15-it inorlugit ukiulimmik pinngitsaaliilluni atoqatiginninneq - K 111/21

Eqqartuussissut Nunatta Eqqartuussisuuneqarfianit oqaatigineqarpoq ulloq 17. maj 2021.

Illuatungeriit piumasaqaataanni pineqartoq tassaavoq uppernarsaasiinermi apeqqut unnerluutigineqartoq nunatta eqqartuussisuuneqarfianit pisuutinneqassanersoq siullertut, unnerluutigineqartoq pisuunersoq unioqqutitsinermut pinerluttulerinermi inatsimmi § 77, imm. 1, nr. 1, tak. § 79 niviarsiaqqamik 13-inik ukiulik pinngitsaalillugu atoqatiginninnermut, pisimasoq 2-mi unnerluutigineqaataani.

Nunatta eqqartuussisuuneqarfianut uppernarsaasiissuteqartoqareerneratigut, tassunga ilaatinneqarluni niviarsiaqqap qularnaatsumik nassuiaataa, tassa atoqatigiinneq pisimasoq, tamanna ilisimannittup takusaanit ikorfartuiffigineqartup, taanna tamatuma kingornatigut piffimmut takkussimammat, naallu nakorsap politiinut uppernarsaatai taamatut imaqaraluartut, eqqartuussisuuneqarfimmit uppernarsineqarpoq atoqatigiinneq unnerluutigineqartup aamma niviarsiaqqap akornanni pisimasoq.

Niviarsiaqqap qularnaatsumik nassuiaareerneratigut aamma eqqartuussisuuneqarfiup uppernartutut isumaqarfigivaa, unnerluutigineqartoq 21-inik ukioqartoq, aalakoorsimanini pissutigalugu pisimasoq pillugu nassuiaateqarsinnaasimanngimmat, 13-inik ukiulik niviarsiaraq taamatut pisoqarnerani nakuuserneq imaluunniit siorasaaneq atorlugu atoqatigisimaneranut.

Taamaalilluni nunatta eqqartuussisuuneqarfiata unnerluutigineqartoq pisimasoq 2-mi unnerluutigineqaataanut pisuutippaa unioqqutitsinermut pinerluttulerinermi inatsimmi § 77, imm. 1, nr. 1, tak. § 79.

Maannakkut eqqartuussutigineqartup pinerluutip pissusia aamma annertussusia pillugit ataatsimut nalilersuiffigereernerani, tassani ilaatinneqarmat pinerluttulerinermi inatsimmi § 88 aamma § 77, imm. 1, nr. 1, tak. § 79 nunatta eqqartuussisuuneqarfiata aalajangigaq allanngortippaa imalillugu, unnerluutigineqaatigineqartoq pineqaatissinneqarluni eqqartuunneqarpoq utaqqisitaanngitsumik ukiumi ataatsimi pineqaatissinneqarsimasunut inissiisarfimmiittussanngortinneqarnermik. Nunatta eqqartuussisuuneqarfianit sakkortusaatitut pingaartinneqarpoq, pineqartoq tassaammat meeqqamik pinngitsaaliineq sakkukillisaataasutullu pingaartinneqarluni piffissaq suliap suliarineqarneranut atorneqarsimasoq, unnerluutigineqartup inuttut atugarisai pitsaasut aamma inuusunnera, aamma pinngitsaalineq niviarsiaraq pillugu nakorsap politiinut uppernarsaataani imarisai malillugit aamma nammineq nassuiaanera malillugu, peqqarniitsutut pissuseqartutut isigineqarsinnaanngimmat.

Ataani oqaatigineqartutut mitagaanermut ajunngitsorsiassat aalajangersaaffigineqarput.

Eqqartuussisoqarfiup eqqartuussutaa imatut allangortinneqarpoq, unnerluutigineqartoq eqqartuunneqarpoq ukiumi ataatsimi pineqaatissinneqarsimasunut inissiisarfimmiittussanngortinneqarluni.

Unnerluutigineqartup niviarsiaqqamut akilissavai 100.000 kr.-it mitagaaneranut ajunngitsorsiassatut.

Suliap normua: K 111/21

Eqqartuussissutit nassuiaatillu