Pineqaatissinneqarsimasunut inissiisarfimmiittussanngortitsineq - K 138/20

Eqqartuussissut Nunatta Eqqartuussisuuneqarfianit oqaatigineqarpoq ulloq 26. februar 2021.

Unnerluutigineqartoq eqqartuussisoqarfimmi pisuutinneqarpoq pisimasoq 2-mi unnerluutigineqaatiminut unioqqutitsinermut pinerluttulerinermi inatsimmi § 84, imm. 1, ullormi 18. juni 2017 arnaq pineqartoq sinittoq atisaasa iluisigut attualaarsimallugu.

Unnerluutigineqartoq eqqartuussisoqarfimmit pisimasoq 1-mi pinngitsuutinneqarpoq unnerluutigineqaatimut unioqqutitsinermut pinerluttulerinermi inatsimmi § 77, imm. 1, nr. 2.

Nunatta Eqqartuussisuuneqarfiani suliami pineqartoq tassaavoq apeqqut, unnerluutigineqartoq pisuunersoq unioqqutitsinermi pinerluttulerinermi inatsimmi § 77, imm. 1, nr. 2-mik, pisimasoq 1-mi unnerluutigineqaataani imaluunniit iliuuseqariaraluarsimaneq, kiisalu pineqaatissiissummik sivisussusiliineq aamma mitagaanermut ajunngitsorsiassanik aalajangersaaneq.

Unnerluutigineqartoq pisimasoq 1-mut nassuiaavoq arnaq pineqartoq alla, pisimasoq sioqqullugu imeqatigisani, sinittoq atisaajarsimallugu atoqatiginissaa siunertaralugu, taamaaliorniaraluarninilu unitsissimallugu angajumi oqarasuaatikkut oqaloqatigereerneratigut. Unnerluutigineqartoq eqqartuussisoqarfimmi nassuiaasimavoq, angajuata oqarasuaatikkut oqaloqatiginerani mianersoqqusimagaa iliuuseriniakkani unitsissagaa. Maannakkut unnerluutigineqartoq eqqartuussisuuneqarfimmut nassuiaateqarpoq, angujuminik oqaluussinera unnerluutigineqartumut aamma arnamut pineqartumut attumassuteqanngilluinnartoq.

Arnaq pineqartoq pisimasoq 1-mut nassuiaavoq, itersimalluni unnerluutigineqartup najugaani atisaqarani, timimigullu malugisinnaallugu atoqatigineqarsimalluni, tamatumunngalu qularnarunnaarsaataasimasoq kingorna perusuersartarfiliarami paasisimagamiuk isugutalluni masallunilu.

Arnap pineqartup nunatta eqqartuussisuuneqarfianut nassuiaataa uppernartuuvoq, sukumiilluni kimeqarlunilu. Nassuiaatigisaalu ilaatigut ikorfartuiffigineqarluni unnerluutigineqartup nassuiaataanit, tassa unnerluutigineqartup atisaajarsimammagu taanna sinittoq. Taamatullu aamma nassuiaatigisaa ikorfartuiffigineqarluni tamatuma kingornatigut unnerluutigineqartumik kamaassisimanera, tamannalu unnerluutigineqartup aamma arnap pineqartup nassuiaatigivaat.

Taamaalilluni nunatta eqqartuussisuuneqarfianit tunngavigineqarpoq arnap pineqartup nassuiaataa pisimasoq ulloq 18. juni 2017 pillugu, tassami sinereerluni malugisimammagu sininnermini atoqatigineqarsimalluni. Unnerluutigineqartup nassuiaareerneratigut, tassa piffimmiissimalluni arnaq pineqartoq sinitsillugu, aamma pilersaaruteqarluni atoqatiginissaa atisaajarsimallugu, uppernarsineqarpoq unnerluutigineqartup arnaq pineqartoq atoqatigisimagaa, taanna qasunini aamma imigassamik aalakoornartulimmik sunnerteqqanini pissutigalugu iliuuserineqartumut akiuuteriarsinnaasimanngitsoq. Unnerluutigineqartup nassuiaataa iliuuserisaminik taamaatitsinerarnera angajumi oqarasuaatikkut oqaloqatigeernerata kingorna, atorneqanngilaq, patsisissarsiornertut oqaaserineqartutut isigineqarluni.  

Taamaalilluni unnerluutigineqartoq pisuutinneqarpoq unioqqutitsinermut pinerluttulerinermi inatsimmi § 77, imm. 1, nr. 2, pisimasoq 1-mi unnerluutigineqarnermisut.

Unioqqutitsinerup isikkuanik aamma annertussusaanik ataatsimut nalilersuereernermi pineqaatissiissutissaq aalajangersarneqarpoq qaammatini arfinilinni pineqaatissinneqarsimasunut inissiisarfimmiittussanngortitsinermik. Tamatuma saniatigut nunatta eqqartuussisuuneqarfiata pineqaatissiissutissamik sivisussusiliinermi ilaatigut isiginiarsimavaa suliap pisoqaassusia.

Inatsisinik unioqqutitsinerup peqqarniissusianik ataatsimut nalilersuereernermi, ilanngunneqarluni pingaartumik unnerluutigineqartoq pisuutinneqarmat unioqqutitsinermut pinerluttulerinermik inatsimmi § 77, imm. 1, nr. 2-mik tunngavissaqanngilaq pineqaatissiissutip utaqqisitanngortinneqarnissaa.

Taamaattumik nunatta eqqartuussisuuneqarfiata eqqartuussisoqarfiup aalajangigaa imatut allanngortippaa, pineqaatissiissut qaffallugu qaammatini arfinilinni pineqaatissinneqarsimasunut inissiisarfimmiittussanngortitsinermik, taannalu utaqqisitanngortinneqanngilaq.

Pisimasoq 1-mi pinerlineqartumut arnamut pineqartumuit mitagaanermut ajunngitsorsiassaq aalajangersarneqarpoq ataani oqaatigineqartutut.

Nunatta eqqartuussisuuneqarfiata eqqartuussisoqarfiup aalajangigaa mitagaanermut ajunngitsorsiassaq 10.000 kr.-iusoq pisimasoq 2-mi pineqartumut arnamut isumaqatigineqarpoq, eqqartuussisoqarfiullu tamatumunnga aalajangigaa atuuttussanngortinneqarluni.

Eqqartuussisoqarfiup aalajangigaa imatut allanngortinneqarpoq, eqqartuussutigineqarluni pineqaatissiissut qaffanneqarpoq qaammatini arfinilinni pineqaatissinneqarsimasunut inissiisarfimmiittussanngortitsinermik, taannalu utaqqissitanngortinneqanngilaq.

Unnerluutigineqartup arnamut pineqartumut mitagaaneranut ajunngitsorsiassatut akilissavai 40.000 kr.-it.

Suliap normua: K 138/20

Eqqartuussissutit nassuiaatillu