Kannguttaatsuliorneq - K 055/21 + K 137/21

Eqqartuussissut Nunatta Eqqartuussisuuneqarfianit oqaatigineqarpoq ulloq 20. august 2021.

Nunatta eqqartuussisuuneqarfia isumaqarpoq niviarsiaraq sukumiisumik uppernartumillu nassuiaateqarsimasoq, tamanna ikorfartuiffigineqarluni suliami pisut sinnerinit. Nassuiaatigisaa ukiuinut naapertuuppoq, ingasattajaarani aamma ussersornermigut timimigullu pissusilersorneratigut ikorfartuiffigineqarluni. Taamaattumik nunatta eqqartuussisuuneqarfiata uppernarsivaa unnerluutigineqartup unioqqussimagaa pinerluttulerinermi inatsimmi § 84, imm. 1, unnerluussissummi oqaatigineqarneratut eqqartuussisoqarfiullu eqqartuussutaa ulloq 16. november 2020 pisuunermut atatillugu atuuttussanngortinneqarpoq.

Nunatta eqqartuussisuuneqarfia isumaqarpoq arnaq pineqartoq sukumiisumik uppernartumillu nassuiaateqarsimasoq, tamannalu ikorfartuiffigineqarluni suliami pissutsit sinnerinit tassunga ilanngullugit unnerluutigineqartup nammineerluni aamma ilisimannittut sinnerisa nassuiaataannit isummamigut qanoq issimanera sanilliunneqarlutik nassaarineqartut savik, qoorortooq aamma imassat. Tamanna aamma tunngavigalugu nunatta eqqartuussisuuneqarfia isumaqarpoq unnerluutigineqartup ilimagilluinnarsimassagaa qoorortuup imassamik imaqarsinnaanera arnap tungaanut eqikkamiuk. Taamaattumik nunatta eqqartuussisuuneqarfianit uppernarsineqarpoq, unnerluutigineqartup unioqqutikkaa pinerluttulerinermi inatsimmi § 86, imm. 1, tak. § 12, unnerluussissummi ersersinneqartoq aamma eeqartuussisoqarfiup eqqartuussutaa 25. marts 2021-meersoq pisuunermik apeqqut pillugu atuuttussanngortinneqarpoq.

Nunatta eqqartuussisuuneqarfia isumaqarpoq ilisimannittoq sukumiisumik aamma uppernartumik suliamut nassuiaateqarsimasoq, tamannalu ikorfartuiffigineqarpoq ilisimannittut tamarmik eqqartuussisoqarfimmi aamma nunatta eqqartuussisuuneqarfiani nassuiaataannit. Taamaattumik nunatta eqqartuussisuuneqarfianit uppernarsineqarpoq unnerluutigineqartup unioqqutissimagaa pinerluttulerinermi inatsimmi § 98, unnerluussisummi ersersinneqartutut aamma eqqartuussisoqarfiup eqqartuussutaa 25. marts 2021-meersoq pisuunermik apeqqut pillugu atuuttussanngortinneqarpoq.

Pineqaatissiissutissamut atatillugu nunatta eqqartuussisuuneqarfia ataatsimoortitamik sivisussusiliisussaavoq eqqartuussisoqarfiup eqqartuussutaanut 16. november 2020-meersumut aamma 25, marts 2021-meersumut. Inoqammik toqutseriarnermi pineqaatissiisoqartarpoq aallaavittut ukiuni pingasuni pineqaatissinneqarsimasunut inissiisarfimmiittussangortinnermik. Nunatta eqqartuussisuuneqarfia tunngavissarsinngilaq aallaaviup tamatuma sakkortusaaffiginissaanut imaluunniit sakkukillisaaffiginissaanut. Isiginiarneqarluni unnerluutigineqartup unioqqutitsinerata pinerluuttulerinermi inatsimmi § 84, imm. 1 aamma § 98 pissusianik aamma peqqarniissusianik, pineqaatissiissut ataatsimoortitaq aalajangersarneqarpoq ukiuni pingasuni aamma qaammatini pingasuni pineqaatissinneqarsimasunut inissiisarfimmiittussanngortinneqarnermik, tak. pinerluttulerinermi inatsimmi § 84, imm. 1, § 86, imm. 1, tak. § 12, § 98 aamma Qeqqata Kommuniata politiinut ileeqqoreqqusaani § 12, imm. 2 aamma imm. 4 naapertorlugit. 

Nunatta eqqartuussisuuneqarfiata eqqartuussisoqarfiup aalajangigaa atuuttussanngortippaa niviarsiaqqap mitagaanerani ajunngitsorsiassat, tak. taarsiissuteqarnissamut akisussaassuseqarnermik inatsimmi § 26.

Nunatta eqqartuussisuuneqarfianit malinneqarpoq arsaarinnissuteqarnissamut unnerluussisussaatitaasut piumasaqaataat, tak. pinerluttulerinermi inatsimmi § 166, imm. 2.

Unnerluutigineqartoq, unnerluutigineqartoq, eqqartuunneqarpoq ukiuni pingasuni aamma qaammatini pingasuni pineqaatissinneqarsimasunut inissiisarfimmiittussanngortinneqarluni.

Nunatta eqqartuussisuuneqarfiata attuuttussanngortippaa eqqartuussisoqarfiup aalajangigaa niviarsiaqqap mitagaaneranut ajunngitsorsiassat pillugit.

Unnerluutigineqartumit arsaarinnissutigineqarput Marlin Riffel kaliber 22 ataaseq imassartalik (koster nr. 1 aamma 2), Savage riffel kaliber 223 ataaseq magasinertalik (koster 3 aamma 5), kiisalu savik savimineq ataaseq (koster nr. 4).

Suliap normua: K 055/21 & K 137/21

Eqqartuussissutit nassuiaatillu