Qaammatini 8-ni pineq. inissiisarfimmiiittussanngorlugu - K 138/22

Eqqartuussissut Nunatta Eqqartuussisuuneqarfianit oqaatigineqarpoq ulloq 5. oktober 2022.

Pisimasup nakuusernerup pineqartoq sioqqullugu nassuiaatinit ersersinneqarpoq unnerluutigineqartup naapissimagai angutit marluk nammineq angerlarsimaffimmini ulloq 30. august 2020, tassungalu atatillugu ilaatigut pinerlineqartoq eqqartorsimavaat. Pingasuullutik ingerlaqatigiillutik imerniartarfiliarput Tulukkamut. Tulukkap matuneranut atatillugu unnerluutigineqartup pinerlineqartoq imertarfiup silataani oqaloqatigisimavaa, ilaatigut eqqartorlugu, pinerlineqartup oqarsimanera unnerluutigineqartoq allallu Aasianniit anisinniarlugit. Inuit takkua sisamat nangikkiarlutik Kunte Kintamut ingerlaqatigiipput. Pinerlineqartoq ilaminit pingasunit siulliungaatsiarluni, piffissallu ilaani ilai arpalersimapput pinerlineqartoq unganiarlugu.

Angutit marluk nassuiaaneranit uppernarsineqartutut isigineqartariaqarpoq, tamarmik pingasuullutik, taakkununnga ilaanngullugu unnerluutigineqartoq, puffassimaarsimasut, pinerlineqartoq arpallutik angunialermassuk. Uppernarsineqartutut isigineqarsinnaanngilaq isumaqatigiissimaneri qanoq pisoqarnissaanik pinerlineqartoq angugunikku, kisianni siusinnerusukkut oqaaserisimasaanik iliuuserisimasaanillu paasitinniarlugu. Pinerlineqartoq anguvaat, taanna qimaariaraluartoq. Angutip iliuusereqataasup aappaata naallerpaa uppisillugu, tassanilu nakuusernermik pisoq aallartilluni.

Tunngavigineqartariaqarpoq unnerluutigineqartoq nangikkiarfimmut ingerlaannarsimasinnaagaluarmat, angutit marluk iliuusereqataasut pinerlineqartoq arpallutik malikkaat, imaluunniit nakuuserlutik aallartimmata. Taamatullu aamma tunngavigineqarpoq unnerluutigineqartup piffissap ilaani angutit marluk pinerliisut nakuusernerannit uneqqusimagaluarmagit, taamatullu aamma pisimasup ilaanik mobiltelefoniminit filmiliorsimalluni.

Assigiinngitsunik nassuiaatigineqarpoq unnerluutigineqartoq nakuusernertaanut peqataasimanera pillugu, aamma ilisimannittut tamanna pillugu nassuiaanerat ima nalorninartigalutik, qularnaatsumik uppernarsineqartutut isigineqarsinnaanani eqqartuussutigineqarsinnaasumik, nakuusernermi peqataasimanera. Isiginiarneqarluni unnerluutigineqartup ilani marluk nakuuserannik uneqqusimagai, sakkortoorujussuanngormat, nunatta eqqartuussisuuneqarfianit uppernarsineqanngilaq, pingaartumik angutip pinerliisup aappaata peqqarniitsorujussuarmik nakuuserneranut peqataanissamik siunertaqarsimanera.

Nassuiaatigineqartut unnerluutigineqartup pisup aallarnisarnerani qanoq iliorsimaneranik nassuiaatigineqartut tunngavigalugit, qanoq puffakkiartugaartoqarsimanera, aamma, pinerliisut allat marluk peqatigalugit pinerlineqartumik arpalluni malersuisimanera aammalu iliuuserisimasaanik ilisimatinneratigut uppernarsineqartutut isumaqarfigineqartariaqarpoq, unnerluutigineqartup peqataaffigisimagaa puffassimaartoqalersimanera, taamaalilluni ikiorfartueqataaffigalugu pisup nakusernermik kinguneqariartugaarneranik.  Piffissami pinerlineqartup saassunneqarnerani, uppernarsineqartut taamaallaat oqaatigineqarsinnaanngilaq unnerluutigineqartup nammineerluni nassuiaanera, tassa nakuusernermut ersarissumik piumasimanani. Tamanna tunngavigalugu nunatta eqqartuussisuuneqarfianit uppernarsineqarpoq unnerluutigineqartoq pisumi nakuusernerup aallartinnerani peqataasimanera, tassani annikitsuinnarmik nakuuserfiusumi, kisianni peqataajumasimanani nakuusernerup peqqarniitsunngornerani. Taamatut annertussusilikkamik suliami pisimasoq 1-mi pisuutinneqarpoq.

Suliami pisimasoq 8-mi illuatungeriit tamarmik eqqartuussisoqarfiup pisuunermik naliliinera atuuttussanngorteqquvaat. Unnerluutigineqartoq eqqartuussisoqarfimmit eqqartuunneqarpoq arnap pineqartup kiinaatigut immiaaqqap puuanik milorsimanermut, taanna qinngamigut kilerneqalersillugu aamma kiinnamigut pullanneqalersillugu.

Unnerluutigineqartoq suliami pisimasoq 1-imi unnerluutigineqaatip ilaanut pinngitsuutinneqarmat, tassani pineqarpoq nakuusernerup peqqarniitsortaa, aamma nakorsat eqqartuussinermi isumasiugaasartut oqaaseqaataat pineqaatissinneqarnissaanut atatillugu nalorninartutut paasisariaqarmat, eqqartuussisuuneqarfik isumaqarpoq naammattumik tunngavissaqanngitsoq immikkut isumagisassanngortitsinissamik pineqaatissiinissami tunngavissaq naammanngitsoq.

Pisimasut peqqarniissusiannik ataatsimut nalilersuereernermi unnerluutigineqartup pisuutitaaffigisaani, sanilliunneqarlutik, siusinnerusukkut inummut navianaatilimmik eqqartuussaassutigisimasai arlallit aamma pisimasoq 1 piliarineqarsimammat eqqartuussummit kingullermit iperagaanerminiit piffissaq sivikitsuararsuaq qaangiutiinnartoq, pineqaatissiissut aalajangersarneqarpoq qaammatini arfineq pingasuni pineqaatissinneqarsimasunut inissiisarfimmiittussanngortinneqarnermik.

Unnerluutigineqartoq eqqartuunneqarpoq qaammatini arfineq pingasuni pineqaatissinneqarsimasunut inissiisarfimmiittussanngortinneqarnermik.

Suliap normua: K 138/22

Eqqartuussissutit nassuiaatillu