Eqqartuussisoqarfiup eqqartuussutaa atuuttussanngortinneqarpoq - K 283/21

Eqqartuussissut Nunatta Eqqartuussisuuneqarfianit oqaatigineqarpoq ulloq 10. februar 2022.

Suliaq nunatta eqqartuussisuuneqarfianit sivisussusiliilluni suliareqqitassanngortitatut suliarineqarpoq. Unnerluutigineqartoq eqqartuussisoqarfimmit eqqartuunneqarpoq unioqqutitsinermut aqqusinertigut angallannermi inatsimmik § 23, imm. 1, tak. § 29, imm. 3 aamma § 13, imm. 1, ingerlatsinermini biilimik ingerlatsinissamut akuersissummik tigumiaqarsimanani, biililu ingerlassimallugu minnerpaamik 57 km/t sukkassuseqarluni, naak aqqusinertigut angallannermi tavlip takutikkaluaraa sukkassutsip 30 km/t qaangissanngikkaa, taamaalilluni sukkassutsimik qaanginneq 90%-iulluni.

Nunatta eqqartuussisuuneqarfiata eqqartuussisoqarfik isumaqatigivaa, tassa kukkuluttornermut akiligassiissut aalajangersarneqassasoq 5.500 kr.-inut.

Aallaaviusarpoq unnerluutigineqartup utaqqisitaanngitsumik biilimik ingerlatsisinnaanermut akuersissussummik arsaarinnissuteqarfigineqartarnera, tak. aqqutsinertigut angallannermi inatsimmi § 60, imm. 1, nr. 4, tassami unnerluutigineqartup utaqqisitamik ingerlatsisinnaanermut akuersissummik arsaagaaffiup ingerlanerani, nutaamik unioqqutitseqqissimammat.

Unnerluutigineqartup atuuttussanngortippaa pissutsinik sakkukillisaataasinnaasunik peqartoq, suli immikkut ittumik utaqqisitanngortitsissutaasinnaasumik, tak. aqqusinertigut angallannermi inatsimmi § 60, imm. 2. Unnerluutigineqartup tamatumunnga tapersiutitut innersuussutigivaa siusinnerusukkut eqqartuussut takkutinngitsoornermi eqqartuussutaammat, tassanilu pissutsinik immikkut ittunik pisoqarsimalluni, tassunga ilanngunneqarluni ilaqutariit iluanni toqukkut qimaguttoqarnera, aamma ingerlatsisinnaanermut allagartaq akuersissut pisariaqartikkamiuk suliami suliarisinnaanissaanut ilaquttamilu ikiorsinnaanissaanut, tassunga ilanngullugu anaanani puiguttortunngorsimasoq. Aamma unnerluutigineqartup innersuussutigivai kalaallini pissutsitit immikkut ittut.

Nunatta eqqartuussisuuneqarfia isumaqanngilaq periuseq malillugu pissutsit immikkut ittut patsisigineqarsinnaanerat sakkukillisaatitut, immikkullu ittumik tunngavissaqarnera aqqusinertigut angallannermi § 60, imm. 2 tunngavigalugu biilersinnaanermut allagartap akuersissutip arsaarinnissutigineqarnissaanut utaqqisitanngortitsinissami. Taamaattumik unnerluutigineqartoq utaqqisitaanngitsumik ingerlatsisinnaanermut akuersissummik arsaarneqassaaq. Arsaarinninnermilu piffissaliunneqartoq naapertuuttumik aalajangersarneqarsimavoq.

Taamaattumik nunatta eqqartuussisuuneqarfianit eqqortuussisoqarfiup eqqartuussutaa atuuttussanngortinneqarpoq.

Eqqartuussisoqarfiup eqqartuussutaa atuuttussanngortinneqarpoq.

Suliami aningaasartuutit naalagaaffiup karsianit akilerneqassapput, taamaattoq imaalillugit, unnerluutigineqartup illersuisutut toqqakkamut aningaasartuutit nammineerluni akilissavai.

Suliap normua: K 283/21

Eqqartuussissutit nassuiaatillu