Appartinneqarluni ukiumut ataatsimut - K 149/23

Eqqartuussissut Nunatta Eqqartuussisuuneqarfianit oqaatigineqarpoq ulloq 12. juli 2023.

Retsgenetiskemik misissuinerup imaaniit, tassunga ilanngullugu pingaartumik dna-mik nassaartoqarsimanera ilimanaatilerujussuarmik unnerluutigineqartumeersuunera, tassa pinerlisap utsuisa ammarngani aamma pinerlisap ilupaqutaani, kiisalu pinerlisap utsuisa ilorpiaani dna-mik nassaartoqarnera unnerluutigineqartumeersuusinnaasumik, aamma unnerluutigineqartup usuata aallartinnerani aamma usuata qaavani dna nassaarineqarmat ilimanaatilerujussuarmik pinerlisameersuusoq, sanilliunneqarlutik paasissutissat, tassa ulloq taanna unnerluutigineqartup pinerlisaq kisimeeqatigisimagaa aamma arnap ilisimannittup nassuiaaneratigut aammalu eqqartuussisoqarfimmut tunngavittut oqaatigineqartunit, nunatta eqqartuussisuuneqarfianit eqqarsarnartoqartinneqanngilaq uppernarsineqartutut isigineqartariaqarmat, unnerluutigineqartup piffissami sumiiffimmilu unnerluussissummi taaneqartumi pinerlisaq atoqatigisimagaa.

Pinerlineqartup eqqarsartaatsimigut qanoq innera pillugu paasissutissanit, tassunga ilanngullugit pinerlisap piginnaasai, aamma uppernarsaaseereernermi nunatta eqqartuussisuuneqarfianit uppernarsineqarpoq, pinerlisaq eqqarsartaatsimigut inortuummat, aammalu unnerluutigineqartup taassuma silamigut inortuunnera atornerlullugu atoqatigisimammagu. Tunuliaqutaalu aamma taanna tunngavigalugu paasissutissat pinerlisap oqaaseqannginneranik aamma timimigut innarluuteqarneranik tunnasutigut aamma isumaqatigineqarpoq, pinerlisaq piviusumik ima inissisimammat, iliuuserineqartumut akiuuteriarsinnaanani, unnerluutigineqartullu pinerlisap angerlarsimaffiani paarsisutut atorfeqartinneqarsimasup ilisimasimallugu qanoq taassuma inissisimanera.

Nunatta eqqartuussisuuneqarfianit uppernarsineqarpoq unnerluutigineqartoq pisuusoq unioqqutitsinermut, taamanikkut atuuttoq pinerluttulerinermik inatsit § 77, imm. 1, nr. 2, tak. § 78, imm. 1 aamma imm. 3, nr. 3, (maannakkut atuuttoq pinerluttulerinermik inatsimmi § 77, imm. 1, tak. § 78, imm. 1 aamma imm. 3, nr. 3).

Pingaartumik paasissutissat pinerlisap piginnaanikitsuararsuunerani tunngasitigut, aamma unnerluutigineqartup pinerlisap eqqarsartaatsimigut inortuuneranik atornerluineratigut naammassiilluni atoqatiginninnermik taassuma angerlarsimaffiani, kiisalu unnerluutigineqartoq angerlarsimaffimmi paarsisutut atorfeqarluni pinerlisamik isumassuinissamik isumaginnittussaalluni, nunatta eqqartuussisuuneqarfia isumaqarpoq pineqaatissiissut aalajangersarneqassasoq ukiumi ataatsimi pineqaatissinneqarsimasunut inissiisarfimmiittussanngortinneqarnermik. Nunatta Eqqartuussisuuneqarfia isumaqarpoq, pisimasoq – naallu pinerlisap piginnaasamigut appasissorujussuarmik inissisimagaluartoq – eqqartuussisoqarfiup eqqartuussutaani oqaatigineqartutut sanilliussisoqarsinnaanngilaq meeqqamik 12-it inorlugit ukiulimmik pinngitsaaliinertut.

Pisimasup isikkua malillugu aamma unnerluutigineqartup inuttut atugai pillugit paasissutissanit, nunatta eqqartuussisuuneqarfiata isumaqatigivaa unnerluutigineqartoq pinerluttulerinermik inatsimmi § 165, imm. 2, uniffik siulleq, tak. imm. 1 aamma imm. 3, arsaarinniffigineqassasoq ukiuni pingasuni ingerlatseqqusaajunnaarsinneqassasoq, imaqartunik paarsinertalinnik angerlarsimaffinni paaqqinniffiusuni, angerlarsimaffinni illersukkani angerlarsimaffinniluunniit assingusuni, inunnit timikkut aamma/imaluunniit tarnikkut innarluuteqartuni assigisaaniluunniit.

Pisimasup isikkuatigut nunatta eqqartuussisuuneqarfia isumaqarpoq, tak. Taarsiisussaatitaanermik akisussaassuseqarnermi inatsimmi § 26 malillugu ajunngitsorsiassaq aalajangersarneqassasoq 50.000 kr.-inut.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, pineqaatissinneqarsimasunut inissiisarfimmiittussanngortinneqarnerup sivisussusia appartinneqarluni ukiumut ataatsimut, aamma mitagaanermut ajunngitsorsiassaq appartinneqarpoq 50.000 kr.-inut.

Suliap normua: K 149/23

Eqqartuussissutit nassuiaatillu