Inissiisarfimmiiffissaq ukiunut arfinilinnut sivitsorneqarpoq - K 056/21

Eqqartuussissut Nunatta Eqqartuussisuuneqarfianit oqaatigineqarpoq ulloq 4. maj 2021.

Nunatta Eqqartuussisuuneqarfia eqqartuussisoqarfittulli isumaqarpoq niviarsiaqqap ineqartup nassuiaataa uppernartuusoq. Niviarsiaraq atornerluinerit, tallimat-arfinillit missaannik ukioqarluni aallartittut pillugit sukumiisumik nassuiaateqarpoq. Atornerluinerit ilaatigut kinguaassiuutitigut attuuanninnertut aallartipput niviarsiararlu qulit missaannik ukioqartoq atoqatigiinnernut ingerlaqqillutik. Niviarsiaqqap pisut immikkoortikkuminaatsippai, kisianni atornerluinerit najugaqarfinni sorlerni pisarsimanersut pillugit sukumiisumik nassuiaateqarpoq aamma anaanani bingoriarluni angerlarsimanngikkaangat pisarsimasut. Atualeqqaarnini piffissanilu oqaatigineqartuni najugaqarfigisimasatik aallaavigalugit atornerluinerit qanga pisimanerat oqaatigisinnaasimavaa. Aamma niviarsiaraq qanoq atornerlunneqartarsimanini pillugit naammattumik sukumiissuseqartumik nassuiaateqarpoq. Tamatuma saniatigut niviarsiaqqap nassuiaataa ilaatigut ilisimannittup nassuiaataanit Qeqqanilu napparsimmaviup journalianit taperserneqarpoq. Nunatta Eqqartuussisuuneqarfiata matuma kingorna uppernarsarneqarsimasoraa unnerluutigineqartup niviarsiaraq attuaasarsimagaa aamma atoqatigisarsimagaa, unnerluussissummi allaaserineqartutut.

Niviarsiaqqap nassuiaataa naapertorlugu eqqartuussisuuneqarfiup tunngaviutippaa attuuanninnerit atoqatiginninnerillu niviarsiaraq piumanngitsoq pisarsimasut, aamma unnerluutigineqartup kamassarluni siorasaarerpalullunilu pissusilersortarnera pissutiginerullugu maleruutiinnartarsimasoq, taamatuttaaq niviarsiaqqap anaanami qisuariarnissaanik annilaanganera unnerluutigineqartup atornerlussimavaa. Matuma kingorna eqqartuussisuuneqarfik isumaqarpoq tamanna pinerluttulerinermi inatsimmi § 77, imm. 1, nr. 1, takuuk § 79 naapertorlugu pinngitsaaliilluni atoqatiginninnerusoq aamma ataasiakkaatigut § 77, imm. 1, nr. 3 imaluunniit § 80, imm. 2 unioqqutinneqarsimasut, unnerluussissummi allaaserineqartutut.

Eqqartuussisoqarfiup pisuunermik apeqqut pillugu aalajangiisimanera eqqartuussisuuneqarfiup atuuttussanngortippaa.

Nunatta Eqqartuussisuuneqarfiata pineqaatissiissut qaammatini arfinilinni inissiisarfimmiittussanngortitsinermut aalajangersarpaa.

Atornerluinerit akulikitsumik pisarsimanerat, peqqarniitsuunerat, atornerluinerit aallartimmata niviarsiaqqap ukiui, atornerluinerup sivisuumik ingerlasimanera niviarsiaqqallu naartuleraluarsimanera Nunatta Eqqartuussisuuneqarfiata ingammik pingaartippai. Nunatta Eqqartuussisuuneqarfiata pingaartippaattaaq politikkikkut paatsuugassaanngitsumik kissaateqartoqartoq meeqqamik atornerluineq pillugu suliani pineqaatissiissutissamik sivisussusiliinissaq toqutsineq pillugu suliani pineqaatissiissutaasartunit killilerneqassanngitsoq.

Pineqaatissiinermut tunngavilersuutit oqaatigineqartut tunngavigalugit mitagaanermut taarsiissutit atuuttussanngortinneqarput.

Eqqartuussisoqarfiup eqqartuussutaa atuuttussanngortinneqarpoq ima allannguuserlugu, inissiisarfimmiiffissaq ukiunut arfinilinnut sivitsorneqarluni.

Suliap normua: K 056/21

Eqqartuussissutit nassuiaatillu