Gå til sidens indhold

Nunatta Eqqartuussisuuneqarfia

24 mar 2022

Nunatta Eqqartuussisuuneqarfia

Qaammatini sisamani inissiisarfimmiittussanngortitaaneq - K 113/21

Angut 21-nik ukiulik eqqartuussivimmi pisuutinneqarpoq arnamut kannguttaalliorfiginnikkami aammalu akerlileeriarsinnanngitsumik pinngitsaaliilluni. Taamaalilluni qaammatini sisamani inissiisarfimmiittussanngortitaanermik eqqartuussaavoq.

Eqqartuussissut Nunatta Eqqartuussisuuneqarfianit oqaatigineqarpoq ulloq 5. maj 2021.

Illersuisoq suliaq utertinneqassasoq titarnermi siullermi eqqartuussisarnermi inatsimmi § 559, imm. 1 naapertorlugu piumasaqaateqarpoq, unnerluutigineqartoq qallunaatut paasineq ajormat unnerluussullu qallunaatut allanneqarsimasoq kalaallisuunngortinneqarsimanngimmat.

Eqqartuussisarnermi inatsimmi § 438 naapertorlugu unnerluussissut suliarineqassaaq imaluunniit nutserneqassaaq oqaatsinut unnerluutigineqartup paasisinnaasaanut. Eqqartuussisarnermi inatsimmi § 441, imm. 2 naapertorlugu unnerluussissut unnerluutigineqartumut nassiunneqassaaq eqqartuussisoqarfimmut nassiunneqarneranut atatillugu.

Paasissutissat pigineqartut tunngavigalugit eqqartuussisarnermi inatsimmi § 438 tunuartinneqarpoq.

Eqqartuussisarnermi inatsimmi § 559, imm. 1 naapertorlugu, tunuartitsineq imaluunniit kukkusumik malittarisassanik atuineq suliap suliarineqarnissaanik suliamik suliareqqitassanngortitami atuutinngilaq, imatut ilimasuttoqarsinnaanngippat, malittarisassap tamatuma malinneqannginnerani suliap allatut inerneqartissinnaaneranik.

Ataatsimut nalilersuereernermi suliami paasissutissanik aamma suliap ingerlasimanerani, tassunga ilanngullugu nassuiaatigineqarsimasut, aamma tunngavigineqartariaqartoq unnerluussissutip unnerluutigineqartumut nutserneqarsimanissaa eqqartuussisoqarfiup suliamik suliaqarneranut atatillugu, eqqartuussisuuneqarfik isumaqarpoq, eqqartuussisarnermi inatsimmi § 438 malinneratigut allatut inerniliisoqarsinnaasimanera isumaqarfigineqarsinnaanngitsoq.

Taamaattumik suliaq utertinneqassanngilaq.

Ataatsimut nalilersuereernermi aamma pinerluutigineqartup pissusia annertussusialu pillugit tunngavissaqanngilaq eqqartuussisoqarfiup pineqaatissinneqarsimasunut inissiisarfimmiittussanngortitsinermi sivisussusiliinerannit sivikinnerusumik sivisussusiliinissaq. Unnerluutigineqartullu inuusunnera aamma pitsaasumik inuttut atugaqarnera tunngavigalugit nunatta eqqartuussisuuneqarfiata isumaqatigivaa eqqartuussutip utaqqisitanngortinneqarsimanera. 

Nunatta eqqartuussisuuneqarfia isumaqarpoq eqqartuussisoqarfiup mitagaanermut ajunngitsorsiassanik aalajangersaasimanera naapertuuttuusoq.

Taamaattumik nunatta eqqartuussisuuneqarfianit eqqartuussisoqarfiup eqqartuussutaa atuuttussanngortinneqarpoq.

 

Suliap normua: K 113/21

Eqqartuussissutit nassuiaatillu