06 jul 2022
Nunatta Eqqartuussisuuneqarfia
Akunnerini 100-ni inuiaqatigiinni sulisitaanermik - K 116/22
Angut 20-nik ukiulik eqqartuunneqarpoq qaammatini sisamani pineqartissinneqarsimasunut inissiisarfimmiittussanngortinneqarluni, taanna kolligiami niviarsiaqqap inaanut qaaqquneqarani taanna sinittoq isersimammat, taannalu allatut kinguaassiutitigut atoqatiginninnermik kinguneqartumik.
Eqqartuussissut Nunatta Eqqartuussisuuneqarfianit oqaatigineqarpoq ulloq 6. juli 2022.
Nunatta eqqartuussisuuneqarfiata pineqaatissiissut aalajangersarpaa nalunaaquttap akunnerini 100-ni inuiaqatigiinni sulisitaanermik, taakkua sivisunerpaaffiliussap qaammatit qulit iluanni naammassineqarsimassapput, tak. pinerluttulerinermik inatsimmi § 141, imm. 1, tak. § 77, imm. 1, nr. 2. unnerluutigineqartoq aamma pinerluttunik isumaginnittoqarfimmit nakkutigisassanngortinneqarpoq ukiumi ataatsimi aamma qaammatini arfinilinni, tak. pinerluttulerinermi inatsimmi § 141, imm. 2.
Imminut illersoriarsinnaanngitsumik kinguaassiutitigut atoqatiginninneq pinerluttulerinermi inatsimmik unioqqutitsineruvoq peqqarniitsoq, tamanna aallaavittut qaammatini arlalinni pineqaatissinneqarsimasunut inissiisarfimmiititsissutaasarluni. Sakkortusaataavoq unnerluutigineqartup 17-inik ukiullip niviarsiaqqap kolligiami inaanut qaaqquneqarani taanna sinittoq isersimammat.
Pisimasoq piliarineqarneraniit ukioq ataaseq aamma qaammatit qulingiluat qaangiupput, piffissarlu suliap suliarineqarneranut atorneqartoq sivisusimalluni eqqartuussisoqarfimmi pingaarnertut suliarineqannginnerani ukioq ilivitsoq uninngatitsisoqarsimalluni. Ilaatigullu ersersinneqartutut piffissap suliap suliarineqarnerata kingunerisimallugu unnerluutigineqartup ilinniakkamik aallartitsisinnaasimannginnera, suliarlu taamatut isikkulik sukkanerujussuarmik suliarineqarsimasussaagaluarluni. Taamaattumik unnerluutigineqartup inuusunnera isiginiarneqarluni aamma inuttut inuunerissuunera, pineqaatissiissut aalajangersarneqarpoq inuiaqatigiinni sulisitaanermik.
Eqqartuussisoqarfiup mitagaanermut ajunngitsorsiassanik aalajangersagaa atuuttussanngortinneqarpoq. Tassani ilanngullugu isiginiarneqarsimalluni pinerlisap inuusunnera, aamma kannguttaatsuliorfiginninneq pisimammat angerlarsimaffimmik eqqissiviilliortitsinikkut.
Unnerluutigineqartoq eqqartuunneqarpoq nalunaaquttap akunnerini 100-ni inuiaqatigiinni sulisitaanermik, taakkua sivisunerpaaffiliussap qaammatit qulit iluanni naammassineqarsimassapput. Unnerluutigineqartoq aamma pinerluttunik isumaginnittoqarfimmit nakkutigisassanngortinneqarpoq ukiumi ataatsimi aamma qaammatini arfinilinni.
Eqqartuussisoqarfiup mitagaanermut ajunngitsorsiassatut aalajangersagaa atuuttussanngortinneqarpoq.
Suliap normua: K 116/22
Eqqartuussissutit nassuiaatillu