Toqusimasut pigisaannik suliat

Qanigisavit ilaat toquppat, eqqartuussiviup isumagissavaa kingornussassat agguaanneqarnissaatToqusup pigisaanik nalunaarsuineq aallartittarpoq, palaseqarfiup toqusoqarsimaneranik nalunaarut sanagaangagu eqqartuussivimmullu illoqarfimmi, toqusup najugaqarfigisaanut nassiukkaangagu. Eqqartuussiviup tamatuma kinguneranik isumagissavaa naatsorsussallugit, toqusup nalillit suut piginerai.

Nalinginnaasuuvoq toqusoqarneraniit qaammatit marluk ingerlaqqaartartut eqqartususiviup toqusoqarneranik nalunaarummik tigusinissaanut pigisallu nalilersorneqarnissaannut. Ikiorsiiniarluni eqqartuussiviup qinnuigissavaasi imersugassaq immersoqqullugu, tassani paasinarsissammat, toqusoq nalilinnik pigisaqarnersoq.

Inatsisitigut kingornussisarnermut inatsisini malittarisassat aamma immaqa toqusup kingornussassialiaatigut aalajangersarneqarsimassaaq, nalillit qanoq agguaanneqassanersut. Aallaaviussaaq eqqartuussiviup qinnuigippasi isumaqatigiissasusi, kiap suna pissaneraa.

Tamanna ajornarpat, eqqartuussiviup nalillit agguaatissavai. Ilaatigooriarluni ataatsimut pigisat agguaanneqartussaasarput, toqusumit kingornussassat agguaatinnginnerini. Toqusup aappatut katissimasaa pisinnaatitaavoq pigisat nikisinnagit pigiinnarnissaannut.

Toqusoq pigisaminit annertunerusumik akiligassaqarpat, pigisai nalillit nalinginnaasumik tuniniarneqartussaasarput aningaasallu toqusup akiligassaqarfigisaanut agguaanneqarlutik. Taamaalillutik kingornussisussat kingornussinngitsuussapput.

Ilaatigut, kingornussassat annikitsuaraannaappata, agguarneqarsinnaapput nalunaarsueqqaanngikkaluarluni agguaassineqaranilu. Taamaattoqartillugu eqqartuussivik amerlasuutigut aalajangissaaq kingornussisussap ataatsip kingornussassat tamaasa pissagai. Nalinginnaasuuvoq tassaasoq kingornussisussaq, ilisinermi aningaasartuutinik akiliuteqarsimasoq.

Pigisatit aappavillu toqusup pigisai nalillit akiligassallu ataatsimut pigisat nalunaarsorneqarneranni ilaatinneqassapputAappat annaagukku, periarfissaqarnallu pigisat nikisinnagit pigiinnarnissaat, taava ataatsimut pigisat nalunaarsorneqassapput, aappariittut aalajangersagaqarsimanngikkussi tamassi immikkut pigisaqarnissinnik imaqartumik.

Aappallu katissimasat avissagussi, aappariillu aalajangersagaannik sanasimanasi, taava ataatsimut pigisat nalunaarsorneqarlutillu agguaanneqassapput.

Ataatsimut pigisat nalunaarsorneqarnernerat agguaanneqarnerallu ingerlanneqalerpat aappaasup pigisai nalillit aamma akiligassai allattorneqassapput immikkoortillugit. Eqqartuussiviup naatsorsussavaa aappariit immikkut sinneqartoorutaat amigartoortaallu.

Aappaasut tamarmik sinneqartoorutigisinnaasaat marlunngorlugit avinneqassapput. Amigartoorut avinneqassanngilaq. Ataatsimut pigisat nalunaarsorneqarnerini agguaannerinilu aallaaviuvoq aappariit annertoqatigiimmik immikkukt pigisaqartut.

Immikkut pigisat agguaanneqassapput, taamaalilluni aappaasut tamarmik immikkut pigisanit nalilinnit tigusissapput. Pigisanut ilaappat akiitsut, akiitsut pigisamut atasut aappasup tigusaanut, taava taassuma akiligassat tigussavai.

