Eqqartuussisoqarfiup eqqartuussutaa atuuttussanngortinneqarpoq - K 264/22

Eqqartuussissut Nunatta Eqqartuussisuuneqarfianit oqaatigineqarpoq ulloq 24. februar 2023.

Suliamut suliareqqitassanngortitamut uppernarsaasiisoqareerneratigut nunatta eqqartuussisuuneqarfiata eqqartuussisoqarfik isumaqatigivaa, uppernarsineqartutut isigineqartariaqartoq, unnerluutigineqartup  angutit pineqartut eqqartuussisoqarfiup eqqartuussutaani allaaserineqartutut nakuuserfigisimagai, taamaattumik eqqartuussisoqarfiup uppernarsaasiissutinik inerniliinera suliami pisimasut pingajuanni aamma sisamaanni atuuttussanngortitsisoqarpoq.

Pingaartumik nunatta eqqartuussisuuneqarfianit pingaartinneqarput angutit pineqartut nassuiaaneri aamma alapernaarsuutikkut videoliap takutinneqarneratigut.

Angutip aappaa uppernartumik nassuiaavoq unnerluutigineqartup assamminik illuttut qungatsimigut tigusimagaani majuarfinnilu allorissat sisamat kiveqqasimalluni qungatsimigut tigummilluni. Angutip aappaa pisimasumi nammineq pineqarnini pillugu kusassaaniarsimanngilaq, aamma nassuiaanera nammineq misigisimasatut nipeqarpoq.

Aamma angutip aappaata nassuiaanera unnerluutigineqartumit ajanneqarsimalluni, videoliamit ikorfartuiffigineqarpoq.

Aamma unnerluutigineqartoq eqqartuunneqarpoq piffissami 19. septemberimiit 17. oktober 2020-p akornani angut alla pinngitsaaliniarsarisimagaa siorasaarlugu unnerluutigineqartumut akiitsui akilersinniarsaralugit aamma ulloq 9. december 2020-mi hasholiamik 4 grammimik aamma potsimik 4 grammimik nammineq atugassamik tigumiaqarnermut. Pisimasuni taakkunani marlunni pisuunermik apeqqut nunatta eqqartuussisuuneqarfianut suliareqqitassanngortinneqanngilaq.

Nunatta Eqqartuussisuuneqarfianit aalajangersarneqarpoq pineqaatissiissutitut nalunaaquttap akunneri 80-t aningaasarsiaqaatiginagu inuiaqatigiinni sulisitaanissaq, naammassineqartussamik sivisunerpaaffiliunneqartup qaammatit arfineq pingasut ingerlaneranni, tak. Pinerluttulerinermik inatsimmi § 141, imm. 1, uniffik siulleq aamma uniffiit aappaat. Unnerluutigineqartoq pinerluttunik isumaginnittoqarfimmit nakkutigineqassaaq ukiumi ataatsimi qaammatinilu arfinilinni, tak. Pinerluttulerinermik inatsimmi § 141, imm. 2.

Nunatta eqqartuussisuuneqarfianit ingammik pisimasut pingajuanni meeqqamut 13-nik ukiulimmut iliuuserineqartoq, tamatumanilu meeraq taamatut isikkulimmi pissutissarsissutaasinnaasumik iliuuseqarsimanngilaq, tamannalu isumaqarfigineqarpoq peqqarniitsumik pinerluttulerinermik inatsimmik unioqqutitsinertut. Taamatullu aamma sakkortusaatitut isumaqarfigineqarluni unnerluutigineqartoq siusinnerusukkut arlaleriarluni pineqaatissinneqartarsimanera inummut ulorianaatilimmik.

Pisimasut piliarineqarsimapput piffissami septemberimiit decemberimut 2020-mi, piffissarlu suliap suliarineqarneranut atorneqarsimasoq unnerluutigineqartup pisuussutiginngilaa, taamatullu aamma taamanili nutaamik pinerluuteqaqqissimanani.

Isiginiarneqarlutik piffisaq suliap suliarineqarneranut atorneqarsimasoq, aamma isiniarneqarluni unnerluutigineqartup inuttut atugarisani ilorraap tungaanut saatissimammagit, pineqaatissiissut aalajangersarneqarpoq inuiaqatigiinni sulisitaanermik.

Eqqartuussisoqarfiup eqqartuussutaa arsaarinnissuteqarnissamut tunngasoq atuuttussanngortinneqarpoq.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, pineqaatissiineq aalajangersarneqarpoq nalunaaquttap akunneri 80-t aningaasarsiaqaatiginagu inuiaqatigiinni sulisitaanermik, tamannalu naammassineqassaaq sivisunerpaaffiliussaq qaammatit arfineq pingasut ingerlaneranni. Unnerluutigineqartoq pinerluutunik Isumaginnittoqarfimmit nakkutigineqassaaq ukioq ataaseq aamma qaammatit arfinillit.

Suliap normua: K 264/22

Eqqartuussissutit nassuiaatillu