Nunatsinni eqqartuussisoqarfiit

Nunatsinni eqqartuussisoqarfiit

Eqqartuussiviit attavigisinnaavatit qanigisannik toqukkut qimaguttoqartillugu, pinerlittulerinermi akuusimaguit, ilaqutariinnut suliamut tunngassutilinni imaluunniit akiligassamut tunngasuni suliami ilaasimaguit.

 

 

 

Pinerluttulerinermi suliassat

Pinerluttulerinermi suliassat eqqartuussivimmi suliarineqartarput, pinerluttuliortoqarsimagaangat, politiillu isumaqarpata uppernarsarsinnaallugu kina pinerluttuliorsimanersoq.Pinerluttulerinermi suliassat aallartinneqartarput inunnut, pinerluttuliorsimasutut pasillerneqartunut. Pinerluttulerinermi suliassat politiit aallartittarpaat paasiniaanermik.


Politiit isumaqarpata, inummut ataatsimut arlalinnulluunniit naammattumik uppernarsaatissaqarlutik, taava taakku suliami pasisaalersarput. Tamatuma kingorna unnerluussisussaatitaasut suliassaq eqqartuussivimmut nassiuttarpaat.


Paasiniaanermut imaluunniit isumannaatsuunissamik tunngaveqartumik pisariaqartinneqaraangat, unnerluussisussaatitaasut eqqartuussivik qinnuigisarpaat inup pasisap tigummigallagassanngortinneqarnissaanik, eqqartuussuteqarfigineqannginnerani.


Eqqartuussivinni suliassani politiit illoqarfimmiittut unnerluussisussaatitaasarput. Suliaq nunap eqqartuussisuuneqarfianut suliareqqitassanngortinneqarpat politimesteqarfik unnerluussisussaatitaasarpoq.


Pasisaq eqqartuussinissamut aggersarneqartarpoq tassungalu ilanngullugu tunniunneqartarpoq unnerluussut. Pasisaasoq tamatuma kingorna taaneqartarpoq "unnerluutigisamik".


Unnerluussutip ilaatigut imarissavaa suliap sumut tunngasumik naatsumik allaaserineqarnera, aamma malittarisassat suut unnerluutigisap unnerluussisup isuma malillugu unioqqutissimanerai.


Pinerluttulerinermi suliani unnerluutigisaq eqqartuunneqarsinnaavoq inissiisarfimmut inissinneqarnermik, inissiisarfimmut inissinneqarnermik patsisitalimmik, inuiaqatigiinni sulisitaanermik imaluunniit akiliisitsissummik. Inummut ulorianartumik pinerlunneq soorlu peqqarniitsumik nakuuserneq, pinngitsaaliilluni kujanninneq aamma toqutsineq nalinginnaasumik kinguneqartinneqartarput inissiisarfimmut inissinneqarnermik.


Pinerluttulerinermi suliani eqqartuussutit nunap eqqartuussisuuneqarfianut suliareqqitassanngortinneqarsinnaapput.

 

Suliassat ilaqutariinnut tunngasut

Toqusup pigisaanik nalunaarsuineq

Qanigisavit ilaat toquppat, eqqartuussiviup isumagissavaa kingornussassat agguaanneqarnissaatToqusup pigisaanik nalunaarsuineq aallartittarpoq, palaseqarfiup toqusoqarsimaneranik nalunaarut sanagaangagu eqqartuussivimmullu illoqarfimmi, toqusup najugaqarfigisaanut nassiukkaangagu. Eqqartuussiviup tamatuma kinguneranik isumagissavaa naatsorsussallugit, toqusup nalillit suut piginerai.


Nalinginnaasuuvoq toqusoqarneraniit qaammatit marluk ingerlaqqaartartut eqqartususiviup toqusoqarneranik nalunaarummik tigusinissaanut pigisallu nalilersorneqarnissaannut. Ikiorsiiniarluni eqqartuussiviup qinnuigissavaasi imersugassaq immersoqqullugu, tassani paasinarsissammat, toqusoq nalilinnik pigisaqarnersoq.


Inatsisitigut kingornussisarnermut inatsisini malittarisassat aamma immaqa toqusup kingornussassialiaatigut aalajangersarneqarsimassaaq, nalillit qanoq agguaanneqassanersut. Aallaaviussaaq eqqartuussiviup qinnuigippasi isumaqatigiissasusi, kiap suna pissaneraa.


Tamanna ajornarpat, eqqartuussiviup nalillit agguaatissavai. Ilaatigooriarluni ataatsimut pigisat agguaanneqartussaasarput, toqusumit kingornussassat agguaatinnginnerini. Toqusup aappatut katissimasaa pisinnaatitaavoq pigisat nikisinnagit pigiinnarnissaannut.


Toqusoq pigisaminit annertunerusumik akiligassaqarpat, pigisai nalillit nalinginnaasumik tuniniarneqartussaasarput aningaasallu toqusup akiligassaqarfigisaanut agguaanneqarlutik. Taamaalillutik kingornussisussat kingornussinngitsuussapput.


Ilaatigut, kingornussassat annikitsuaraannaappata, agguarneqarsinnaapput nalunaarsueqqaanngikkaluarluni agguaassineqaranilu. Taamaattoqartillugu eqqartuussivik amerlasuutigut aalajangissaaq kingornussisussap ataatsip kingornussassat tamaasa pissagai. Nalinginnaasuuvoq tassaasoq kingornussisussaq, ilisinermi aningaasartuutinik akiliuteqarsimasoq.

 

Aningaasanik akiliisitsiniarnermi suliassaq

1. juli 2014 aallarnerfigalugu saqitsaannermik suliassat nalinginnaat Kalaallit Nunaanni Eqqartuussivimmi suliarineqartalissapput, Eqqartuussisoqarfinniunngitsoq. 


Inatsisartut Folketingilu eqqartuussisoqarfinnut suliniuteqarnerunerminnut atatillugu aalajangerput saqitsaannermik suliassat nalinginnaat Kalaallit Nunaanni Eqqartuussivimmi 1. juli 2014 aallarnerfigalugu suliarineqartalissasut. Tassa imaappoq suliassat Kalaallit Nunaanni Eqqartuussivimmi pinngitsooratik suliarineqartassapput, suliami illuatungeriit Nunatsinni piffinni assigiinngitsuni najugaqaraluarpataluunniit. 


Saqitsaannermik suliassat nalinginnaasut tassaapput aningaasanik akileeqqusinerit, aalajangersimasumik iliuuseqarnissamik pisussaaffiit/aalajangersimasumik iliuuseqarunnaarnissamik imaluunniit piginnaatitaaffimmik akuersititsinissamik suliassiissutit. 

 

Paasissutissat kingulliit: 30. apriilip 2020