Utaqqisitamik inissiisarfimmiittussanngortinneqarpoq - K 081/21

Eqqartuussissut Nunatta Eqqartuussisuuneqarfianit oqaatigineqarpoq ulloq 12. april 2021. 

Unnerluutigineqartoq eqqartuussisoqarfimmit pisuutinneqarpoq unioqqutitsinermut pinerluttulerinermi inatsimmi § 88, unnerluutigineqartup aappaa peqatigalugu angummut pineqartumut toqqusassiinermut, nunamullu uppiteriarlugu isimmittaanermut aamma tukkaanermut taamatullu aamma unioqqutitsinermut pinerluttulerinermi inatsimmi § 98 tassunga atatillugu angut pineqartoq siorasaarsimallugu.

Unnerluutigineqartup aappaa eqqartuussisoqarfimmi taammaallat eqqartuunneqarpoq angut pineqartoq marloriarlugu isimminneranut unnerluutigineqartoq siulleq peqatigalugu.

Suliaq nunatta eqqartuussisuuneqarfiani suliarineqarpoq sivisussusiliinermi suliareqqitassanngortitatut.

Unnerluutigineqartup pineqaatissinneqarnerani aalajangersaanermi nunatta eqqartuussisuuneqarfianit ataatsimut naliliiffigineqarput pinerluutigineqartup pissusia aamma annertussusia aamma inuttut atugarisai, pissutsinik immikkut ittunik soqanngilaq, eqqartuussisoqarfiup eqqartuussuteqarnerani taassuma 18-it inorlugit ukioqarneranik pinerluttulerinermi inatsimmi § 144, imm. 2, eqqartuunneqarnissaanik pineqaatissinneqarsimasunut inissiisarfimmiittussanngortitsissutaasinnaasumik. 

Nunatta eqqartuussisuuneqarfiata isumaqatigivaa, pinerluttulerinermi inatimmi § 152 malillugu  aalajangersaasimaneq nakkutigisaanissaanik inunnik isumaginnittoqarfimmiit ukiunik marlunnik sivisunerpaaffilikkamik, aamma malinnitsinneqarnissaanut inunnik isumaginnittoqarfiup malinneqqussutaanik.

Nunatta eqqartuussisuuneqarfiata isiginiarlugu pineqaatissiineq pinerluttulerinermi inatsimmi § 152 malillugu paasissutissat malillugit inuttut atugarisaanut atatillugu naleqqunnerpaatut isumaqarfigineqarpoq nutaamik inatsisinik unioqqutitseqqinnginnissaa pinaveersimatinniarlugu , aamma pinerluutigineqartumut tamanna assortuutinngimmat.

Ataatsimut nalilersuereerluni unnerluutigineqartup aappaata pinerluutigisaanik, pisuutinneqarpoq, tassani ilaatinneqarluni eqqartuussaassutigisai isimmitsinerit marluk, uppernarsaaseereernermi nakuusernerup ilaminiinnerimmagu, pineqaatissiissutigisaa qaffaavigineqarpoq ulluni 60-ni pineqaatissinneqarsimasunut inissiisarfimmiittussanngortinneqarnermik. Nunatta eqqartuussisuuneqarfiata sivissussiliinermi sakkukillisaatitut isumaqarfigivaa pingaartillugu unnerluutigineqartup aappaata inuttut atugarisai pitsaasuummata aamma inuusunnera. 

Taasisut marluk taasissutigivaat unnerluutigineqartup aappaanut pineqaatissiissutip utaqqisanngortinneqarnissaa.

Taasisoq ataaseq isumaqarpoq nakuusernerup peqqarniissusia pissutigalugu tunngavissaqanngitsoq pineqaatissiissutip utaqqisitanngortinneqarnissaanut, taasissutigivaalu pineqaatissiisutip utaqqisitanngortinneqannginnissaa. 

Eqqartuussut oqaatigineqarpoq amerlanerussuteqartut isumaat malillugu, taamaalilluni unnerluutigineqartoq siulleq eqqartuunneqarpoq utaqqisitamik ulluni 60-ni pineqaatissinneqarsimasunut inissiisarfimmiittussanngortinneqarluni.

Suliap normua: K 081/21

Eqqartuussissutit nassuiaatillu