Nutaamik pineqaatissiissummik aalajangersaasoqassanngilaq - K 291/21

Eqqartuussissut Nunatta Eqqartuussisuuneqarfianit oqaatigineqarpoq ulloq 22. februar 2022.

Unnerluutigineqartoq nassuiaavoq Kommuneqarfik Sermersuumit isumaginninnermi ikiorsiissutit 32.353,28 kr. tigunikuullugit.

Kommuneqarfik Sermersuup paasissutissiissuta 27. januar 2020-meersut (ilanngussaq 1.16) naapertorlugu, nunatta eqqartuussisuuneqarfiata tunngavigivaa, unnerluutigineqartoq erninerminut atatillugu sulinngiffeqarsimasoq piffissami januarimiit junimut 2016-mi, piffissamilu tamatumani erninermusianik pisartagaqarsimalluni. Aamma ilanngussami tassannga ersersinneqarpoq unnerluutigineqartoq juli 2016-miit pisortat ikiorsiissutaannik pisartagaqalersimasoq, aamma piffissami julimiit decemberimut 2016-imi pisinnaatitaaffiginngisani tigusimagai 21.910,18 kr.-it.

Unnerluutigineqartup nassuiaareerneratigut nunatta eqqartuussisuuneqarfiata tunngavigivaa, piffissami julimiit 2016-ip naanerata tungaanut blok D-mi najugaqarsimasoq meeqqat angutaat najugaqatigalugu. Taamatullu nammineq nassuiaanera naapertorlugu tunngavigineqarpoq, ilaqutariit piffissami sivisuumi 2016 sioqqullugu aningaasanik annertuunik ileqqaagaqarsimasut, taakkua ileqqaakkat isertitaneersuupput, ilaqutariit ilaatigut Oddset-ertarnerannit aamma neqitsersuimik suliaqarnermi aningaasarsiaaneersuullutik.

Unnerluutigineqartup nammineerluni nassuiaanera naapertorlugu eeqartuussisuuneqarfiup aamma tunngavigivaa, kommune nalunaaruteqartarsimanngitsoq ileqqaakkanik imaluunniit aningaasarsiaqarnikkut isertitanik, naak februar 2015-mi atsiorsimagaluarlugu ilumoorluinarluni nalunaarut, kommunemut oqaatigissallugit ilaatigut aningaasaqarnikkut pissutsit, tassunga ilanngullugit paasissutissat suliffeqalernermi imaluunniit allatut pisuussutinik pissarsiat. Nalunaarusiami tamatumani oqarfigineqarpoq pisussaaffeqartoq kommune nalunaarutiginninnissamik inuttut atukkatigut allanngortoqarneratigut, kinguneqartitsisinnaasumik pisortat ikiorsiissutaasa annikillineqarnissaanik imaluunniit atorunnaarsinneqarnissaanik.

Taamaammat kommunip paasissutissiineratigut tunngavigineqartariaqarpoq, unnerluutigineqartoq pisortat ikiorsiissutaannik inuuniutissanik tigusaqarsimassanngikkaluartoq, unnerluutigineqartup pisussaaffini malissimagaluarpagit kommunilu nalunaarfigalugu aningaasatigut atukkaminik eqqortunik, nunatta eqqartuussisuuneqarfianit uppernarsineqarpoq unnerluutigineqartoq peqquserlussimasoq unnerluussissummi allaaserineqartutut, taamaattorli taamaallaat 21.910,18 kr.-inut.

Unnerluutigineqartoq pillaammik atuivoq ukiumi ataatsimi aamma qaammatini pingasuni, Eqqartuussisoqarfik Sermersuup eqqartuussutaanik ulloq 26. maj 2021-imeersumik. Isiginiarneqarluni suliap matuma pissusia aamma nutaanngissusia, nunatta eqqartuussisuuneqarfia isumaqarpoq pineqaatissiissut eqqartuussaassutigisimasaa naammattoq, taamaattumillu suliami matumani nutaamik pineqaatissiissummik aalajangersaasoqassanngilaq.

Unnerluutigineqartup peqquserluuteqarnermigut Kommuneqarfik Sermersooq annaasaqartissimammagu 21.910,18 kr.-inik, aamma taarsiissuteqartussaatitaanermi piumasaqaatigineqartut naammassineqarmata, unnerluutigineqartup sapaatit akunneri sisamat qaangiutsinnagit akilissavai 21.910,18 kr.-it Kommuneqarfik Sermersuumut taarsiissutitut.

Pineqaatissiissut unnerluutigineqartumut eqqartuussutigineqartoq Eqqartuussisoqarfik Sermersuumit ulloq 26. maj 2021 naammattutut isumaqarfigineqarpoq.

Unnerluutigineqartup sapaatit akunneri sisamat qaangiutsinnagit akilissavai 21.910,18 kr.-it Kommuneqarfik Sermersuumut taarsiissutitut.

Suliap normua: K 291/21

Eqqartuussissutit nassuiaatillu