14 sep 2022
Nunatta Eqqartuussisuuneqarfia
Nalunaaqquttap akunneri 60-it inuiaqatigiinnik sulisitaassaaq - K 154/22
Angut 42-nik ukiulik eqqartuunneqarpoq qaammatini pingasuni pneqaatissinneqarsimasunut inissiisarfimmiittussanngortinneqarnermik, angut alla timaatigut isimminneratigut taanna natermut uppitillugu, kiinaatigullu tilluarlugu natermullu uppinermini timimigut najungasumi nalaatigut tukkaanneqarluni.
Eqqartuussissut Nunatta Eqqartuussisuuneqarfianit oqaatigineqarpoq ulloq 14. september 2021.
Tunngavigineqarpoq unnerluutigineqartoq aamma pinerlineqartorlu ulloq 15. februar 2021 unnukkut fiisteqatigiissimasut, piffissap ilaani pinerlineqartup inaani allanik isersimasoqarsimavoq.
Unnerluutigineqartoq aamma pinerlineqartoq tamarmik nassuiaapput, unnerluutigineqartoq pinerlineqartumut nakuusersimasoq fiistip kingornatigut højtalerini aallugit utermat. Unnerluutigineqartoq nassuiaavoq pinerlineqartumit ajuallatsinneqarsimalluni, taamaammat kasoqqissimallugu.
Unnerluutigineqartoq nassuiaavoq, fiisterfik qimatsinnagu pinerlineqartumit nakuuserfigitissimalluni isimmigartilluni, pinerlineqartumit issiavimmiit uppitinneqarnermi kingornatigut kiinnamigut arlaleriarluni annersartissimalluni aamma savimmik kapineqarnissamik siorasaarneqarsimalluni.
Pinerlineqartoq nassuiaavoq, pisimasoq pillugu unnerluutigineqartup nassuiaaneranit eqqaamasaqarani, fiistip nalaani aamma unnerluutigineqartup utinngitsiarneranik højtalerinik aallerluni. Taamaattorli pinerlineqartoq nassuiaavoq, unnerluutigineqartumit annersarneqarsimalluni aamma isimmigarneqarsimalluni.
Nunatta eqqartuussisuuneqarfia isumaqarpoq, unnerluutigineqartup nammineq nassuerneratigut pisuusoq pinerlineqartoq arlaleriarlugu kiinaatigut tilluarsimallugu aamma timaatigut 1 – 3-riarlugu isimmigarsimallugu unnerluussummi ersersinneqartunik ajoquteqalersillugu. Taamaattorli uppernarsineqanngilaq unnerluutigineqartup pinerlineqartumik tukkaasimanera.
Tunngavigineqarpoq erngunnermi nakuusertoqarsimasoq, unnerluutigineqartullu nassuiaaneratigut tunuartinneqarsinnaanani pinerlineqartup tamanna pitinnagu annersarsimagaa aamma siorasaarsimagaa.
Pineqaatissiissutissamik aalajangersaanermi siullermik pingaartinneqarpoq nakuusernerup pissusia aappaatigullu isummakkut killitsisimaarluni pisimanera, pinerlineqartup tungaaniit unioqqutitsilluni saassussinerup pilersitaanik, tak. Pinerluttulerinermi inatsimmi § 123, nr. 3.
Pineqaatissiineq aalajangersarneqarpoq nalunaaqquttap akunneri 60-it inuiaqatigiinnik sulisitaanermik, qaammatit arfinillit iluanni naammassineqartussamik aamma ukiumi ataatsimi nakkutigisaanermik, tak. Pinerluttulerinermi inatsimmi § 140, tak. § 88 aamma § 141, imm. 1 aamma 2.
Pineqaatissiissummik aalajangersaanermi nunatta eqqartuussisuuneqarfiata pingaartippaa unnerluutigineqartoq siusinnerusukkut eqqartuunneqarsimanngimmat pineqaatissinneqarluni aamma inuttut atugarissaartuunera.
Unnerluutigineqartoq, Pinerluttunik Isumaginnittoqarfiup aalajangersagaanik nalunaaqquttap akunneri 60-it inuiaqatigiinnik sulisitaassaaq, qaammatit arfinillit iluanni naammassineqartussamik aamma ukiumi ataatsimi nakkutigisaassalluni. Sivisunerpaaffiliussap iluani unnerluutigineqartoq nakkutigineqassaaq.
Suliap normua: K 154/22
Eqqartuussissutit nassuiaatillu