Toqutsineq - K 021/22

Eqqartuussissut Nunatta Eqqartuussisuuneqarfianit oqaatigineqarpoq ulloq 12. april 2022.

Unnerluutigineqartoq eqqartuussisoqarfimmi ulloq 26. november 2020 eqqartuunneqarpoq niviarsiaqqamik inuusoq 22. december 2008 toqutsinermut, tunuaniit taliminik qungasiatigut tigusimallugu, qaavani nalaffigalugu, niaqua apummut naqillugu, taamaalilluni niviarsiaraq ipitinneqarluni toqukkullu qimagulluni qungatsimigut tigummineqarnerminik aamma apummi ipitinneqarnermi kungunerisaanik.

Pisuunermik apeqqut nunatta eqqartuussisuuneqarfianut suliareqqitassanngortinneqarsimanngilaq.

Pinerluttulerinermi inatsimmi § 121-mi ersersinneqarpoq, nunatta eqqartuussisuuneqarfiata pineqaatissiissutissamik toqqaanermi uuttuinermilu eqqarsaatigissagaat

1) inatsisinik unioqqutitsinerup peqqarniissusia, matumani ilanngunneqassalluni iliuutsit taamaatut ittut akiornissaannut inuiaqatigiit soqutiginninnerat, aamma

2) pinerluuteqarsimasup inuttut atugai, matumani ilanngunneqassalluni pineqartup inatsisinik unioqqutitseqqinnissaa pinaveersaartinniarlugu pisariaqarsorineqartut.

Toqutsinerup pissusia nalilersorneqartariaqarpoq pinerluttulerinermi inatsimmi iliuuserineqarsinnaasoq unioqqutitsinerusoq peqqarniinnerpaatut. Taamaattumik, pineqaatissiisarnermi qaffasissutsit nalinginnaasumik sakkortuusaasarnerit isiginiarneqarlutik, ukiuni kingullerni naammassineqartarsimapput politikkikkut ersarissumik kissaatigineqartut sanilliunneqarlunilu, piffissap pineqaatissinneqarsimasunut inissiisarfimmiiffissap ukiut qulit qaangersinnaannginneri, nunatta eqqartuussisuuneqarfia isumaqarpoq, aallaavittut toqutsinermi pineqaatissiisoqartariaqartoq ukiuni arfineq marlunni pineqaatissinneqarsimasnut inissiisarfimmiittussanngortinneqarnermik.

Suliami matumani nunatta eqqartuussisuuneqarfia isumaqarpoq, sakkortusaatitut pingaartinneqartariaqarmat, pineqartoq tassaammat pissutissaqanngitsumik meeqqamik toqutsineq, piliarineqarsimasoq ulorianartorujussuarmik aamma peqqarniitsumik nakuusernikkut ipititsinikkut pisimalluni. Taamatullu aamma nunatta eqqartuussisuuneqarfianit sakkortusaatitut pingaartillugu isumaqarfigivaa, pineqartoq tassaammat inummik toqutsineq, unnerluutigineqartumut atatillugu oqaatigineqartariaqartoq nalaatsornerinnartut, aamma toqutsineq pimmat piffimmi inuit tamat atorsinnaasaanni najugaqarfiusup eqqaani, toqqissilluni unnukkut aqqutigineqarsinnaasussami, tassami inummut pinerluuteqarnerit ulorianaatillit annertuumik inuiaqatigiit akornanni toqqissisimajunnaartitsisarmata, taamaattumillu inuiaqatigiinnit ersarissumik soqutigineqarmat iliuutsit taamaattut akiorniarneqarnissaat.

Nunatta eqqartuussisuuneqarfia suliami matumani takusassaqanngilaq sakkukillisaataasinnaasumik, taamatullu aamma unnerluutigineqartup inuttut atugarisai tunngavissarsissutaanngillat eqqartuunneqarnissaanut sakkukinnerusumik pineqaatissiinermik.

Taamaalilluni pineqaatissinneqarsimasnut inissiisarfimmittussanngortinneqarluni pineqaatissinneqarnera aalajangersarneqarpoq ukiunut 9-nut.

Unnerluutigineqartup akuerinikuuvai qimagaasut ajunngitsorsiassamik piumasaqaataat – taarsiisussaatitaanermut aamma piumasarineqarneqartut annertussusiannut atatillugu. Taamaattumik nunatta eqqartuussisuuneqarfia ajunngitsorsiassap annertussusianut isummersuuteqarsimanngilaq.

Unnerluutigineqartoq eqqartuunneqarpoq ukiuni 9-ni pineqaatissinneqarsimasunut inissiisarfimmiittussanngortinneqarluni.

Unnerluutigineqartup sapaatit akunneri sisamat qaangiutsinnagit akilissavai 100.000 kr.-it anaanaasumut aamma 100.000 kr.-it ataataasumut. 

Suliap normua: K 021/22

Eqqartuussissutit nassuiaatillu