Eqqartuussisoqarfiup eqqartuussutaa atuuttussanngortinneqarpoq - K 063/22

Eqqartuussissut Nunatta Eqqartuussisuuneqarfianit oqaatigineqarpoq ulloq 8. juni 2022.

Ersersinneqarpoq unnerluutigineqartoq eqqartuussisoqarfimmi nassuiaateqarsimanngitsoq, aamma oqaatigivaa pisimasut 1 aamma 5-mi pisuunerarfigalugit.

Eqqartuussisuuneqarfik isumaqarpoq eqqartuussisoqarfiup tunngavilersuutimini pisuunermik apeqqummi kukkunikkut pingaartissimagaat unnerluutigineqartup pisuunerarnera, naak nassuiaateqarsimanngikkaluartoq. Aammali eqqartuussisoqarfiup paasinninnertik tunngavilersimavaat pisuunermut atatillugu ilisimannittut nassuiaanerannit, tassanilu pineqanngilaq imatut kukkuneq, taamaalilluni eqqartuussisuuneqarfiup nammineerluni nakkutigisassarilerlugu tamanna eqqartuussisarnermi inatsimmi § 548, imm. 2, nr. 4 tunngavigalugu.

Unnerluutigineqartup piffissaagallartillugu tak. eqqartuussisarnermi inatsimmi § 536, imm. 1 pisuunermik apeqqut suliareqqitassanngortissimanngimmagu pisimasunut 1 aamma 5-imut atatillugu, nunatta eqqartuussisuuneqarfiata itigartitsissutigivaa tassunga tunngasortaata suliarinissaa, tak. eqqartuussisarnermi inatsimmi § 542, imm. 1.

Taamaalilluni eqqartuussisoqarfiup pisuunermik apeqqummut aalajangiinera pisimasuni 1 aamma 5-mi atuutitiinnarneqassaaq.

 Pisimasoq 2

Ilisimannittoq arnaq nassuiaateqarpoq tusaasimallugu unnerluutigineqartoq nilliasoq igalaaq aserorniarlugu aamma toqunniarluni.

Ilisimannittoq angut nassuiaateqarpoq tusaasimallugu unnerluutigineqartoq nillialluni arnap atianik taaguilluni, aamma nilliasimasoq toqutsinissamik nipilimmik. Takuvaa unnerluutigineqartoq kaattamik nassartoq, tusaasinnaallugulu taanna atorlugu kaattarpaluttoq.

Nunatta eqqartuussisuuneqarfiata eqqartuussisoqarfik assigalugu tamanna tunngavigalugu uppernarsivaa unnerluutigineqartoq pisuusoq unnerluussissummi allaaserineqartutut.

 Pisimasoq 3

Ilisimannittoq arnaq nassuiaateqarpoq tusaasimallugu igalaaq aserorneqarpaluttoq.

Ilisimannittoq angut nassuiaateqarpoq, unnerluutigineqartoq kaattamik nassarsimasoq, aamma tusaasimavaa matumut kaattarpaluk aamma igalaaq aserorpaluttoq.

Ilisimannittut nassuiaataat ikorfartuiffigineqarput pinerliiffiusumik misissuinermit, tassannga ersersinneqarpoq igalaap igalaartaa aserorneqarsimasoq, aamma matumi kaattap kaattaatiginerani inikui takuneqarsinnaasut, napparsimmavimmiit allaaserisaq, tamatuma kinguninngua unnerluutigineqartoq saaffiginnissimasoq assammigut ajoqusersimalluni, aammalu napparsimmavimmut kaattamik nassaqarsimasoq.

Nunatta eqqartuussisuuneqafiata eqqartuussisoqarfiup oqaatigisai assigalugit tunngavivaa, uppernarsineqartoq unnerluutigineqartoq pisuusoq unnerluussissummi allaaserineqarneratut.

 Pisimasoq 4

Ilisimannittup arnap nassuiaateqareerneratigut, tassa unnerluutigineqartoq tassunga oqarsimasoq toqunniarlugu, unnerluutigineqartoq pisuutinneqarpoq unnerluussissutip tassunga tunngasortaanut.

Uppernarsaasiiffigineqanngimmat unnerluutigineqartup oqarsimanera arnaq annersarniarlugu isimmittarniarlugulu, unnerluussissutip tassunga tunngasortaani pinngitsuutinneqarpoq.

Taamatut allannguuserlugit nunatta eqqartuussisuuneqafiata eqqartuussisoqarfiup uppernarsaanermi inerniliussaa aamma tunngavilersuutaa isumaqatigivaa.

Pingaartumik isiginiarneqarluni unnerluutigineqartoq siusinnerusukkut eqqartuunneqarsimammat inummut ulorianaatilimmik pinerluuteqarnermut aamma eqqartuussisoqarfiup tunngavilersuutaata sinnerini oqaatigineqartunut, nunatta eqqartuussisuuneqarfiata pineqatissiissutitut aalajangersarneqarsimasoq isumaqatigivaa.

Taarsiissuteqarnissamut apeqqummut tunngatillugu eqqartuussisut siulittaasuata oqaatigivaa, piumasaqaatigineqartoq akileeqqusissut 2.747,50 kr.-inik fakturartalerneqarsimammat. Unnerluutigineqartoq pisuutinneqarpoq, taamaattumillu piumasaqaatigineqartoq akilissavaa.

Nunatta eqqartuussisuuneqafiata taarsiissuteqarnissamik piumasaqaatit sinneri inuit saqitsaannerattut suliassatut innersuussutigivai, uppernarsaasigaanngimmat pisarialinnik annertussusiata naatsorneqarnerani.

Suliami aningaasartuutit nalagaaffiup karsianit akilerneqassapput, tak. eqqartuussisarnermi inatsimmi § 480, imm. 1.

Eqqartuussisoqarfiup eqqartuussutaa atuuttussanngortinneqarpoq.

Unnerluutigineqartup ullut 14-it qaangiutsinnagit akilissavai 2.747,50 kr.-it Kommuneqarfik Sermersuumut.

Suliap normua: K 063/22

Eqqartuussissutit nassuiaatillu