Inissiisarfimmiittussanngortinneqarneq appartinneqarpoq - K 135/22

Eqqartuussissut Nunatta Eqqartuussisuuneqarfianit oqaatigineqarpoq ulloq 24. august 2022.

Nunatta eqqartuussisuuneqarfia isumaqanngilaq, eqqartuussisoqarfiup tunngavilersuutaani oqaatigineqartut pinerluttulerinermik inatsimmi § 9-mik atuinermi iisigineqarsinnaasut eqqartuussinerup ingerlanneqarnerani kukkusoqarsimaneranik, suliap suliarineqaqqaarfianut utertitsissutaasinnaasumik.

Unnerluutigineqartoq nassuersimavoq arnaq pinerlineqartoq 2-4-riarlugu kiinaatigut tillussimallugu. Nakorsap paasissutissiissutaanit erserinneqarpoq aamma assinit uppernarsaasiissutigineqartunit, arnaq pisimasup kingornatigut kiinnamigut sakkortuumik ajoquserneqarsimasoq. Taamaalillutik eqqartuussisut uppernarsivaat unnerluutigineqartoq nakuuserfiginnissimasoq.

Unnerluutigineqartoq oqaraluarpoq allatut ajortumik imminut illersortariaqarsimalluni, arnap kiimmani. Unnerluutigineqartup nassuiaanera kiineqarsimalluni ikorfartuiffigineqarpoq assinit, napparsimmavimmi talii assilineqarsimallutik. Unnerluutigineqartup nassuiaanera naapertorlugu pisimasoq aallartissimavoq arnap kiisineratigut, taavalu annersarsimavaa, aammalu keeqqissimagaani. Eqqaamanngilaa qasseriarluni kiineraani annersaalernissami tungaanut. Arnap pisimasoq eqqaamanngilaa, kisianni nassuiaavoq, nammineq kiisigaangami, tamanna pissuteqartartoq unatarneqartarnerminik.

Unnerluutigineqartoq aamma nassuiaavoq piffik qimaannarsimasinnaagaluarlugu, peqqissimallunilu arnaq annersarnagu ingerlaannarsimannginnami. Unnerluutigineqartup nassuiaanera malillugu, arnaq natermi madrasimi innangavoq pisup nalaani, namminerlu sianiani issialluni. Suliamittaaq ersersinneqarpoq arnap aalasinnaanermigut killeqartoq, pingaartumik talimigut saamerlikkut, pisimasup pinerata nalaani.

Unnerluutigineqartoq akornuteqarani piffik qimaannarsinnaagaluarmagu saniulliunneqarlutik paasissutissat arnap timimigut killeqarnera isiginiarneqarlunilu unnerluutigineqartup aamma timimigut nakuunerunera, eqqartuussisuuneqarfik isumaqarpoq, unnerluutigineqartup uppernarsisinngikkaa, arnap niaquanik annersaaneq pisariaqarsimasoq arnap kimmaanera pinngitsoortinniarlugu, taamaattumillu uppernarsineqanngilaq nakuuserneq pisariaqarsimasoq allatut ajornartumik iliuuseqartariaqarnikkut. Taamatullu eqqartuussisuuneqarfik isumaqarpoq, nakuuserneq peqqarniitsoq isigineqarsinnaanngitsoq allatut ajornartumik tupannermik patsiseqartumik, tak. Pinerluttulerinermik inatsimmi § 9, imm. 2.

Taamaalilluni eqqartuussisoqarfiup aalajangiinera atuuttussanngortinneqarpoq pisuunermik apeqqummut tunngatillugu.

Nunatta eqqartuussisuuneqarfia tunngavissarsinngilaq unnerluutigineqartup nassuiaanera arnap pisimasup nalaani kiisimagaani tunuartissallugu. Sakkukillisaatitullu pingaartinneqassaaq, nakuuserneq ilaatigut isigineqartariaqarmat aamma pilersinneqarsimasoq aamma sakkortusarneqarsimasoq arnap unnerluutigineqartumik kiisineranit.

Sakkortusaatitut isumaqarfigineqarpoq, pineqarmat peqqarniitsumik aamma ulorianartumik nakuuserneq, aammalu nakorsamit paasissutissat aallaavigalugit uppernarsineqartutut isigineqartariaqarmat, arnap ajoquserneri inuuneranik ulorianartorsiortitsinermik kinguneqarsimasut. Taamatullu aamma sakkortusaataalluni, arnaq immikkut qajannassuseqarsimammat aammalu imminut illersoriarsinnaarpiarani timimigut killeqalersimanini pissutigalugu.

Piffissaq suliap suliarineqarneranut atorneqartoq sivisusimammat siullermeeriffiusumi aamma aappassaaneeriffiusumi, pineqaatissiissut appartinneqarpoq eqqartuussisoqarfiup eqqartuussutaaniit qaammatit pingasunngortinneqarlutik.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, pineqaatissinneqarsimasunut inissiisarfimmiittussanngortinneqarneq appartinneqarpoq qaamatit pingasunngortinneqarlutik.

Suliap normua: K 135/22

Eqqartuussissutit nassuiaatillu