Gå til sidens indhold

Nunatta Eqqartuussisuuneqarfia

14 dec 2022

Nunatta Eqqartuussisuuneqarfia

Qaammatini 3-ni pineq. inissiisarfimmiittussanngortinneqarpoq - K 136/22

Angut 17-nik ukiulik eqqartuunneqarpoq ulluni 60-ni eqqartuunneqarsimasunut inissiisarfimmiittussanngortinneqarnermik, meeqqamik 15-it inorlugit ukiulimmik kinguaassiuutaatigut atoqatiginninneq aammalu meeqqamik 15-it inorlugit ukiulimmik pinngitsaaliilluni atoqatiginninneq pillugu.

Eqqartuussissut Nunatta Eqqartuussisuuneqarfianit oqaatigineqarpoq ulloq 12. december 2022.

Pisimasoq 1 pillugu

Uppernarsaasiisoqareerneratigut nunatta eqqartuussisuuneqarfianit eqqartuussisoqarfiup uppernarsaasiinermi naliliinera isumaqatigineqarpoq aamma eqqartuussisoqarfiup tunngavilersuutaanut atatillugu.

Pisimasoq 2 pillugu

Uppernarsaasiisoqareerneratigut, pingaartumik niviarsiaqqap nassuiaaneranit, sanilliunneqarluni nakorsap politiinut uppernarsaataa, nunatta eqqartuussisuuneqarfia isumaqarpoq, unnerluutigineqartup timimigut aamma tarmigut nukittunerunini inissisimanini nakuusertutullu pissusilimmik niviarsiaraq 14-inik ukiulik pinngitsaalillugu atoqatigisimallugu ilaannakortumik taliisigut qajannaaqqaneratigut, taanna atisaajariarlugu timimi oqimaassusia atorlugu siniffimmut naqiussimallugu, taamaalilluni nikuisinnaajunnaarsillugu, nakorsallu politiinut uppernarsaataani allassimasunik ajoqusernernik tamanik kingulimmik.

Naak niviarsiaraq annikitsuinnarmik timimigut akiuussimagaluartoq, aamma naak oqaatsit atorlugit piumanngissimanngikkaluartoq, unnerluutigineqartup paasisimassavaa, atoqatigerusunngikkaani, aallartinneranili assani peertinneqarmata. Isiginiarneqarluni unnerluutigineqartup atoqatiginninnini ingerlatiinnarsimagaa, naak nalunngikkaluarlugu anniartoq ilaqarnikuunngitsorlu, taamaalinerani paasisimassavaa piumanngitsoq pinngitsaaliisoqartoq.

Unnerluutigineqartoq niviarsiaqqap ania ilisarisimavaa, nalunagulu niviarsiaraq imminit ukiualunnik nukarliusoq. Taamaattumik, aamma piffissami tamatumani pasineqarmat meeqqamik 15-it inorlugit kinguaassiutitigut atoqatiginninnermut, tassanilu tamannaluunniit immikkut mianersulersitsisimanngimmat, eqqartuussisuuneqarfik isumaqarpoq nalusimassanngikkaluaraa niviarsiaraq 15-it inorlugit ukioqartoq.

Taamaalilluni unnerluutigineqartoq pisuutinneqarpoq unnerluutigineqaatini naapertorlugu imatut allannguuserlugu, siullermik niviarsiaraq siniffimmut naqiussimallugu atisaajareernerata kingornatigut.

Pineqaatissiissut pillugu

Pinngitsaaliinermi eqqartuussisoqartarpoq utaqqisitaanngitsumik pineqaatissinneqarsimasunut inissiisarfimmiittussanngortinneqarnermik.

Tamatuminnga sivisussusiliinermi sakkortusaatitut pingaartinneqarpoq, unnerluutigineqartoq meeqqamik 15-it inorlgit ukiulimmik pinngitsaaliilluni atoqateqarsimammat, meeqqamut allamut 15-it inorlugit ukiulimmut atoqatiginnissimasutut pasisaalereerluni. Sakkukillisaatitut pingaartinneqarpoq, uani pineqarmat sakkukinnerusumik pinngitsaaliineq annikitsuinnarmik siunertaasimasoq, unnerluutigineqartoq 16-nik aamma 17-nik ukioqarsimalluni pisimasut piliarineqarmata, aammalu siusinnerusukkut pineqaatissinneqarnikuunani, aamma 2017-mi 13-nik ukioqarluni inuttut sakkortuumik misigisaqarnermigut kingunerlutsitsisimammat, umiiarnermi kisiartaalluni annattutuaasimalluni, tassani arni ataatassanilu annaallugit, tamannalu suli katsorsagaassutigisimanagu.

Tamakkua tunngavilersuutit immikkuullarissut tunngavigalugit unnerluutigineqartoq eqqartuunneqarpoq utaqqisitaanngitsumik qaammatini pingasuni pineqaatissinneqarsimasunut inissiisarfimmiittussanngortinneqarluni kingornalu piumasaqaatitalimmik pinerluttunik isumaginnittoqarfimmit ukiuni marlunni nakkutigineqassalluni, tassa unnerluutigineqartoq pinerluttunik isumaginnittoqarfiup aalajangersagai naapertorlugit tarnimigut katsorsarneqassaaq, tak. Pinerluttulerinermik inatsimmi § 144, imm. 1, tak. 145, imm. 1, tak. § 135, imm.1, nr. 3 inatsimmi tamatumani unioqqutitaminut § 79 aamma § 77, imm. 1, nr. 1, tak. § 79.

Mitagaanermi ajunngitsorsiassat

Niviarsiaqqap aappaanut atatillugu eqqartuussisoqarfiup aalajangiinera atuuttussanngortinneqarpoq.

Niviarsiaqqamut atatillugu periuseq malillunneqarluni 100.000 kr.-inut aalajangersarneqarpoq.

Unnerluutigineqartoq eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni. Tamatumalu kingornatigut pinerluttunik isumaginnittoqarfimmit nakkutigineqassaaq ukiuni marlunni, pinerluttunillu isumaginnittorqarfiup aalajangigaanik nakkutigineqarnerup nalaani tarnimigut katsorsagaatinneqassalluni.

Unnerluutigineqartup niviarsiaqqap aappaata mitagaaneranut ajunngitsorsiassatut akilissavai  20.000 kr.-it.

Unnerluutigineqartup niviarsiaqqap mitagaaneranut ajunngitsorsiassaatut akilissavai 100.000 kr.-it.

 

Suliap normua: K 136/22

Eqqartuussissutit nassuiaatillu