Eqqartuussisoqarfiup eqqartuussutaa allanngortinneqarpoq - K 150/22

Eqqartuussissut Nunatta Eqqartuussisuuneqarfianit oqaatigineqarpoq ulloq 21. september 2021.

Unnerluutigineqartoq nassuiaavoq 35 gram hash nammineq atugassarisimallugit, ullormut atortarsimallugu 0,4 gram ADHD-nerminut imminut nakorsaasersuutitut. Aamma unnerluutigineqartoq nassuiaavoq kalaaliminernik tunisinermi aningaasanik tigoriaannarnik akiliutisisarsimalluni, qeritsitsiviilu sisamaasut kalaaliminernik imallit politiit misissueqqissaanerminni misissorsimagaat.

Oqaatigineqarpoq kinaassutsiminik taasinngitsumit hasheerniamik nalunaarutiginnittoqarsimasoq, kisianni hashimik tuneriaannanngorlugit piareersakkanik nassaartoqarsimanngitsoq, aamma paasissutissiisoqanngilaq tuniaaneq aamma pisisartut il.il. pillugit. Taamaalillutik unnerluussisussaatitaasut pisarialimmik uppernarsineqanngilaq, haship aamma aningaasanik tigoriaannarnik nassaarineqarnerinik taamaallaat innersuussuteqarnikkut, unnerluutigineqartup tuniniaaqqiinissamik siunertaqarluni tigumiaqarsimanera, kiisalu aamma uppernarsineqarani 7 gram haship tuniniarneraneersuusut aningaasat tigoriaannaat nassaarineqartut. Taamaattumik unnerluutigineqartoq pinngitsuutinneqarpoq 35 gram hashimik tuniniaqqinnissaanik siunertalimmik tiguniaqarnermut aamma 7 gram hashimik tuniniaanermut iluanaarutitalimmik 6.600 kr.-iusunik.

Taamaalilluni unnerluutigineqartoq pisuutinneqarluni pisimasoq 1-mi nammineq atugassamik 35 gram hashimik tigumiaqarnermut.

Unnerluutigineqartup nammineerluni pisimasoq 2-mi nassuernera aamma paasissutissat pigineqartut sinneri naapertorlugit pisuutinneqarpoq.

Nunatta eqqartuussisuuneqarfiata pineqaatissiissutip aalajangersarneqarnerani pinngaartippaa, pisimasoq 1-mi eqqartuussummi 18. september 2020-mi misiligaaffiup ingerlanerani piliarisimanera, aamma unnerluutigineqartup siusinnerusukkut aanngaajaarniutit pillugit inatsimmik unioqqutitsinikuunera.

Nunatta eqqartuussisuuneqarfia ataatsimoortamik pineqaatissiivoq suliami matumani pisimasuni pineqartuni, aamma pisimasuni eqqartuussisoqarfiup ulloq 18. september 2020 eqqartuussutaani pineqartunut, unnerluutigineqartorlu eqqartuunneqarpoq utaqqisitamik ulluni 20-ni pineqaatissinneqarsimasunut inissiisarfimmiittussannogrtinneqarluni ukiumik ataatsimik misiligaaffilikkamik, tak. Pinerluttulerinermi inatsimmi § 130, imm. 1, tak. Aanngaajaarniutit pillugit inatsimmi § 3, imm. 1, tak. Aanngaajaarniutit pillugit nalunaarummi § 27, imm. 1, tak. § 2, tak. ilanngussaq 1, liste A, nr. 1, aamma Kalaallit Nunaanni sakkut pillugit inatsimmi § 13, tak. § 1, imm. 1, nr. 2, tak. § 124, aamma § 130, imm. 1. Ulloq 18. september 2022-mi akiligassiissutigalugu eqqartuussut atuutitiinnarneqarpoq.

Uppernarsaasiiffigineqanngilaq aningaasat tigoriaannaat 6.600 kr.-it unnerluutigineqartup tigusarineqarnermini tigumiarisai, hashimik tuniniaanermeersuuneri, taamaammat unnerluutigineqartoq aningaasanik arsaarinninnermi pinngitsuutinneqarpoq. Taamaattorli eqqartuussisoqarfiup arsaarinninnermut eqqartuussutigisaata sinnerini atuuttussanngortitsisoqarluni.

Unnerluutigineqartoq pisuutinneqarmat hashimik nammineq atugassamik tigumiaqarnermut, eqqartuussisuuneqarfik isumaqarpoq aallaaviusartoq eqqartuussisarnermi inatsimmi § 480, imm. 1 malillugu suliami aningaasartuutit naalagaaffiup karsianit akilerneqassasut. Taamaalillutik eqqartuussisoqarfimmi aamma nunatta eqqartuussisuuneqarfiani aningaasartuutit naalagaaffiup karsianit akilerneqassapput.

Eqqartuussisoqarfiup eqqartuussutaa allanngortinneqarpoq, unnerluutigineqartoq eqqartuunneqarpoq eqqartuussut ulloq 18. september 2020 ilanngullugu atsimoortitamik utaqqisitamik ulluni 20-ni pineqaatissinneqarsimasunut inissiisarfimmiittussanngortinneqarnermik. Pineqaatissiissut kinguartinneqarpoq atorunnaassallunilu misiligaaffiliunneqartoq ukioq ataaseq qaangiuppat.

Eqqartuussutikkut ulloq 18. september 2022 akiligassiissut eqqartuussutigineqartoq 1.500 kr. atuutitiinnarneqarpoq.

Eqqartuussisoqarfiup eqqartuussutaata sinneri atuuttussanngortinneqarput, imatut allannguusikkamik, unnerluutigineqartoq 6.600 kr.-inik arsaarinninnermut pinngitsuutinneqarpoq.

Suliap normua: K 150/22

Eqqartuussissutit nassuiaatillu