17 febr 2022
Nunatta Eqqartuussisuuneqarfia
Nunatta Eqq. unnerluutigineqartoq pinngitsuutippaa - K 279/21
Arnaq 35-nik ukiulik eqqartuunneqarpoq qaammatini arfinilinni pineqaatissinneqarsimasunut inissiisarfianniittussanngortitaagami, pisussaanani arnap allap inaannut iserluni arnaq imigassartorsimanini tunngavigalugu iliuutsimut akerlileeriarsinnaanngitsoq kinguaassiutitigut atoqatigigamiuk.
Eqqartuussissut Nunatta Eqqartuussisuuneqarfianit oqaatigineqarpoq ulloq 17. februar 2022.
Eqqartuusseqataasut marluk isumaqarput qularnaatsumik uppernarsineqanngitsoq eqqartuussutigineqarsinnaasumik unnerluutigineqartup siunertarisimaneraa imminut ikioriarsinnaanngitsumik pinngitsaaliinissani. Eqqartuuseqataasut taakkua pingaartumik pingaartippaat arnap pineqartup nassuiaanermini akunnattuungasutut pissuseqarnera, tamannalu pissuteqarsorineqarluni nassuiaataanut ullut arlallit pisimasup pineqartup nalaani aalakoorsimanera. Unnerluutigineqartup suliap suliarineqarnera tamaat aalajangiusimavaa atoqatigiinneq nammineq piumassutsimik pisimasoq, tamannalu ikorfartuiffigineqarluni atoqatigiinnerup aqaguani arnaq pineqartoq attavigisimammagu allaffigalugu kajumissaarilluni pisimasoq pillugu oqaloqatigiissinnaallutik, siullermillu arnap ajorisimanngeriarlugu, kingorna aalakoorunnaarami aliasulaalersimanera. Aatsaallu pisimasup kingornatigut ullut sisamat qaangiunneratigut arnap malugitissimallugu qanoq pisimasoq nuanniilliuutigitigalugu.
Eqqartuusseqataasoq ataaseq isumaqarpoq naak arnaq akunnattuungalluni pisut pillugit pissuseqaraluarluni pisup tungaanut kingornalu, aalajangersimasumik allanngortitaqaranilu nassuiaateqartoq piffissakkut qaqugukkulluunniit oqaatiginikuunagu unnerluutigineqartup kinguaasiutitigut atoqatiginissaa. Tamannalu nassuiaanera ikorfartuiffigineqarpoq unnerluutigineqartup nassuiaaneranit, tassa pisimasoq taanna sioqqullugu atoqatigiinnissaq pillugu oqaloqatigiinnikuunatik. Taamatullu aamma tamanna ikorfartuiffigineqarluni arnap nassuiaaneranit, tassa nammineq eqqumasimanani unnerluutigineqartup atoqatigaluni aallartimmani, aamma unnerluutigineqartoq nassuiaammat arnaq atoqatigiinnermi nalaani itertutut pissuseqarsimasoq. Eqqartuusseqataasoq taanna isumaqarpoq eqqarsarnartoqanngitsoq unnerluutigineqartup nassuiaanera qaangiinnarneqarsinnaasutut, nassuiaammat arnaq atoqatigiinnissamik aallartittuusimasoq, nassuiaaneq taanna aatsaat saqqummermat nunatta eqqartuussisuuneqarfiani pingaarnertut isumaqatigiinniarneq aallartereersoq aamma suliami uppernarsaatitut saqqummiunneqartunit ikorfartuiffigineqanngimmat.
Amerlanerussuteqartut isumaat malillugu eqqartuussut oqaatigineqarpoq, taamaattumillu unnerluutigineqartoq pinngitsuutinneqarluni.
Suliap normua: K 279/21
Eqqartuussissutit nassuiaanerillu