Ikuallatsitsinermi pisuutinneqarpoq - K 080/23

Eqqartuussissut Nunatta Eqqartuussisuuneqarfianit oqaatigineqarpoq ulloq 19. juni 2023.

Pisimasoq 9-mi nunatta eqqartuussisuuneqarfianit eqqartuussisoqarfiup uppernarsaasiinermi inerniliinera isumaqatigivaa, tassani unnerluutigineqartup pisuunerarfigisaani pisuutinneqarnera ikuallatsitsinermi, tak. pinerluttulerinermik inatsimmi § 65, imm. 1, siulleq, kisianni pinngitsuutinneqarfigisaa ulorianartorsiortitsinermi, tak. pinerluttulerinermik inatsimmi § 90, imm. 2. Taamaalilluni aamma nunatta eqqartuussisuuneqarfianut uppernarsaasiiffigineqanngilaq unnerluutigineqartup ikuallatsitsinerani illup iluata inoqarsimanera. Nunatta eqqartuussuuneqarfiata tamatumani pingaartippaa ilisimannittup nassuiaanera, tassa illup iluaniitilluni putsumik takusaqarsimanerarnera, tamanna nassuiaatit sinnerinit aamma suliami paasissutissat sinnerinut naapertuutinngimmat, aamma ilisimannittup nammineerluni nassuiaammat imersimanini pissutigalugu sofami sinilersimalluni, taamaattumik nassuiaanera uppernanngitsutut nalilerneqarluni tunuartinneqarpoq.

Aamma nunatta eqqartuussisuuneqarfiata eqqartuussisoqarfiup eqqartuussutigalugu pineqaatissiinera isumaqatigivaa. Tassa siullertut nunatta eqqartuussisuuneqarfianit pingaartinneqarmat unnerluutigineqartup pisuutitaanera nakusernermi ilungersunartumi, siorasaarinermi § 98-mi oqaatigineqartutut kiisalu ikuallatsitsinermi, tak. pinerluttulerinermik inatimmi § 161, imm. 1, nr. 1. Pinerluttulerinermik inatsimmi § 161, imm. 1, nr. 2 aamma 3-mut atatillugu, nunatta eqqartuussisuuneqarfianit pingaartinneqarpoq eqqarsartaatsimigut misissuiffigineqarsimanera aamma eqqartuussinermi nakorsat isumasiortagaasartut nalunaarusiaat, sanilliunneqarlutik paasissutissat unnerluutigineqartup siusinnerusukkut eqqartuunneqartarnerpassui siorasaarinerit aamma nakuusernerit, tassani ilaatinneqarluni nammineq ataataminut, kiisalu maannakkut inatsisinik unioqqutitsinerit eqqartuussaassutigisaani siorasaarinerit, nakuusernerit aamma ikuallatsitsineq, tassunga ilanngunneqarluni angumminut peqqarniitsumik nakuuseqqinnera ilaatigut toqqusassillugu peqatigitillugu siorasaarinera toqunniarlugu kiisalu angummi illuanik ikuallatsitsinera. Aamma nunatta eqqartuussisuuneqarfianit pingaartinneqarpoq unnerluutigineqartup nammineerluni nassuiaanera inuttut atugarisani pillugit, tamatumani unnerluutigineqartup uppernarsarmagu eqqarsartaatsimigut misissorneqarnermini oqarsimammat imerunnaarusunnani, pikkunaatsumik inuuneqaleqinagami naalattoorusunnanilu. Aamma unnerluutigineqartumit oqaatigineqarpoq maannakkut ukioq ilivitsoq aalakoorsimanani ”soqutigiunnarsimallugulu” imigassamik aalakoornartulimmik aamma hashimik atueqqinnissani, taamaakkaluartorli sukumiinerusumik oqaluttuarisinnaanagu qanoq iliorluni qulakkiissanerlugu siunissami atuipilunnertaqanngitsumik inuunerinnerusinnaanerluni. Taamatullu aamma ersarippoq unnerluutigineqartoq ataavartumik angumminut kamassaqartorujussuusoq, peroriartornermini aamma inersimasuunermi angummi imminut pissusilersuutigisartagai pillugit. Eqqartuussisuuneqarfik isumaqarpoq tunngavilersuutitut oqaatigineqartut tunngavigalugit, unnerluutigineqartoq inuit allat inuunerannik, timaannik imaluunniit kiffaanngissuseqarnerannik ulorianartorsiortitsisinnaasut, taamaattumillu immikkut isumagisassanngortitsisoqarnissaa pisariaqarluni taamatut ulorianassusia pinaveersimatinniarlugu, pissutigalugu maannakkut aalajangersarneqarsinnaanngimmat qaqugu unnerluutigineqartoq taamatut ulorianarunnaarsinnaanersoq.

Tamanna tunngavigalugu nunatta eqqartuussisuuneqarfiata eqqartuussisoqarfiup eqqartuussutaa tamakkiisumik atuuttussanngortippaa.

Suliap normua: K 080/23

Eqqartuussissutit nassuiaatillu