14 dec 2020
Nunatta Eqqartuussisuuneqarfia
Ulluni 60-ini inissiisarfimmiittussanngortitsineq - K 006/19
Angut 49-nik ukiulik 540 gramimik marihuanaliorsimanermut aamma missiliorlugu 1.225 gramimit annikinnerugunanngitsumik marihuanaliornissaq, ingerlateqqitassamik,
siunertaralugu cannabisip naasuinik 43-nik cannabisillu naasuinit kipisanik ikkutanik naatitsisimanermut pigisaqarsimanermullu Eqqartuussisoqarfik Sermersuumit pisuutinneqarpoq.
Unnerluutigineqartoq naasunik naatitsisimanerarpoq, oqarsimallunili hashi missiliorlugu taamaallat 103 gramiusoq. Eqqartuussisoqarfiup unnerluutigineqartoq pisuutissimavaa unnerluussisussaatitaasut piumasaqaataat naapertorlugu, uppernarsaatinillu naliliinermi aalajangiisuusumik pingaartissimallugu Retskemisk afdelingip oqaaseqaataa, tassannga naatsorsueriaaseq ersersinneqarluni.
Unnerluutigineqartoq hashimik akuleriimmik 2,9 gramimik nammineq atugassamik marloriarluni tigummiaqarsimasutut hashimillu 3,86 gramimik aamma nammineq atugassamik pigisaqarsimasutut pisuutinneqarsimavoq.
Eqqartuussisoqarfiup pineqaatissiissut qaammatini tallimani inissiisarfimmiittussanngortitsinermut aalajangersarsimavaa aamma marihuana, naasut, atortut kiisalu containeri naatitsiffittut atorneqartoq arsaarinnissutigisimallugit. Aammattaaq suliamut aningaasartuutinik akiliisussanngortinneqarsimavoq.
Eqqartuussisoqarfiup eqqartuussutaa taanna unnerluussisussaatitaasunit suliareqqitassanngortinneqarpoq, pineqaatissiissutip sukannernerulersinneqarnissaa piumasaqaatigineqarluni.
Eqqartuussisuuneqarfiup inerniliinera
Eqqartuussisoqarfiup naatsorsueriaasersimasaa eqqartuussisuuneqarfiup atuuttussanngortippaa, unnerluutigineqartorlu katillugu 1,7 kg marihuanamik pigisaqanermut pisuutippaa. Unnerluutigineqartulli marihuanamik nassaarineqartumik ingerlatitseqqiiniarsimanera eqqartuussisuuneqarfiup uppernarsarneqarsorinngilaa, tuniniaaqqiinissamimmi ilimagisaqarneq qularnaarneqanngilaq, naak unnerluutigineqartup najugaqarfianik, oqarasuaataanik, aningaaserivimmi kontoinik il.il. misissuisoqaraluartoq. Tamanna eqqarsaatigalugu eqqartuussisuuneqarfik isumaqarpoq pineqaatissiissut ulluni 60-ini inissiisarfimmiittussanngortitsinermut naleqquttumik aalajangersarneqarsinnaasoq.
Naalagaaffiup karsia eqqartuussisuuneqarfimmi suliamut aningaasartuutinik akiliisussanngortinneqarpoq.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 12. februar 2019
Suliap normua: K 006/19
Nunatta Eqqartuussisuuneqarfiata eqqartuussissutaa
Sermersuup eqqartuussiviata eqqartuussissutaa