17 aug 2023
Nunatta Eqqartuussisuuneqarfia
Nalunaaquttap akunnerini 40-ni inuiaqatigiinni sulisitaasussatut -K 063/23
Angut 44-nik ukiulik Qaasuitsup eqqartuussiviani eqqartuunneqarpoq utaqqisitamik ulluni 30-ni pineqaatissinneqarsimasunut inissiisarfimmiittussanngortinneqarnermik. Panini arlaleriarluni nakuuserfigisimagamiuk niaquatigut natermit qangattartillugu kivinneratigut.
Eqqartuussissut Nunatta Eqqartuussisuuneqarfianit oqaatigineqarpoq ulloq 17. august 2023.
Nunatta eqqartuussisuuneqarfia isumaqarpoq eqqunngitsuliorfigineqartoq, niviarsiaraq uppernartumik nassuiaateqartoq ilisimannittut allat nassuiaataannit taperserneqartumik. Nunatta eqqartuussisuuneqarfiata taamalilluni uppernarsarneqartutut nalilerpaa unnerluutigineqartup unnerluussummi piffissami sumiiffimmilu allassimasutut panini arlaleriarluni nakuuserfigisimagaa niaquatigut natermit qangattartillugu kivinneratigut. Nunatta eqqartuussisuuneqarfiata taama oqaaseqaateqarluni isumaqatigaa unnerluutigineqartoq unnerluunneqarnermisut pisuutinneqartoq.
Illersuisup tunngavissatut allataatut isummertoqarsinnaavoq eqqartuussisoqarfiup niviarsiaqqap nassuiaataa misilinnagu tunngavigisimagaa. Nunattali eqqartuussisuuneqarfiata tunngavissaqartinngilaa isummissalluni eqqortumik uppernarsaatinik naliliineq suliap allatut inerneqarneranik kinguneqarsimassagaluartoq. Taamaalilluni eqqartuussutip suliareqqitassanngortitsissutip atorunnaarsinnissaanut tunngavissaqanngilaq, tak. eqqartuussisarnermik inatsimmi § 559, imm. 1.
Pineqaatissiissut aalajangersarneqarpoq nalunaaquttap akunnerini 40-ni inuiaqatigiinni sulisitaanertut qaammatit arfinillit sivisunerpaaffissaasut iluanni, tak. pinerluttulerinermi inatsimmi § 88, tak. § 141, imm. 1. Unnerluutigineqatoq tamatuma saniatigut Pinerluttunik Isumaginnittoqarfimmit ukiumi ataatsimi nakkutigisassanngortinneqarpoq, tak. pinerluttulerinermi inatsimmi § 141, imm. 2. Nunatta eqqartuussisuuneqarfiata pingaartippai unnerluutigineqartup inuttut atugaanut sanilliullugu pisimasup qanoq issusia, tassunga ilanngullugu unnerluutigineqartup ukiorpaaluit qaangiummata pillarneqarsimanera suliamillu suliarinninnermut piffissaq sivisooq ingersimasimasoq.
Allassimasutut eqqartuussisoqarfiup eqqartuussutaa allanngortinneqarpoq.
Unnerluutigineqartoq, qaammatini arfinilinni sivisunerpaaffissaligaasut iluanni nalunaaquttap akunnerini 40-ni inuiaqatigiinni sulisitaasussatut eqqartuunneqassasoq. Tamatuma saniatigut unnerluutigineqartoq Pinerluttunik Isumaginnittoqarfimmit ukiumi ataatsimi nakkutigisassanngortinneqassasoq.
Suliap normua: K 063/23
Eqqartuussissutit nassuiaatillu