqaataasunik unioqqutitsinermi pinerluttulerinermi inatsimmi § 79-mik.    

Unioqqutitsinerit isikkuinik aamma annertussusianik nalilersuereernermi nunatta eqqartuussisuuneqarfiata pineqaatissiissut qaffappaa ukiumi ataatsimi aamma qaammatini qulingiluani pineqaatissinneqarsimasunut inissiisarfimmiittussanngortitsinermik. Tamatumani nunatta eqqartuussisuuneqarfianit pingaartumik isiginiarneqarsimalluni uani pineqartoq tassaammat meeqqamik 15-it inorlugit ukiulimmik pinngitsaaliineq.

Nunatta eqqartuussisuuneqarfianit isumaqatigineqarpoq eqqartuussisoqarfimmit mitagaaneq pillugu aalajangersarneqarsimasoq.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, pineqaatissiineq qaffanneqarluni ukiumi ataatsimi qaammatinilu qulingiluani pineqaatissinneqarsimasunut inissiisarfimmiittussanngortitsinermik.

Mitagaanermut ajunngitsorsiassat aningaasartaat ernialersorneqassapput taarsiissuteqarnissamut akisussaassuseqarnermik inatsimmi § 16 tunngavigalugu.

Suliap normua: K 216/20

Eqqartuussissutit nassuiaatillu