Nakuuserneq - K 189/20

Eqqartuussissut Nunatta Eqqartuussisuuneqarfianit oqaatigineqarpoq ulloq 24. august 2021.

Nunatta eqqartuussisuuneqarfiata eqqartuussisoqarfik isumaqatigivaa, tassa uppernarsineqartutut isigineqartariaqartoq unnerluutigineqartoq pisuusoq nakuusernermi unnerluussissummi oqaatigineqartutut erseqissaasersorneri malillugit, nakuuserneq pisimasoq peqatigiinnikkut peqatigalugit angutit marluk pinerlineqartoq isimmissimagaa. Nalilersuinermi eqqartuussisuuneqarfiup pingaartumik pingaartippai angutit marluk nassuiaataat kiisalu suliamut nakorsamit paasissutissiissutit.

Pineqaatissiissummik alajangersaanermi sakkortusaatitut isigineqarpoq unnerluutigineqartoq siusinnerusukkut nakuusernermut eqqartuussaanikuummat. Siusinnerusukkut eqqartuussutini pisimasut pineqartut tassaallutik pisimasoq sioqqullugu aamma tamatuma kingornatigut pisimasut, suliami matumani pineqartut. Taamatullu amma sakkorsaatusaatitut isumaqarfigineqarpoq pisimasoq suliami matumani pisimammat unnerluutigineqartoq misiligutaasumik iperagaaqqammersoq siusinneruskkut eqqartuussaassutiminut ilaatigut nakuusernermut.

Pisimasoq suliami matumani pineqartoq piliarineqarsimavoq marts 2018-mi, tassa ukiut sisamaata affaata matuma siornatigut. Tunngavissaqanngilaq ilimagissallugu piffissap suliap suliarneqarnerani sivisusimanera unnerluutigineqartup pisuussutigigaa. Unnerluutigineqartoq ulloq 29. maj 2020 eqqartuunneqarpoq pinerluttulerinermi suliami allami, tassanilu ilaatigut pineqarluni nakuuserneq. Ulloq 29. maj 2020 eqqartuussaassutigisaa tamakkiisumik pillaammik atuissutaareerpoq.

Ataatsimut nalilersuereernermi nunatta eqqartuussisuuneqarfia aalajangerpoq immikkut pineqaatissiisoqassasoq pisimasumut suliami matumani pineqartumut pineqaatissiissutigineqarluni nalunaaquttap akunneri 100-t inuiaqatigiinni sulisitaaneq, taakkualu naammassineqassapput sivisunerpaaffiliussap qaammatit 12-it iluanni, tak. pinerluttulerinermi inatsimmi § 88, tak. §141, imm. 1.

Taamatullu aamma unnerluutigineqartoq pinerluttunik isumaginnittoqarfimmit nakkutigineqassaaq ukiuni marlunni. Nakkutigisaaneq ingerlaannassaaq sulisussaatitaanerup naammaneqareerneratigut, tak. pinerluttulerinermi inatsimmi § 141, imm. 2.

Unnerluutigineqartoq nakkutigisaanermi iluani katsorsagassanngortinneqarpoq imigassamik allakoornartulimmik, aanngaajaarniutinut assigisaanullu atuipilunnermut, pisariaqassappat immikkut suliffimmi tamakkuleriffiusumi imaluunnit Kalaallit Nunaanni napparsimmavissuarmi pinerluttunik isumaginnittoqarfiup aalajangersagai naapertorlugit, tak. pinerluutulerinermi inatsimmi § 141, imm. 2, tak. § 135, imm. 1, nr. 1.

Taamatullu aamma nakkutigisaanermi nalaani atuipilutsinnaveersaartinneqassaaq imigassamut aalakoornartulimmut, aangaajaarniutinut assigisaanullu tak. pinerluttulerinermi inatsimmi § 141, imm. 2, tak. § 136, nr. 1.

Pineqaatissiissumik aalajangersaanermi nunatta eqqartuussisuuneqarfiata pingaartippaa, pineqartoq tassaammat peqqarniitsumik nakuuserneq, inummik allamik peqateqarluni iliuuserineqartoq, unnerluutigineqartorlu siusinnerusukkut inummut ulorianaatilimmik pinerluuteqarnermut pineqaatissinneqarnikuummat, aammalu pisimasoq piliarineqarsimalluni misiligutaasumik iperagaaqqammiinnarluni. Aammalu nunatta eqqartuussisuuneqarfiata pingaartissimavaa suliap matuma naapertuutinngitsumik piffissami sivisuallaami suliarineqarsimanera.

Nunatta eqqartuussisuuneqarfiata isumaqatigivaa eqqartuussisoqarfik, tassa pinerlineqartoq ajoquserneqarnikkut anniaateqarsimaneranut ajunngitsorsiassanik ullunut 7-nut tunineqassasoq. Ajunngitsorsiassat aalajangersarneqarput 2021-imi akit malillugit 1.505 kr.-inut.

Eqqartuussisoqarfiup eqqartuussutaa atuuttussanngortinneqarpoq allannguuserlugu, pineqaatissiissut aalajangersarneqarluni inuiaqatigiinni sulisitaanermik aamma pinerlineqartup ajoquserneqarnikkut anniateqarneranut ajunngitsorsiassat qaffanneqarlutik 1.505 kr.-inut.

Unnerluutigineqartoq pinerluttunik isumaginnittoqarfiup aalajangersaaneratigut inuiaqatigiinni sulisitaassaaq nalunaaquttap akunneri 100-t, sivisunerpaaffiliussap qaammatit 12-it iluanni naammassineqartussamik.

Taamatullu aamma unnerluutigineqartoq pinerluttunik isumaginnittoqarfimmit nakkutigineqassaaq ukiuni marlunni. Nakkutigisaaneq ingerlaannaaq sulisussaatitaaneq sivisunerpaaffiligaq naammassineqareerpat.

Unnerluutigineqartoq nakkutigineqarnerup nalaani atuipilunnermut katsorsarneqassaaq imigassamut aalakoornartulimmut, aangaajaarniutinut assigisaanullu, pisariaqassappat immikkut suliffimmi tamakkuleriffiusumi imaluunnit Kalaallit Nunaanni napparsimmavissuarmi pinerluttunik isumaginnittoqarfiup aalajangersagai naapertorlugit.

Nakkutigineqarnermi nalaani atuipilutsinnaveersaarneqassaaq imigassamut aalakoornartulimmut.

Suliap normua: K 189/20

Eqqartuussissutit nassuiaatillu