Allagaatit

Allagaatinik takunninnissamut qinnuteqaatit allakkatigut qinnutigissavat.

Suliaq aalajangersimasoq suliamilu allagartaq allakkiaq aalajangersimasoq takorusutat innersuutissavat.

Eqqartuussiviup ullut qulit qaangiutsinnagit piumasaqaatit akuerineqarsinnaanersoq, aalajangissavaa. Eqqartuussiviup ass. suliap annertussusaa pisariussusaaluunniit peqqutigalugu ullut qulit suliffiusut qaangiutsinnagit angumersisinnaanngikkuni tunngavilersuuteqarluni nalunaarfigissavaatit.

Eqqartuussiviup allagaatinik takusaqarsinnaassanersutit aalajangersimappagu suliami allakkiat uppernarsaatit attuumassutillit, kinaassutsinik isertuussassanngortinneqarnissaannut nassiunneqassapput.

Suliap annertussusaata sullissinermut sunniuteqarsinnaanera maluginiassavat.

Suliami allagaatinik takunnissinnaanermik qinnuteqarniaruit eqqartuussivimmut attavissat uani takusinnaavatit:

• Uunga e-mailimut allagit: adm.rig@domstol.gl
• Tusagassiortuuguit suliamullu aalajangersimasumut apeqqutissaqarlutit, Kalaallit Nunaanni Eqqartuussivimmi eqqartuussisoq tusagassiutinut attaveqartartoq uani attavigisinnaavat.

Eqqartuussiviup allagaatinik takusinissarnut qinnuteqaatit akuerinngippagu, aalajangiinera pillugu naammagittaalliorsinnaavutit. Taamaaliorneq aalajangeqqitassanngortitsinermik taaneqartarpoq.

Aalajangeqqitassanngortitsineq pissaaq eqqartuussiviup aalajangiineraniit ullut 14-it qaangiutsinnangit.  

Kalaallit Nunaanni Eqqartuussivimmut aalajangeqqitassanngortitsinermut allakkiamik tunniussillutit aalajangeqqitassanngortitsisinnaavutit.

Eqqartuussiviup kingorna aalajangeqqitassanngortitsinermut allakkiaq Nunatta Eqqartuussisuuneqarfianut ingerlateqqissavaa.

Aalajangeqqitassanngortitsinermut allakkiaq qinnuteqartup piumasaqaataanik aalajangeqqitassanngortitsissummullu tunngavilersuutinik imaqassaaq.

Saqitsaannermik suliami eqqartuussutip allattorsimaffiata, eqqartuussisut suliaannik allattorsimaffiup kiisalu ilanngussat assilineqarnerinik aamma pisoqarsinnaavoq. Taamaaliornissamulli eqqartuussinermi apeqqummut aalajangersimasumut inuttut ataasiakkaatut pingaarutilimmik soqutigisaqarnissaq piumasaqaataavoq.

Illuatungeriit eqqartuussutip allattorsimaffiata, eqqartuussisut suliaannik allattorsimaffiup kiisalu suliami ilanngussat assilineqarnerinik pisinnaapput.

Tusagassiortut, tusagassiuisarnermi akisussaassuseqarneq pillugu inatsimmi § 1-mut ilaasut, nalinginnaasumik eqqartuussutip allattorsimaffiata eqqartuussisullu suliaannik allattorsimaffiup assilineqarnerinik pisinnaasarput.

Piumasaqartoqartillugu unnerluussisussaatitaasut unnerluussutip imaluunniit eqqartuussisoqarnissaanik piumasaqaatip assilineqarneranik tunniussissarput. 

Isumaqatigiissuteqareerlutit eqqartuussivimmut nammineq saaffiginnillutit eqqartuussummik atuaqqissaarnissarnut akuerineqarsinnaavutit.

Eqqumaffigissavat tusagassiortut allagaatinik atuinerat toqqorsisarnerallu pillugit immikkut inatsiseqarmat.

Allagaatinik takusinissarnut piumasaqarneq ulluni suliffiussuni qulini suliarineqarsinnaavoq, suliap annertussusaa imaluunniit pisariussusaa peqqutaalluni pisinnaannginnera eqqaassanngikkaanni. Taamaattoqartillugu qinnuteqartoq piffissaliussap qaangerneqarnerata peqqutaanik qaqugulu piumasaqaatip naammassineqarnissaata naatsorsuutigineqarneranik paasitinneqassaaq.

Allagaatinik takunnissinnaaneq suliat ilaanni killilersorneqarsinnaasarpoq. Suliat tamakkiisumik ilaannakortumilluunniik matoqqasumik suliarineqarsimatillugit tamanna atuuttarpoq. Tamanna aamma atuuppoq pinerlunnermik suliani ingerlanneqartuni aamma pinerlunnermik suliani ukioq ataaseq sinnerlugu inaarutaasumik naammassineqareernikuni.

Allagaatinik takunnissinnaanermut periarfissaqarninnut aamma apeqqutaasinnaavoq illuatungiusuunersutit imaluunniit suliamut nammineq immikkut soqutigisaqartuunersutit.  

Tusagassiortut, tusagassiuisarnermi akisussaassuseqarneq pillugu inatsimmi § 1-mut ilaasut, immikkut ittumik annertusisamillu allagaatinik atuisinnaatitaapput, ilaatigut suliami allagartat uppernarsaatit ilaallutik, taamaattorli aamma aalajangersimasunik killilersuinertalimmik. Aalajangiinerit eqqartuussisarnermi inatsimmi kapitalik 7 a-miipput.

Malunginiaruk, pinerlunnermik suliani allagaatinik eqqartuussummiit allaanerusunik takunninnissamut piumasaqarneq politiinut tunniunneqartussaammat taakkunanilu suliarineqartussaalluni tak. eqqartuussisarnermi inatsimmi § 101 d, imm. 2.

Pinerlunnermik suliani ukioq ataaseq sinnerlugu inaarutaasumik naammassineqareersuni, allagaatinik takunninnissamut piumasaqarneq politiit pisortaannut tunniunneqassaaq, tusagassiortumit allagaatinik takunninnissamut ujartuineq uani pineqanngilaq.

Politiinut attaveqarnissamut paasissutissat uani nassaarineqarsinnaapput www.politi.gl.