Aallaaviuvoq aappaasup, pigisamik nalilimmik pillip pigisaminut ilaatitaminik taava agguaannerini pigisani taanna tigusinnaavaa, aappaasup pigisaanut naleqqiullugu nalingata aappaasup pigisaasa nalingat qaangersimanngippagu.

Pisariaqalersinnaavoq pigisat nalillit tuniniarnissaat, taamaalillusi tamassi immikkut pigisasi nalingisa affaat pissagassigit. Illuteqarsimaguit, aappallu biileqarluni, piasriaqarsinnavoq illup tuniniarneqarnissaa. Aapparpit akerlianik biilini tunisariaqanngilaa, illumit taanna nalikinnerummat taannalu taassuma pigisaanut ilaatinneqaannarluni.

Qanigisaasutut, arlaannik nalornissuteqarussi, tikilluaqqunarpusi eqqartuussivimmut atassuteqarnissamut apeqquteqarlusilu.

Eqqartuussiviulli toqusup aalajangersimasup pigisaanut atatillugu ilitsersorsinnaanngilaasi, toqusoqarsimaneranik nalunaarut tigoqqaartinnagu.

Immikkoortortami Sermersuumi pigisanik agguaassinermut suliat: Attaveqarfigiuk:
Eqqartuussisoqarfik Sermersooq

Immikkoortortami Kujallermi pigisanik agguaassinermut suliat: Attaveqarfigiuk:
Eqqartuussisoqarfik Kujalleq

Immikkoortortami Qeqqani pigisanik agguaassinermut suliat: Attaveqarfigiuk:
Qeqqata Eqqartuussisoqarfia

Immikkoortortami Qaasuitsumi pigisanik agguaassinermut suliat: Attaveqarfigiuk:
Qaasuitsup Eqqartussisoqarfia

Aappat katissimasat toquppat qitornaqarlusilu, taava pigisat nikisinnagit pigiinnarsinnaavatit.Tamanna ima paasisariaqarpoq, ataatsimoorlusi najukkassinniiginnarsinnaasutit, aammalu aapparpit pigisaasa nalillit qitornassinnut agguaanissaat kinguartinneqartoq toqukkut qimagutereernissannut.

Pigisat nikisinnagit pigiinnarsinnaavatit, aatsaat ataatsimoortumik taamaallaat qitornaqarussi. Aappat toqukkut qimaguttoq immikkut qitornaqarsimappat (illit qitornarinngisannik), taava taakku akuersisariaqarput atsiorlutillu, pigisat nikisinnagit pigiinnarsinnaagitit. Meeqqat ukiukitsuuppata, taava taakkununnga angajoqqaatut akisussaasuusoq atsiussaaq pigisat nikisinnagit pigiinnassagitit meeqqat nammineersinnaassuseqalernissaat tikillugu.

Toqunissaq sioqqullugu kingornussassialiorneq pitsaasuusoq, aamma ajunngilluinnassaaq immikkut qitornat siumoortumik isumaqatigiissuteqarfigigaanni pigisat nikisinnagit pigiinnarneqarnissaannik imaqartumik.

Aappat kingornussisussaqarsimanngippat (meeqqat, ernuttat il. il.) kingornussassialiorsimananilu, aallaavigineqassaaq illit kisivit kingornussisussaasutit pigisallu nalillit pigiinnarsinnaallugit.

Aappallu aappariit aalajangersagaannik sanasimanngikkussi nammineq pigisasi tamakkiisumik immikkut pigiinnassagisi, taava taamaaliornikkut pigisat nikisinnagit pigiinnarnissaat pisinnaajunnaarsimassuat. Tamannali atunngilaq, taamaallaat avinnermi pigisassi immikkut pigiinnarnissaannut imaqartumik aappariit aalajangersagaannik sanasimagussi.