Nakuuserneq - K 047/21

Eqqartuussissut Nunatta Eqqartuussisuuneqarfianit oqaatigineqarpoq ulloq 3. juni 2021.

Suliami nunatta eqqartuussisuuneqarfiata eqqartuussutitut nalilersugassagai taassaapput uppernarsaasiineq unnerluutigineqartup pisuuneranik unnerluussissutip pisimasuani 2-mi aamma 4-mi.

Nassuiaatigineqartut pisimasoq 2-mi unnerluutigineqartumit aamma ilisimannittunit pingasunit nunatta eqqartuussisuuneqarfiata tunngavigivaa, unnerluussissummi oqaatigineqartunut piffissami aamma piffimmi perulluliortoqalersimasoq, unnerluutigineqartut marluk akuullutik. Taakkua nassuiaaneratigut, nassuiaanerillu ikorfartuiffigineqarput pineqartup ajoqusernerinit nassaarineqartunit – naallu unnerluutigineqartoq nassuiaateqaraluartoq – nunatta eqqartuussisuuneqarfiata tunngavigivaa unnerluutigineqartup pineqartoq arlaleriarlugu assamminik eqissimasumik annersarsimagaa uppisillugulu, tassungalu atatillugu taanna iikkamut aporsimalluni. Taamatullu aamma pineqartut nassuiaataat tunngavigalugit eqqartuussisuuneqarfiup tunngavigivaa unnerluutigineqartup matu ilummut isimmissimagaa taamaalillugu matup matserfia qupillugu aamma matuersaaserfia aserorlugu. Oqaatigineqartutut annertutigisumik unnerluutigineqartoq pisuutinneqarpoq pisimasoq 2-mi unnerluutigineqaatiminut unioqqutitsinermut pinerluttulerinermi inatsimmi § 88 aamma § 113.

Pineqartup nukappiaqqap uppernartumik, sukumiisumik aamma ataqatigiissumik nassuiaareerneratigut, tassa piffissami anaanami najuutinnginnerani erniartornini pissutigalugu, unnerluutigineqartumit nakuuserfigineqarsimalluni, nunatta eqqartuussisuuneqarfianit – naak unnerluutigineqartoq misiaraluartoq – tunngavigineqarpoq unnerluutigineqartup unioqqutissimagaa pinerluttulerinermi inatsimmi § 88 nukappiaraq unnerluussissummi pisimasut sisamaanni oqaatigineqartutut nakuuserfigigamiuk.

Pinerluutigineqartup pissusia aamma annertussusia pillugu ataatsimut nalilersuereernermi, tassunga ilanngullugit unnerluutigineqartup pisuutitaanerisa ilaat meeqqamut nakuusernerummat, unnerluutigineqartup immikkut isumassortussaagaluagaanik, aamma isiginiarneqarlutik unnerluutigineqartoq siusinnerusukkut assingusunik pinerluuteqarsimammat aamma sukkasuumik uteqqiasunik, nunatta eqqartuussisuuneqarfianit eqqartuussisoqarfiup eqqartuussutaa allanngortinneqarpoq, pineqaatissiissutip sivisussusilerneqarnera qaffanneqarluni qaammatini arfineq marlunni pineqaatissinneqarsimasunut inissiisarfimmiittussanngortinneqarnermik.

Eqqartuussisoqarfiup eqqartuussutaa allangortinneqarpoq imaalillugu, unnerluutigineqartoq eqqartuunneqarluni qaammatini arfineq marlunni pineqaatissinneqarsimasunut inissiisarfimmiittussanngortinneqarluni.

Suliap normua: K 047/21

Eqqartuussissutit nassuiaatillu