Eqqartuussut allannguuserlugu atuuttussanngortinneqarpoq - K 306/21

Eqqartuussissut Nunatta Eqqartuussisuuneqarfianit oqaatigineqarpoq ulloq 28. februar 2022.

Unnerluutigineqartoq eqqartuunneqarpoq unioqqutitsinernut pinerluttulerinermi inatsimmi § 113 (pigisamik aseruineq), § 65 (ikuallatitsineq) aamma § 37 (pisortat oqartussaatitaannik narrunarsaaneq).

Unnerluussisussaatitasoq aamma illersuisoq tamarmik piumasaqaateqarput unnerluutigineqartoq eqqartuunneqassasoq katsorsarneqarnermik pinerluttulerinermi inatsimmi § 157 malillugu. Taamatullu isumaqarneq nakorsanit paasissutissiissutinit ikorfartuiffigineqarluni. Pinerluttulerinermi inatsimmi § 158, imm- 2-mi ersersinneqarpoq, nalinginnaasumik aalajangersaasoqassanngitsoq sivisussusiliinermik pineqaatissiisoqarpat pinerluttulerinermi inatsimmi § 157 malillugu, eqqartuunneqartoq ikuallatitsinermi pisuuppat. Taamaattumik eqqartuussisoqarfiup oqaatigisaasaa sinneri malillugit, nunatta eqqartuussisuuneqarfiata eqqartuussisoqarfik isumaqatigivaa unnerluutigineqartoq eqqartuunneqassasoq katsorsagaanermik eqqartuunneqarnermik aalajangersimasumik sivisunerpaaffiligaanngitsumik, tak. pinerluttulerinermi inatsimmi § 157 aamma § 158, imm. 2.

Taamatullu aamma eqqartuussisuuneqarfik isumaqarpoq, angerlartitsnermi piumasaqaatitaliunneqartut unnerluussisup aamma illersuisup piumasaqaateqarnerattut atuutissasut. Tamatumani eqqartuussisuuneqarfiup pingaartippaa, nakorsap oqaaseqaataani ersersinneqarmat, unnerluutigineqartoq piffissap ilaani imigassamik aalakoornartulimmik atuipiluffeqartartoq. Aamma hashimik atuipiluttuusartoq, aamma unnerluutigineqartup nappaataata pisariaqartimmagu ulluinnarni ikorfartorneqarnissaa, tamanna ikiorsiiffigineqarsinnaalluni unnerluutigineqartup ulloq unnuarlu sulisoqarfiusumi najugaqatigiiffimmi najugaqartinneqarneratigut, tak. pinerluttulerinermi inatsimmi § 157, imm. 2, tak. § 133, imm. 2. aamma 135, imm. 1, nr. 1.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, piumasaqaatitaliunneqarlutik ilanngunneqassapput, angerlartitsinermi makkua atuutissallutik:

• Pinerluttunik isumaginnittoqarfiup najugaqarnermut suliffeqarnermullu tunngatillugu aalajangersagaanik nakkutigisaanerup nalaani malinneqqusaasoqassalluni, aamma
• Peqquneqarluni pinerluttunik isumaginnittoqarfiup ersarinnerusumik aalajangiinera malillugu imigassamik aalakoornartulimmik, aangaajaarniutinut imaluunniit assigisaanut katsorsagaassalluni

Suliap normua: K 306/21

Eqqartuussissutit nassuiaatillu