06 sept 2022
Nunatta Eqqartuussisuuneqarfia
Eqqartuussisoqarfiup eqqartuussutaa atuutussanngortinneqarpoq - K 127/22
Angut 53-nik ukiulik Eqqartuussisoqarfik Sermersuumit eqqartuunneqarpoq immikkut isumagisassanngortinneqarluni, arnaq kiinaatigut aamma taliagut arlaleriarluni annersarsimammagu, ilaatigut tunuagut tilluarlugu, najungasui ajoquserlugit. Tooqusassissimavaa ilisimajunnaartillugu.
Eqqartuussissut Nunatta Eqqartuussisuuneqarfianit oqaatigineqarpoq ulloq 6. september 2021.
Pisimasoq 1
Unnerluutigineqartoq nassuerpoq arnaq ataasiarlugu isassimallugu. Arnap ilisimannittutut nassuiaateqarneratigut sanilliunneqarlutik nakorsap poltiinut uppernarsaataani allasserineqartut aamma arnap assilineqarneri uppernarsineqarpoq, unnerluutigineqartup arlaleriarluni kiinaatigut aamma tunuatigut annersarsimagaa ilaatigut najungasuisigut ajoquserneranik kinguneqartumik, aamma arnaq naneruuserfimmik kiinaatigut anaasimagaa, kisianni taliatigut eqqorlugu imminut assernerani.
Taamaalilluni unnerluutigineqartoq pisuutinneqarpoq unioqqutitsinermut pinerluttulerinermik inatsimmi § 88, taamaattorli pisarialimmik uppernarsineqanngilaq unnerluutigineqartumit Marthaline arnamik seeqquisimanera, ikusimmiisimanera aamma qungasersiisimanera, taamaattumik unnerluussissutip taannartaanut pinngitsuutinneqarluni.
Pisimasoq 2
Eqqartuussisoqarfiup tunngavilersuutaa aamma inerniliinera pisimasumi tamatumani eqqartuussisuuneqarfimmit isumaqatigineqarpoq, taamaalilluni unnerluutigineqartoq pisuutinneqarluni unioqqutitsinermut pinerluttulerinermi inatsimmi § 88.
Unnerluutigineqartoq pisimasoq 1-mi pisuutinneqarpoq ilungersunartumik nakuusernermik pinerluuteqarnermi pinerluttulerinermik inatsimmi § 161 imm. 1, nr. 1-mi oqaatigineqartutut. Siusinnerusukkut eqqartuussutaasimasut, retspsykiatriskemi nalunaarusiami inerniulinneqartut aamma nakorsat eqqartuussinermi isumasiugaasartut oqqaseqaataat naapertorlugit isumaqartoqartariaqarpoq, unnerluutigineqartoq inuup inuuneranut, timaanut, peqqissusaanut imaluunniit kiffaanngissusianut ulorianaateqartoq, taamaalilluni pisariaqarluni immikkut isumagisaanissaa ulorianassusia tamanna pinaveersimatinniarlugu. Immikkut isumagisassanngortitsinermi piumasaqaatigineqartut naammassineqarput, tak. Pinerluttulerinermik inatsimmi § 161, imm. 1. Taamaalilluni nunatta eqqartuussisuuneqarfianit isumaqatigineqarluni tamatumani eqqartuussisoqarfiup inerniliinera aamma tunngavilersuinera.
Taamaattumik nunatta eqqartuussisuuneqarfianit eqqartuussisoqarfiup eqqartuussutaa atuuttussanngortinneqarpoq.
Suliap normua: K 127/22
Eqqartuussissutit nassuiaatillu