Qaammatini 3-ni pineq. inissiisarfimmiittussanngortinneqarluni - K 064/23

Eqqartuussissut Nunatta Eqqartuussisuuneqarfianit oqaatigineqarpoq ulloq 9. juni 2023.

Niviarsiaraq, pinerliinerup nalaani 16-nik ukioqartoq, nunatta eqqartuussisuuneqarfianut uppernarluinnartumik nassuiaateqarpoq pisup qanoq ingerlasimanera pillugu, ilaatigullu ersersinneqarluni, unnummi tassani pisoq sioqqullugu immiaarartornikuunngisaannarpoq aamma atoqateqarnikuunngisaannarpoq, kisiannili unnerluutigineqartup immiaarartoqqusaqattaarsimagaani inimi, aamma sinittarfiliaqatigiumasimagaani pujortariaqatiseraluni, tassani unnerluutigineqartup attuualersimagaani aperalunilu atoqatigiissanerlutik. Aamma nassuiaataanit ersersinneqarpoq taamaalilluni atoqatigiinnissamut akuersisimasoq, kisiannili aamma peqatigitillugu iluaalliuutigisimallugu aarlerinaateqarmat anaanami ineeqqamut isersinnaanera.

Unnerluutigineqartoq pinerliinerup nalaani 38-nik ukioqartup niviarsiaqqap anaanaa aapparisimavaa, taannalu eqqartuussisuuneqarfimmi unnerluutigineqartumit nassuiaateqarpoq pisuni tulleriaani takutinniarneqarluni sanarfisatut nipilerlugu, niviarsiaraq unnerluutigineqartumik saassaarisimasutut killormoortuaniunngitsoq.

Nunatta eqqartuussisuuneqarfianit niviarsiaqqap nassuiaataa uppernarnerusutut isumaqarfigimmagu eqqartuussummi tamanna tunngavigineqarpoq.

Taamaalilluni nunatta eqqartuussisuuneqarfiata eqqartuussisoqarfik assigalugu pinerlisap nassuiaataanit uppernarsivaa, unnerluutigineqartoq pisuusoq unioqqutitsinermut pinerluttulerinermik inatsimmi § 80, imm. 1, saasaarineq.

Pinerlisap ukiumigut inuusunnera, unnerluutigisap aamma pinerlisap ukiumikkut nikinganerat, aamma unnerluutigineqartup pinerlisap arnaanik aappaqarsimanera taamaalillunilu aamma pinerlisaq ilisarisimallugu, aammalu pissutsit sinnerini, tassunga ilanngullugu unnerluutigineqartup atoqatigiinnerup pineqartup pinissaa sunniuteqarfigisimammagu, eqqartuussisoqarfik assigalugu, nunatta eqqartuussisuuneqarfia isumaqarpoq inatsimmik unioqqutitsineq peqqarniitsuusoq, kinguneqartinneqartariaqartorlu utaqqisitaanngitsumik pineqaatissinneqarsimasunut inissiisarfimmiittussanngortinneqarnermik.

Pinerliinerulli kingornatigut piffissaq ingerlasimasoq pissutigalugu, nunatta eqqartuussisuuneqarfia isumaqarpoq pineqatissinneqarsimasunut inissiisarfimmiinnissaq qaammatit sisamaanani qaammatit pingasuusariaqartoq, taamatut aalajangiisimagaluarmat eqqartuussisoqarfik. Tassunga atatillugu oqaatigineqassaaq sivisussusiliineq pisimasut nutaanngissusiat pissutigalugu aalajangerneqarmat imminut pisuttornermik unnerluutigineqartup pisuutinneqarfigisai isiginiarneqaratik.

Mitagaanermut ajunngitsorsiassaq piumasaqaatigineqartoq eqqartuussisut siulittaasuannit eqqartuussuteqarfigineqanngilaq aatsaat tamanna nunatta eqqartuussisuuneqarfiani tunngavilersuisoqarnerani saqqummiunneqarmat.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, unnerluutigineqartoq eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni.

Suliap normua: K 064/23

Eqqartuussissutit nassuiaatillu