Nakuuserneq - K 082/22

Eqqartuussissut Nunatta Eqqartuussisuuneqarfianit oqaatigineqarpoq ulloq 9. maj 2022.

Pinerlineqartup nunatta eqqartuussisuuneqarfianut nassuiaareerneratigut, tamannalu ilisimannittup nassuiaaneranit ikorfartuiffigineqarpoq, tunngavigineqarsinnaavoq, taamaallaat unnerluutigineqartoq aamma pinerlineqartoq ineeqqamiissimammata.

Pinerlineqartoq nassuiaavoq, unnerluutigineqartup saviup savittaanik ipittortaanik niaqqumi saneraatigut annersissimagaani, periaqqikkaanilu taliminik assersimallugu, talimigut kilerluni.

Nakorsap politiinut uppernarsaataanni ersersinneqarpoq, pinerlineqartoq niaqqumigut aamma talimigut ajoquserneqartoq, ajoqusernerilu mersorneqarsimasut arlalinnik kilulerlugit.

Ilisimannittoq nassuiaavoq, takusimallugulu pinerlineqartoq ineeqqamiittoq talimigut aaginnaalluni, aamma pinerlineqartoq niaqqumigut nimeqarsimasoq politiit piffimmiit aneqatigigamigit.

Nalunaarutiginninnermik nalunaarusiamit 31. december 2019 nal. 18.22-meersumi ersersinneqarpoq, pinerlineqartoq politiinut sianersimasoq oqarluni aatsaanngummat nuliaminit niaqqumigut savimmik kapineqarsimalluni.

Nunatta eqqartuussisuuneqarfia tunngavissarsinngilaq isumaqarfigissallugu unnerluutigineqartoq allatut ajornartumik iliuuseqartariaqarsimasoq, imaluunniit allatut imminut illersorniarluni iliuuseqartariaqarsimasoq.

Naak pinerlineqartoq nunatta eqqartuussisuuneqarfiani nassuiaagaluartoq – pingaartumik piffissaq pillugu – nunatta eqqartuussisuuneqarfiata paasinninnera malillugu iluamik kimeqangaanngitsumik, ataatsimut nalilersuereernermi suliami uppernarsaaneq naaperlugu eqqartuussutaasinnaasumik pisarilimmik uppernarsineqartoq, unnerluutigineqartoq unnerluussissummi oqaatigineqartutut pisuusoq.

Pineqaatissiineq aalajangersarneqarpoq qaammatini sisamani pineqaatissinneqarsimasunut inissiisarfimmittuussanngortinneqarnermik, tak. pinerluttulerunerimi inatsimmi § 146, imm. 1, nr. 1 aamma nr. 2, tak. § 88, uniffik siulleq.

Nunatta eqqartuussisuuneqarfiata pineqaatissiissummik aalajangersaanermini pingaartippaa, unnerluutigineqartoq siusinnerusukkut assingusumik pinerluuteqarnermi pineqaatissinneqarnikuummat, pisimasup isikkua, tassunga ilaanngullugu savik atorneqarsimammat, aamma uloriarnarsinnaanera, kisianni aamma unnerluutigineqartup inuttut atugarisai aammalu piffissap suliaminik suliarinninnermi atorneqartup sivisunera, tamannalu unnerluutigineqartup pisuussutiginngilaa.

Pisimasup isikkua isiginiarneqarluni, aamma unnerluutigineqartup siusinnerusukkut pineqaatissinneqarnikuunra pissutigalugit, nunatta eqqartuussisuuneqarfia tunngavissaqarsimanngilaq pineqaatissiissummik utaqqisitanngortaanngortitsinssaminnut, tassungali atatillugu oqaatigineqassaaq, unnerluutigineqartup inuiaqatigiinni sulisitaanssaminut naleqqutinnginnera.

Pinerluttulerinermi inatsimmi § 166, imm. 2, nr. 1, naapertorlugu savik arsaarinnissutigineqarpoq.

Tamaalilluni tamanna tunngavigalugu eqqartuussisoqarfiup eqqartuussutaa allanngortinneqarluni.

Eqqartuussisarnermi inatsimmi § 480, imm. 1, naapertorlugu suliami aningaasartuutit naalagaaffiup karsianit akilerneqassapput.

Eqqartuussisoqarfiup eqqartuussutaa allanngortinneqarpoq, taamaalilluni unnerluutigineqartoq eqqartuunneqarpoq qaammatini sisamani pineqaatssinneqarsimasunut inissiisarfimmiittussanngortinneqarluni.

Savik arsaarinnissutigineqarpoq.

Suliap nomua: K 082/22

Eqqartuussissutit nassuiaatillu