Eqqartuussisoqarfiup eqqartuussutaa atuuttussanngortinneqarpoq - K 143/22

Eqqartuussissut Nunatta Eqqartuussisuuneqarfianit oqaatigineqarpoq ulloq 30. maj 2023.

Eqqartuussisoqarfik assigalugu, nunatta eqqartuussisuuneqarfia isumaqarpoq niviarsiaqqap nassuiaataa uppernartuusoq. Nassuiaanera sukumiisuuvoq allanngoraranilu aamma nammineq misigisimasatut ingasattajaarisoqaranilu nalorninani nassuiaataalluni.

Niviarsiaqqap nassuiaateqareerneratigut tunngavigineqartariaqarpoq, unnerluutigineqartup niviarsiaqqap kinguaassiutitaatigut assammi aalatinneratigut attualaarsimagaa. Taamatullu aamma tunngavigineqartariaqarpoq attualaarinninneq sivikitsuinnaq pineqanngimmat. Taamaattumik nunatta eqqartuussisuuneqarfia isumaqarpoq uppernarsineqartutut isigineqartariaqartoq, kinguaassiutitigut allatut atoqatigiinninnertut, tak. Pinerluttulerinermik inatsimmi § 77, imm. 1, nr. 3.

Isiginiarneqarluni niviarsiaqqap qulinik ukioqarnera aamma sukumiisumik oqaluttuarsinnaasimanera pisimasoq pillugu qanoq pisoqarsimaneranik, anaanaminut aamma videokkut apersorneqarneqarnermini, allatut inerniliissutaasinnaanngilaq pisimasup eqqoqqissaarnerusumik ulluliiffigineqarsinnaannginnera, tassami nassuiaatigineqartut tunngavigalugit tunngavigineqartariaqarmat, pisimasoq pisimammat 2021-imi juullip aamma niviarsiaqqap inuuiata ulloq 4. marts 2022-p akornani. Taamaattumik uppernarsineqartutut isigineqarpoq, unnerluutigineqartoq pinngitsaaliisimasoq aamma ilaquttatut qanigilluinnakkamik atoqateqarsimasoq eqqartuussisoqarfimmit uppernarsineqartutut annertutigisumik, taamaattumillu pisuunermik apeqqummi eqqartuussisoqarfiup eqqartuussutaa atuuttussanngortinneqarpoq.

Eqqartuussisarnermi periuseq malillugu eqqartuussisoqartarpoq, aallaavittut qaammatit qulingiluat tikillugit pineqaatissinneqarsimasunut inissiisarfimmiittussanngortitsoqartarneranik suliani pinngitsaaliinerni meeqqamik aqqaneq marluk inorlugit ukiulimmik kinguaassiutitigut allatut atoqatiginninnermi, pinngitsaaliineq piliarisimappat 1. juli 2022 sioqqullugu, aamma uani pineqarmat pinngitsaaliineq piliarineqarsimasoq inummit isumassortigisamit.

Suliami pissutsinik tunngavissarsissutaasunik soqanngilaq suliami matumani periuutsimik saneqqutsinissamut, aamma sakkortusaatitut pingaartinneqartariaqarmat uani pineqartoq tassaammat ilaquttatut qanigilluinnakkamik atoqateqarneq.

Eqqartuussisoqarfiup mitagaanermut ajunngitsorsiassamik aalajangersagaa atuuttussanngortinneqarpoq, suliani assingusuni tamanna periusiummat.

Eqqartuussisoqarfiup eqqartuussutaa atuuttussanngortinneqarpoq.

Suliap normia: K 143/23

Eqqartuussissutit nassuiaatillu