Gå til sidens indhold

Nunatta Eqqartuussisuuneqarfia

20 mai 2022

Nunatta Eqqartuussisuuneqarfia

Tillinniarneq, ujajaaneq kannguttaatsuliornerlu - K 159/21

Angut 24-nik ukiulik Sermersuup eqqartuussivianit eqqartuunneqarpoq ukiuni pingasuni pineqaatissinneqarsimasunut inissiisarfimmiittussanngortinneqarluni. Mario Nuko piumasaqaateqarpoq suliami pisimasoq 9-mi pinngitsuutinneqarnissamik sinnerinilu sakkukillisaaffigineqarnissamik.

Eqqartuussissut Nunatta Eqqartuussisuuneqarfianit oqaatigineqarpoq ulloq 20. september 2021.

Suliami pisimasunik ataatsimut nalilersuereernermi eqqartuussisuuneqarfik isumaqarpoq, unnerluutigineqartumut pineqaatissiissut aalajangersarneqartariaqartoq ukiuni marlunni aamma qaammatini qulingiluani pineqaatissinneqarsimasunut inissiisarfimmiittussanngortinneqarnermik. Nunatta eqqartuussisuuneqarfianit taamatut aalajangersaanermi annertuumik pingaartippaa, pineqartut taassammata ilaatigut ujajaanerit marluk inuinnaat angerlarsimaffianni kiisalu tillinniarnerit aamma iserterluni tillinniarnerit, aamma pisimasut arlallit peqatigiilluni piliarineqarsimallutik, aamma unnerluutigineqartoq siusinnerusukkut assingusumik pinerluuteqarnermut pineqaatissinneqartareernikuunera.

Eqqartuussisoqarfiup tunngavittut oqaatigisimasai nunatta eqqartuussisuuneqarfiata isumaqatigivai, tassa unnerluutigineqartoq2-mut pineqaatissiissutip aalajangersarneqarnera ukiumi ataatsimi aamma qaammatini pingasuni pineqaatissinneqarsimasunut inissiisarfimmiittussanngortinneqarluni, taamaallilluni   eqqartuussisoqarfiup eqqartuussutaata ilaani tassani atuuttussangortitsisoqarluni.

Taarsiissuteqarnissamut akisussaassuseqarnermik inatsimmi § 26 malillugu mitagaanermi piumasarineqarsinnaavoq allap kiffaanngissusianik, ataqqinassusianik inatsisinut akerliusumik kannguttaatsuliorfiginninnermi ajunngitsorsiassaliisarneq. Periuseq malillugu piumasaqataavoq iliuuserineqartup immikkut ittumik naapertuilluanngitsuliorfiginninnerusimanissaa.

Nunatta eqqartuussisuuneqarfia isumaqarpoq, kannguttaatsuliorfiginninneq unnerluutigineqartup pisuutaaffigisaa niviarsiaraq pineqartoq pillugu, imatut pissuseqanngitsoq, piginnaatitsilluni mitagaanermut ajunngitsorsialiinissamut. Tamatumani eqqartuussisuuneqarfiup pingaartippaa, pineqartoq tassaammat atisat qaavisigut uppatikkut attuaaninneq. Pissutsillu imaannerat, kanngutaatsuliorfiginninnermi meeqqap 12-inik ukioqarnera allatut inerniliissutaasinnaanngilaq.

Taamaattumik tamanna tunngavigalugu unnerluutigineqartoq mitagaanermi piumasaqaammut pinngitsuutinneqarpoq.

Qulaani allannguutit oqaatigineqartut allannguutigalugit eqqartuussisoqarfiup eqqartuussutaa atuuttussanngortinneqarpoq.

Eqqartuussisoqarfiup eqqartuussutaa imatut allanngortinneqarpoq, unnerluutigineqartoq pineqaatissinneqarpoq ukiuni marlunni aamma qaammatini qulingiluani pineqaatissinneqarsimasunut inissiisarfimmiittussanngortinneqarluni, aamma mitagaanermut piumasaqaammut pinngitsuutinneqarpoq.

Sinnerini eqqartuussisoqarfiup eqqartuussutaa atuuttussanngortinneqarpoq.

 

Suliap normua: K 159/21

Eqqartuussissutit nassuiaatillu