Eqqartuussisoqarfiup eqqartuussutaa allanngortinneqarpoq - K 001/22

Eqqartuussissut Nunatta Eqqartuussisuuneqarfianit oqaatigineqarpoq ulloq 9. Marts 2022.

Unnerluutigineqartoq Qeqqata Eqqartuussisoqarfianit ulloq 22. februar 2021 eqqartuussuteqarfigineqarpoq qaammatini arfinilinni pineqaatissinneqarsimasunut inissiisarfimmiittussanngortinneqarluni unioqqutissimagamiuk pinerluttulerinermi inatsimmi § 88 (nakuuserneq). Pineqaatissiissut ataatsimut pineqaatissiissutaavoq Nunatta Eqqartuussisuuneqarfiata eqqartuussutaanut ulloq 16. januar 2020-meersumut, tassani unnerluutigineqartoq eqqartuunneqarami ulluni 40-ni pineqaatissinneqarsimasunut inissiisarfimmiittussanngortinneqarnermik unioqqutissimagamiuk pinerluttulerinermi inatsimmi § 88 (nakuuserneq).

Inissiisarfimmiittussanngortinneqarnera unnerluutigineqartup eqqartuussaassutigisaa ulloq 22. februar 2021 suli aallartinneqarsimanngimmat, unnerluutigineqartoq eqqartuunneqassaaq pineqaatissiissummik ataatsimoortitamik, tak. pinerluttulerinermi inatsimmi § 147, imm. 2, tak. stk. 3. Ataatsimoortitamik pineqaatissiinermik aalajangersaanermi nunatta eqqartuussisuuneqarfiata pingaartippaa ukiukitsumik inerluni pinngitsaaliinerit marluk pineqarmata, tamatumani unnerluutigineqartoq isigineqartariaqarluni ukiumigut, timimigut aamma tarnimigut nukittunerunerminik atornerluisimasutut. Tamatuma saniatigut pineqarput pisimasut nakuusernermut tunngasut arlallit, tamatumanilu assingusumik pinerluttuuteqaqqinneq pineqarluni. Nakuuserfiginninnermi pisimasoq 22. februar 2021-meersoq peqqarniitsorujussuarmik nakuuserneruvoq, suliamilu matumani pisimasut nakuusernermut tunngasut ulloq 22. februar 2021-mi eqqartuussutip oqaatigineqarnerata kinguninngua piliarineqarsimallutik.

Nunatta Eqqartuussisuuneqarfia isumaqarpoq suliami sakkukillisaataasinnaasoqanngitsoq, imaluunniit unnerluutigineqartup inuttut atugaanit tunngaveqartumik sakkukillisaasoqarsinnaanani. Taamatullu aamma nunatta eqqartuussisuuneqarfia isumaqarpoq suliaq piffissap naammaginartup iluani suliarineqartoq.

Taamaalilluni, aamma eqqartuussisoqarfiup pineqaatissiissut pillugu oqaatigisai naapertorlugit, nunatta eqqartuussisuuneqarfia isumaqarpoq ataatsimut pineqaatissiissut aalajangersarneqassasoq ukiunut sisamanut aamma qaammatinut arfinilinnut.

Eqqartuussisoqarfiup eqqartuussutaa imatut allanngortinneqarpoq, ataatsimut pineqaatissiissut qaffanneqarpoq ukiunut sisamanut aamma qaammatinut arfilinnut. Pineqaatissiissummi ilaatinneqarput pisimasut Qeqqata Eqqartuussisoqarfiata ulloq 22. februar 2021 aamma Nunatta Eqqartuussisuuneqarfiata ulloq 16. januar 2020 eqqartuussutigisaat.

Suliap normua: K 001/22

Eqqartuussissutit nassuiaatillu