Nunatta Eqqartuussisuuneqarfia

21 feb 2020

Nunatta Eqqartuussisuuneqarfia

Aserorterinermi, iserteruni tillinniarnermi aamma ikuallatsitsinermi suliami eqqartuussut - K007/19

17-inik ukiullit marluk eqqartuussisoqarfimmit eqartuunneqarput arlaleriarlutik iserterlutik tillinniarsimasutut aamma aserorterisimasutut. Aamma eqqartuunneqarput illumik ikuallatsitsinermut. Innerup siaruaanneratigut illu annertuumik ajoquserneqarpoq.

Nunatta Eqqartuussisuuneqarfiata inerniliinera

Taamaallaat ikuallatsitsinermut tunngasumi nunatta eqqartuussisuuneqarfiata nalilersortussaavaa 17-inik ukiulinnut pisuunermik apeqqut. Suliami pisimasut sinnerini illuatungeriit pisuunermik apeqqummut eqqartuussisoqarfiup aalajangernera akuerinikuuvaat. Uppernarsaasiissutit misissoreernerisigut, tassunga ilanngullugit nassuiaatigineqartut, qanoq inneq ikinneqarsimanersoq, nunatta eqqartuussisuuneqarfiata isumaqatigivaa eqqartuussisoqarfik, tassa unnerluutigineqartut pisuusut piaaraluni ikuallatsitsinermut.

Ikuallatsitsineq peqqarniitsumik pinerluttulerinermi inatsimmik unioqqutitsinerummat, nunatta eqqartuussisuuneqarfiata isumaqarfigivaa, eqqartuussisoqarfiup eqqartuussutaanit suli sakkortunerusumik pineqaatissiisoqassasoq. Iluatungaanili aamma isiginiarneqassalluni unnerluutigineqartut inuusuttumineerarsuuneri, aamma inunnik isumaginnittoqarfimmit oqaaseqaatit naapertorlugit ilorraap tungaanut ineriartorneri suliap suliarineqarnerani inissinneqarfigisaminni. Unnerluutigineqartup aappaa nammineersinnaajunaarsitaaqqavoq (tigummigallagaaqqavoq) suliap eqqartuussivinni suliarineqarnerani. Eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni aamma Pinerluttunik Isumaginnittoqarfimmit nakkutigisassanngortinneqarluni ukiuni pingasuni. Pinerluttunik Isumaginnittoqarfimmit nakkutigineqarnermini malittussaavai piumasaqaatitaliunneqartut assigiinngitsut, taakkua aalajangersarneqarsimapput inuttut ilorraap tungaanut suli ineriartornera ikorfartuiffiginiarlugu. Piumasaqaatitaliunneqartut ilaat imaalluni inissinneqarsimaffimmini najugaqaannassasoq.


Unnerluutigineqartup aappaa eqqartuunneqarpoq pinerluttunik isumaginnittoqarfimmit ukiuni marlunni nakkutigineqassasoq. Pinerluttunik Isumaginnittoqarfimmit nakkutigineqarnermini malittussaavai piumasaqaatitaliunneqartut assigiinngitsut, taakkua aalajangersarneqarsimapput inuttut ilorraap tungaanut suli ineriartornera ikorfartuiffiginiarlugu.

Ulloq aalajangiiffik

Nunatta Eqqartuussisuuneqarfianit eqqartuussut nalunaarutigineqarpoq ulloq 21. februar 2020-imi.

Suliap normua: K 007/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiaatit