27 jul 2023
Nunatta Eqqartuussisuuneqarfia
Eqqartuussisoqarfiup eqqartuussutaa atuuttussanngortinneqarpoq - K 046/23
Arnat inuusuttut sisamat eqqartuunneqarput, pingasut ulluni 40-ni utaqqisitamik inissiisarfimmiittussanngortinneqarlutik, kingullerlu ulluni 14-ni. Taakkua peqatigiillutik aammalu isumaqatigeereerlutik arnaq saassukkamikku timaatigut niaquatigullu qasseeriaqalutik annersarlugulu isimmigarlugu.
Eqqartuussissut Nunatta Eqqartuussisuuneqarfianit oqaatigineqarpoq ulloq 27. juli 2023.
Nunatta eqqartuussisuuneqarfianit pingaartinneqarput tunngavigineqarlutik assigiimmik nassuiaatigineqartut, unnerluutigineqartut marluk, peqatigiillutik blok 3-mukarsimasut taassanilu pineqartumukarsimallutik oqaloqatiginiarlugu. Nunatta eqqartuussisuuneqarfianit uppernarsaasiisoqareerneratigut uppernarsineqanngilaq, siumut pilersaarusiortoqareersimanera pineqartup saassunneqarnissaa pillugu.
Eqqartuussisoqarfimmit tunngavilersuutitut oqaatigineqartut tunngavigalugit, nunatta eqqartuussisuuneqarfiani uppernarsineqarpoq pineqartoq nakuuserfigineqarsimasoq eqqartuussisoqarfiup oqaatigisaatut annertutigisumik. Unnerluutigineqartoq pingajuat nammineerluni nassuiaanermigut nassuerpoq, peqataaffigisimallugu nakuuserneq. Unnerluutigineqartup sisamaat nassuiaaneratigut nunatta eqqartuussisuuneqarfianit tunngavigineqarpoq, unnerluutigineqartup sisamaata pineqartoq nujaasigut tigusimagaa, taamaalinerani unnerluutigineqartut siulliit marluk pineqartoq annersaraat. Nunatta eqqartuussisuuneqarfia isumaqarpoq unnerluutigineqartut sisamaat taamalinerani nakuusernermut ilanngussimasoq. Taamaattumik aamma eqqartuussisoqarfiup tunngavilersuutigisaatut uppernarsineqarpoq unnerluutigineqartut peqatigiillutik eqqartuussisoqarfiup oqaatigisaatut annertutigisumik pisuusut unnerluutigineqaatiminnut.
Nunatta eqqartuussisuuneqarfiata isumaqatigivaa, unnerluutigineqartup pingajuat pineqaatissinneqarnera utaqqisitamik ulluni 40-ni pineqaatissinneqarsimasunut inissiisarfimmiittussanngortinneqarnermik ukiumik ataatsimik miligaaffilikkamik, aamma unnerluutigineqartup sisamaata pineqaatissinneqarnera utaqqisitamik ulluni 14-ni pineqaatissinneqarsimasunut inissiisarfimmiittussanngortinneqarnermik ukiumik ataatsimik misiligaaffilikkamik. Tamatumani isiginiarneqarpoq unnerluutigineqartut pinerliinerup pinerata nalaani inuusunnerat, pineqartullu piffissami sivisuumi unnerluutigineqartup pingajuat peqqarniitsumik uumisaartarsimagaa, kiisalu uppernarsaasiissuteqartoqareerneratigut tunngavigineqartariaqartoq, unnerluutigineqartup sisamaat annikinnerusumik nakuuserfiginninnermi iliuuseqarsimanera. Aamma isiginiarneqarpoq piffissap ingerlasimanera aamma piffissaq suliap suliarineqarneqarnerani atorneqarsimasoq.
Nunatta eqqartuussisuuneqarfianit eqqartuussisoqarfiup eqqartuussutaa atuuttussanngortinneqarpoq suliareqqitassanngortinneqartortaatigut.
Eqqartuussisoqarfiup eqqartuussutaa atuuttussanngortinneqarpoq.
Suliap normua: K 046/23
Eqqartuussissutit nassuiaatillu