Aningaasarsiaqartinneqarani inuiaqatigiinni sulisitaassasoq - K 281/21

Eqqartuussissut Nunatta Eqqartuussisuuneqarfianit oqaatigineqarpoq ulloq 18. februar 2022.

Unnerluutigineqartoq eqqartuussisoqarfimmit pisuutinneqarpoq pinerluttulerinermi inatsimmi § 88 (nakuusernermut aamma § 96, nr. 1 (angerlarsimaffimmi eqqissiviilliortitsinermut) ullormi 20. april 2020 pisussaanani inissiamut Christian xx-ip App. xxx Sisimiuniittumut isersimagami, tassanilu angut isassimallugu, angut ajoquserneqalersillugu.

Suliaq nunatta eqqartuussisuuneqarfiani pineqaatissiissutip sivissussusilerneqarneranut apeqqut pineqarpoq.

Unnerluutigineqartup inuttut atugarisaanut atatillugu, tassunga ilanngullugit assingusumik pinerluuteqarsimanermut eqqartuussutip 2013-meersuunera, piffissaq suliap suliarineqarsimaneranut atorneqartoq, kiisalu nakuusernerup annertussusia aamma peqqarniissusia, tassunga ilanngullugu nakuusernermi taamaallaat annikitsuinnarmik ajoqusiiffiusimanera aamma ataasiaannartumik iliuusiulluni, nunatta eqqartuussisuuneqarfia isumaqarpoq pineqaatissiissut aalajangersarneqarsinnaasoq nalunaaquttap akunneri 60-it inuiaqatigiinni sulisitaanermik, naammassineqartussamik sivisunerpaaffiliussap qaammatit arfinillit iluanni, tak. pinerluttulerinermi inatsimmi § 88, uniffik siulleq aamma § 96, nr. 1, tak. § 141, imm. 1.

Unnerluutigineqartoq Pinerluttunik Isumaginnittoqarfimmut nakkutigisassanngortinneqarpoq ukiumi ataatsimi, tak. pinerluttulerinermi inatsimmi § 141, imm. 2.

Nunatta eqqartuussisuuneqarfiata pineqaatissiissummik aalajangersaanermini pingaartippaa, unnerluutigineqartup inuttut atugarisai naapertorlugit nalilerneqarmat naleqquttutut inuiaqatigiinni sulisitaanissami, aamma nakuuserneq angerlarsimaffimmi eqqissiviilliortitsinermut atatillugu pisimammat, unnerluutigineqartoq pisussaanani pinerlineqartup inaanut isersimammat kiisalu aamma unnerluutigineqartoq siusinnerusukkut pillagaasareernikuummat, eqqartuussisuuneqarfik isumaqarpoq utaqqisitamik pineqaatissiinissaq naammanngitsoq suliap ilungersunartuunera pissutigalugu, taamaattumik unnerluutigineqartoq eqqartuunneqarpoq inuiaqatigiinni sulisitaanermik tak. § 140.

Eqqartuussisoqarfiup eqqartuussutaa allanngortinneqarpoq imaalillugu, unnerluutigineqartoq eqqartuunneqarpoq nalunaaquttap akunneri 60-it aningaasarsiaqartinneqarani inuiaqatigiinni sulisitaassasoq, naammassineqartussamik sivisunerpaaffiliussap qaammatit arfinillit iluanni. Unnerluutigineqartoq aamma ukiumi ataatsimi pinerluuteqarsimasunut nakkutilliisoqarfimmit nakkutigineqassaaq.

Suliap normua: K 281/21

Eqqartuussissutit nassuiaatillu