Aningaasarsiaqarani 40 tiimit inuiaqatigiinni sulisitaanissamik - K 195/20

Eqqartuussissut Nunatta Eqqartuussisuuneqarfianit oqaatigineqarpoq ulloq 17. september 2021.

Unnerluunneqartup Qeqqata Eqqartuussisoqarfianit eqqartuunneqarpoq ulloq 1. september 2020 utaqqisitamik ullut 40-t pineqaatissinneqarsimasunut inissiisarfimmiittussanngortinneqarluni marloriarluni tillinniarnermut aamma marloriarluni tillitanik atuinermut (pisimasimasut 1-4). Taamatullu aamma unnerluunneqartup pinngitsuutinneqarluni tillitanik atuinerit allat marluk  aamma imigassamik aalakoornartulimmik imersimalluni ingerlatsinerit marluk (pisimasut 5-8). Nunatta eqqartuussisuuneqarfiani suliaq suliarineqarpoq sivisussusiliinermik suliareqqitassanngortitatut pisimasunut 1-4 aamma uppernarsaasiilluni suliareqqitassanngortitatut pisimasuni 5-8.

Unnerluutigineqartup nassuerneratigut, tamannalu ikorfartuiffigineqarpoq suliami paasissutissat sinnerinit, tassunga ilaatigullu pingaartumik politiassistent Patrick Abrahamsenip nassuiaataa, eqqartuussisuuneqarfik isumaqarpoq uppernarsineqartoq unnerluutigineqartoq pisuusoq unnerluutigineqaatimisut.

Taamaalilluni unnerluutigineqartoq pisuutinneqarpoq Toyota Hilux-mik aamma ATV-mik tillissimanermut, taamatullu aamma pisuutinneqarluni angallatit taakkua marluk ingerlassimagai imigassamik aalakoornartulimmik minnerpaamik 1,54 promille-mik aanni akoqartoq. 

Unnerluutigineqartup inuttut atugarisaanut paasissutissat pitsaalluinnartuusut isiginiarneqarlutik, tassunga ilanngullugit paasissutissat, inuussutissarsiutigalugu aalisartutut ilinniakkaminik naammassinnissimanera aamma Kangerlussuarmiit nuussimanera, imigassamillu aalakoornartulimmik atuinini appartissimammagu, eqqartuussisut isumaqarput pineqaatissiineq inuiaqatigiinni sulisitaanermik eqqartuussuteqarneq naapertuuttuusoq.

Pissutsillu imaannerat, pisimasut arlallit ataatsikkut pineqaatissiissuteqarfigineqartussaallutik,  tamatuminnga allannguutaanngilaq. 

Taamaattumik unnerluunneqartoq aningaasarsiaqaatiginagu sulisitaassaaq nalunaaquttap akunneri 40-t qaammatit sivisunerpaaffiliussat sisamat iluanni naammassineqartussamik.  Taamatullu aamma unnerluussaasoq Pinerluttunik Isumaginnittoqarfimmit nakkutigineqassaaq piffisami ukiumik ataatsimik sivisussulikkami, tak. Pinerluttulerinermi inatsimmi §  141, imm. 1 aamma 2. 

Tamatuma saniatigut unnerluussaasoq eqqartuunneqarpoq akiligassinneqarluni 34.000 kr.-inik tak. aqqusinertigut angallannermi inatsimmi § 9 aamma pinerluttulerinermi inatsimmi § 102, tak. § 127, imm. 2 aamma 3. Akiligassinneqarnermi aalajangersaanermi nunatta eqqartuussisuuneqarfiata aallaavigivai unnerluutigineqartup isertitaanut tunngasut piffissami pinerliiviusup nalaani aamma aningaasatigut iluanaaruteqarnera pisimasoq 4-mi ATV-p tuniniarnerani.

Isiginiarneqarluni unnerluutigineqartoq marloriarluni qamummik motorilimmik ingerlatsisimanera promille-qarluni 1,20 sinnerlugu ingerlatsisinnaanermut akuersissummik arsaarinnissuteqarfigineqarpoq ukiumi ataatsimi aamma qaammatini arfinilinni ulloq eqqartuunneqarfik aallarnerfigalugu.

Unnerluutigineqartoq ullut 14-it qaanngiutsinnagit taarsiissutitut akilissavai katillugit  15.743,78 kr. -it.

Suliap normua: K 195/20

Eqqartuussissutit nassuiaatillu