Qaammatini 3-ni pineq. inissiisarfimmiittussanngortinneqarluni - K 218/22

Eqqartuussissut Nunatta Eqqartuussisuuneqarfianit oqaatigineqarpoq ulloq 12. april 2023.

Arnap nassuiaatigisaa itersimalluni unnerluutigineqartup atoqatigigaani, ikorfartuiffigineqarpoq ilisimannittut marluk nassuiaataannit, assigiimmik nassuiaateqarmata takusimallugulu unnerluutigineqartup arnaq atoqatigigaa. Taamatullu aamma arnap dna-va unnerluutigineqartup usuani nassaarineqarluni. Taamaalilluni uppernarsineqartutut isigineqartariaqarpoq unerluutigineqartup arnaq fiistimi pineqartumi atoqatigisimagaa.

Nunatta eqqartuussisuuneqarfiata arnap nassuiaanera, tassa atoqatigiinneq aallartissimanerarlugu nammineq itisuumik sinitsilluni aammalu qaqugukkulluunniit unnerluutigineqartup atoqatigissinnaagaani akuersisimanani uppernartutut isumaqarfigivaat. Taamaalillutik eqqartuussisuunerit ingammik pingaartippaat ilisimannittut nassuiaanerat, tassa arnaq ulloq taanna aalakoortorujussuusimasoq, aamma arnaq nassuiaammat pisimasoq sioqqullugu qaatissimalluni, innarsimallunilu sinittarfimmilu sinilersimalluni aalakoortorujussuartut misigisimagami.

Arnaq uppernartumik nassuiaateqarpoq sooq aallaqqaammut nakorsamit misissorneqarnissaminik peqataajumanngissimanini pillugu, taamaattumillu aatsaat ullut arlallit qaangiunneranni politeeqarfiliarsimalluni suliamut apersorneqariartorluni.

Taamaalillutik eqqartuussisuunerit uppernarsineqartutut isumaqarfigivaat, unnerluutigineqartup arnaq atoqatigisimagaa unnerluussissummi oqaatigineqartutut qanoq iliuuseqariarsinnaanngitsoq.

Nunatta eqqartuussisuuneqarfiata pineqaatissiissut aalajangersarpaa qaammatini pingasuni pineqaatissinneqarsimasunut inissiisarfimmiittussanngortinneqarnermik, tak. Pinerluttulerinermik inatsimmi § 147, imm. 1, tak. § 146, tak. § 77, imm. 1, nr. 2.

Nunatta eqqartuussisuuneqarfiata pingaartippaa, pineqartoq tassaammat inatsimmik unioqqutitsineq peqqarniitsoq, aallaavittullu qaammatit sisamat missaannik pineqaatissinneqarsimasunut inissiisarfimmiittussanngortitsissutaasartoq.

Aamma nunatta eqqartuussisuuneqarfiata isiginiarpaa suliap suliarineqarnerata sivisusimanera, suliamilu paasissutissat naapertorlugit tamanna unnerluutigineqartumit pisuussutigineqanngilaq, aamma unnerluutigineqartoq imminut suliarisimavoq imigassamik aalakoornartulimmik atuinini pillugu, taamaalilluni inuttut atugarisai pitsaasuullutik.

Eqqartuussisarnermi periuserineqartartoq nalinginnaasoq malillugu unnerluutigineqartup arnap mitagaaneranut ajunngitsorsiassatut akilissavai 50.000 kr.-it.

Unnerluutigineqartoq eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni.

Unnerluutigineqartup sapaatit akunneri sisamat qaangiutsinnagit akilissavai  50.000 kr.-it arnamut.

Suliap normua: K 218/22

Eqqartuussissutit nassuiaatillu